༢༠༡༠ ཟླ་ ༧ ཚེས་ ༡༧ རེས་གཟའ་སྤེན་པ།
༅༅། །ཕྱི་ལོ་ ༢༠༡༠ ཟླ་ ༧ ཚེས་ ༡༣ ཉིན་སྦེལ་ཇམ་རྒྱལ་ས་བྷ་ར་སེལ་ནང་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད། དེ་ཡང་མཛད་སྒོ་ཚོགས་ཡུལ་ནི་ཡུ་རོབ་སྤྱི་མཐུན་ཚོགས་པའི་ལས་ཁུངས་མ་ལག་གཙོ་ཁག་(Concert Noble) ཞེས་པའི་ཚོགས་ཁང་ནང་ཡིན་པ་དང། མཛད་སྒོའི་སྐབས་གལ་ཆེའི་གཞུང་ཚབ་ཁང་གི་སྐུ་ཚབ་འཐུས་མི་དང་ཕྱི་འབྲེལ་ལས་དོན་ཚན་པའི་སྐུ་ཚབ་འཐུས་མི། ཡུ་རོབ་སྤྱི་མཐུན་ཚོགས་པའི་གྲོས་ཚོགས་འཐུས་མི་དང་ལས་བྱེད་མི་སྣ་ཁག ཡུ་རོབ་དཔལ་འབྱོར་དང་སྤྱི་ཚོགས་ལས་དོན་ཚོགས་ཆུང་གི་སྐུ་ཚབ་འཐུས་མི། སྦེལ་ཇམ་ཕྱི་འབྲེལ་དང་ནང་སྲིད་ལྷན་ཁང་གི་སྐུ་ཚབ་འཐུས་མི། གྲོང་ཁྱེར་ཆེ་ཁག་གི་སྤྱི་ཁྱབ་གཙོ་འཛིན་རྣམ་པ། ནང་པའི་ཆོས་ཚོགས་ཁག་གི་སྐུ་ཚབ། ས་གནས་བོད་རིགས་ཚོགས་པའི་ཚོགས་གཙོ། བོད་དོན་རྒྱབ་སྐྱོར་བ། མཁས་དབང་ཁག་དང་དེ་བཞིན་གསར་འགོད་པ་བཅས་ཚང་འཛོམས་བྱུང་ཡོད། དེ་ཡང་མཛད་སྒོའི་ཐོག་མར་བྷ་ར་སེལ་ནང་རྟེན་གཞི་བྱས་པའི་ནཱ་ལེཎྜའི་ནང་པའི་ཆོས་ཚོགས་ཀྱིས་དབུ་འཛུགས་ཐོག་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པའི་སྨོན་ལམ་གསུང་འདོན་ལེགས་པར་གྲུབ་མཚམས་ནུབ་ཡུ་རོབ་བོད་གཞུང་སྐུ་ཚབ་དོན་གཅོད་བཀའ་ཟུར་བཀྲིས་དབང་འདུས་མཆོག་གིས་ཐོག་མར་ཚོགས་བཅར་བ་སྐུ་མགྲོན་མི་གྲངས་ ༡༠༠ ཙམ་ཆེད་ཕེབས་གནང་བར་ཐུགས་རྗེ་ཆེ་ཞུས་པ་དང་སྦྲགས། འཛམ་གླིང་ཁྱོན་ཡོངས་ལ་འདི་ལོའི་རིང་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་སྲུང་བརྩི་ཞུ་རྒྱུ་དང། དེ་བཞིན་བོད་ནང་རྒྱ་ནག་གཞུང་གིས་དམ་བསྒྲགས་ལ་མི་ལྟོས་པར་གཞིས་ལུས་རྒྱ་ཆེའི་མི་མང་ཚོས་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་སྲུང་བརྩི་ཇི་འདྲ་ཞུ་གི་ཡོད་མེདཀྱི་སྐོར་འགྲེལ་བརྗོད་གནང། དེ་བཞིན་སྐབས་དེར་ཁོང་གིས་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་པ་འཕྲིན་ལས་དང་ཡང་དག་པའི་ལམ་སྟོན་དབུ་ཁྲིད། ཕྱོགས་མཚུངས་བོད་ནང་རྒྱ་མིས་བཙན་འཛུལ་བྱས་ནས་མི་ལོ་ ༦༠ ཙམ་གྱི་རྗེས་སུའང་གཞིས་ལུས་རྒྱ་ཆེའི་མི་མང་གི་སྙིང་སྟོབས་ཞུམ་པ་མེད་པར་གནས་པ་དང། འཛམ་གླིང་ཁྱོན་ཡོངས་ལ་བཙན་བྱོལ་བོད་མིའི་སྤྱི་ཚོགས་ཀྱི་སྒྲིག་འཛུགས་སྲ་བརྟན་ཚགས་ཚུད་ངང་གནས་ཐུབ་པ། བོད་དོན་བདེན་པའི་འཐབ་རྩོད་ཀྱི་ལས་འགན་བོད་མི་གཞོན་སྐྱེས་མི་རབས་གསར་པ་ཚོས་ལྷག་བསམ་དཔུང་པ་བརྟན་པོས་འདེགས་བཞིན་ཡོད་པ་དང། འཛམ་གླིང་ནང་དང་ལྷག་པར་རྒྱ་མི་རིགས་ཀྱི་ཁྲོད་དུ་༸གོང་ས་༸སྐྱབས་མགོན་ཆེན་པོ་མཆོག་གི་དབུ་མའི་ལམ་གྱི་སྲིད་བྱུས་དེར་རྒྱབ་སྐྱོར་ཇེ་ཆེར་འགྲོ་བཞིན་པར་བརྟེན། མ་འོངས་བོད་ཀྱི་གནད་དོན་སེལ་རྒྱུའི་རེ་བ་བྱེད་བཞིན་ཡོད་སྐོར་གསུངས། དེ་བཞིན་བཀའ་ཟུར་མཆོག་གིས་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་རྒྱ་གར་གསར་འགོད་པ་ཞིག་ལ་མགོན་པོ་གང་ཉིད་མཆོག་དགུང་གྲངས་བརྒྱ་ལྷག་སྐུ་འཚོ་བཞུགས་ཐུབ་རྒྱུའི་ཐུགས་རེ་མཛད་ཀྱི་ཡོད་སྐོར་གྱི་བཀའ་ལན་མཛད་པའི་གནས་ཚུལ་བྱུང་ཡོད་པས། གལ་ཏེ་རྒྱ་ནག་གཞུང་འཛིན་པ་ཚོས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་ཡུན་ཚོད་ལ་ཚོད་དཔག་གིས་བོད་ཀྱི་གནད་དོན་དེ་ཡུན་རིང་མ་འགོར་བར་རང་བཞིན་གྱིས་རྩ་མེད་འགྲོ་རྒྱུ་རེད་བསམ་པ་ཡིན་ན་དེ་ནི་རྩིས་ནོར་ཐེབས་པ་ཞིག་རེད་ཅེས་གསུངས། ཕྱོགས་མཚུངས་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཐོ་མ་སི་མན་ (Thomas Mann) ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་སྐུའི་འཁྲུངས་སྐར་གྱི་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་ཆབས་ཅིག་བོད་ཀྱི་གནད་དོན་སེལ་རྒྱུར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་མའི་ལམ་གྱི་བཞེངས་ཕྱོགས་དེར་རྒྱབ་སྐྱོར་ཞུས་ཡོད་པ་མ་ཟད། རྒྱ་མིས་༸གོང་ས་ཏཱ་ལའི་བླ་མར་ཁ་བྲལ་བ་ཡིན་སྐོར་གྱི་སྐྱོན་བརྗོད་བྱས་པ་དེ་དྲང་བདེན་མིན། ༸གོང་ས་ཏཱ་ལའི་བླ་མ་མཆོག་རྒྱ་ནག་གི་དཔོན་རིགས་ཚོ་ལས་སྐུ་ཚེ་རིང་བར་འཚོ་བཞུགས་མཛད་རྒྱུར་ངར་ཡིད་ཆེས་བརྟན་པོ་ཡོད་ཅེས་སོགས་ཀྱི་གསུང་བཤད་གནང་ཡོད། དེ་རྗེས་སྦེལ་ཇམ་བོད་རིགས་ཚོགས་པས་བོད་ཀྱི་ཐུན་མིན་གཞས་སྣ་འཁྲབ་སྟོན་ཞུས་ཡོད་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དང་སྟབས་བསྟུན་སྦེལ་ཇམ་རྒྱལ་ས་བྷ་ར་སེལ་ནང་རྟེན་གཞི་བྱས་པའི་བོད་ཀྱི་དོན་གཅོད་ཁང་ (Bureau du Tibet) དང་། ཡུ་རོབ་གྲོས་ཚོགས་ཀྱི་འཐུས་མི་སྐུ་ཞབས་ཐོ་མ་སི་མན་ (Thomas Mann) ལགས་དང་ལྕམ་ལི་ཌི་ཡ་ཇེ་རིན་ཇར་ (Lidia Geringer de Oedenberg) བཅས་ཀྱི་གཙོ་འགན་ཐོག་ཞི་བའི་འགྲུལ་བཞུད། (Journey for Peace) ཞེས་པའི་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་འབྲེལ་བའི་སྐུ་པར་འགྲེམས་སྟོན་ཞིག་ཕྱི་ལོ་ ༢༠༡༠ ཟླ་བ་ ༧ ཚེས་ ༡༢ ནས་ཚེས་ ༡༦ བར་ཡུ་རོབ་གྲོས་ཚོགས་ཀྱི་ཚོགས་ཁང་ཞིག་གི་ནང་གོ་སྒྲིག་གནང་ཡོད་པ་བཅས།།
