༢༠༡༠ ཟླ་ ༨ ཚེས་ ༢༣ རེས་གཟའ་ཟླ་བ།

༄༅། །ཉེ་ལམ་༸གོང་ས་༸སྐྱབས་མགོན་ཆེན་པོ་མཆོག་དང་རྒྱ་གར་གྱི་སྲིད་བློན་སྐུ་ཞབས་མན་མོ་ཧང་སིངྒ་མཇལ་འཕྲད་མཛད་པར་རྒྱ་ནག་གཞུང་ནས་ངོ་རྒོལ་གྱིས་སྐྱོན་བརྗོད་ཤུགས་ཆེ་བྱས་པ་དེར། ཕྱི་ལོ་ ༢༠༡༠ ཟླ་༨ ཚེས་ ༢༡ རེས་གཟའ་སྤེན་པའི་ཉིན་རྒྱ་གར་གྱི་ཕྱི་སྲིད་བློན་ཆེན་སྐུ་ཞབས་ཨེ་སི་ཨེམ་ཀི་རི་ཤི་ན་མཆོག་གིས་གསར་འགོད་པ་ཁག་གཅིག་བརྒྱུད་རྒྱ་ནག་གཞུང་ལ་འོས་འཚམས་ཀྱིས་ལན་འདེབས་གནང་དོན། རྒྱ་གར་གཞུང་གིས་༸གོང་ས་ཏཱ་ལའི་བླ་མའི་ཐོག་འཛིན་པའི་ལངས་ཕྱོགས་ཇི་འདྲ་ཡིན་མིན་ཚིག་ཐག་ཆོད་པོའི་ཐོག་ལན་མང་བརྗོད་ཟིན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་རྒྱ་གར་གཞུང་གི་གུས་བརྩི་ཆེན་པོ་ཞུ་རྒྱུའི་སྐུ་མགྲོན་ཞིག་ཡིན་པ་མ་ཟད། ཆོས་ཕྱོགས་ཀྱི་དབུ་ཁྲིད་གཅིག་ཀྱང་ཡིན་པ་རྒྱ་གར་ཡུལ་མི་ས་ཡ་མང་པོས་ངོས་ལེན་གནང་བཞིན་ཡོད། ཅེས་གསུངས་ཡོད།