༢༠༡༠ ཟླ་ ༨ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ས་ཁུལ་མ་ནཱ་ལིར་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་སྩལ་གནང་མཛད་རྒྱུ་ཡིན་འདུག སྔོན་གྱི་མཛད་རིམ་ལྟར་ན་མགོན་པོ་གང་ཉིད་མཆོག་གིས་ཕྱི་ལོ་ ༢༠༡༠ ཟླ་ ༨ ཚེས་ ༡༨ ནས་ ༢༠ བཅས་ཉིན་གསུམ་རིང་ཧི་མཱ་ཅལ་ས་ཁུལ་ཇི་སི་པར་གསུང་ཆོས་བཀའ་དྲིན་སྩལ་གནང་མཛད་རྒྱུ་ཡིན་ནའང། དབྱར་དུས་ཆར་ཞོད་ཆེ་བས་ས་ཐོག་བརྒྱུད་ཆིབས་སྒྱུར་བསྐྱང་རྒྱུར་མཛད་དཀའ་འཕྲད་བཞིན་པ་མ་ཟད། མཁའ་ལམ་བརྒྱུད་ཐད་འཕུར་གནམ་གྲུར་ཆིབས་སྒྱུར་སྐྱོང་བར་སྐབས་དེར་གནམ་གཤིས་བཟང་ངན་ཇི་འདྲ་སྟོན་མིན་ཚོད་དཔག་དཀའ་བས་གོང་ཚེས་ཉིན་གསུམ་གྱི་གསུང་ཆོས་ཕྱིར་འགྱངས་གནང་ཡོད་ཀྱང་མཛད་འཆར་གོ་སྒྲིག་ཞུས་པ་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་ཇི་སི་པར་ (Jespa) ཟླ་ ༨ ཚེས་ ༢༠ ནས་ ༢༢ བཅས་ཉིན་གསུམ་རིང་གསུང་ཆོས་བཀའ་དྲིན་སྩལ་གནང་མཛད་འཆར་ཡོད་པ་ཙམ་ལས་ད་ལྟའི་ཆར་མཛད་རིམ་ངེས་གཏན་གང་ཡང་མེད། འཕྲལ་སེལ་མཛད་རིམ་གོ་སྒྲིག་ཞུས་པ་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་གིས་ཇི་སི་པར་ཕྱི་ཟླ་ ༨ ཚེས་ ༢༠ ཉིན་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་སྒྲོན་གྱི་བཀའ་ཆོས་དང། ཕྱི་ཚེས་ ༢༡ ཉིན་འཁོར་ལོ་བདེ་མཆོག་གི་བཀའ་དབང་དང་དེ་བཞིན་ཕྱི་ཚེས་ ༢༢ ཉིན་སྤྱན་རས་གཟིགས་ཀྱི་བཀའ་དབང་སྩལ་གནང་མཛད་རྒྱུ་ཡིན་འདུག་པ་བཅས།།
