༢༠༡༠ ཟླ་ ༧ ཚེས་ ༡༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༩ ཉིན་ལྷོ་ཨ་ཕི་རི་ཀའི་གྲོང་ཁྱེར་པི་རི་ཏོ་རི་ཡའི (Pretoria) ནང་ལྷོ་ཨ་ཕི་རི་ཀའི་བོད་ཁང་གིས་གོ་སྒྲིག་འོག་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་ཉིན་མོ་གཟབ་རྒྱས་ངང་སྲུང་བརྩི་ཞུས་ཡོད། དེ་ཡང་སྐབས་དེར་ལྷོ་ཨ་ཕི་རི་ཀའི་གཞུང་འབྲེལ་མི་སྣ་ཁག་དང་གྷའོ་ཏེང་(Gauteng Provincial Legislature) ས་གནས་ཁྲིམས་བཟོ་ལྷན་ཁང་གི་འཐུས་མི་དང་མཁས་དབང་ཁག ནང་པའི་ཆོས་ཚོགས་ཀྱི་དབུ་ཁྲིད། གསར་འགོད་པ། རྩོམ་སྒྲིག་པ། གཞུང་འབྲེལ་མིན་པའི་འབྲེལ་ཡོད་ཚོགས་པའི་དབུ་ཁྲིད་རྣམ་པ། དེ་བཞིན་༸གོང་ས་མཆོག་ལ་དད་གུས་ཞུ་མཁན་དང་བོད་དོན་ལ་རྒྱབ་སྐྱོར་གནང་མཁན་ལྷོ་ཨ་ཕི་རི་ཀའི་མི་མང་བཅས་ཚང་འཛོམས་ཀྱིས་ཐོག་མར་བསངས་གསོལ་དང་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་པའི་སྨོན་ལམ་གསུང་འདོན་གནང་ཡོད།
དེ་རྗེས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་ཆབས་ཅིག་བོད་མི་ས་ཡ་དྲུག་གི་བདེ་དོན་ཆེད་རང་སྲོག་དོར་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་རྗེས་དྲན་སླད་ངག་བཅད་སྐར་མ་གཅིག་རིང་གནང་གྲུབ་བསྟུན། ལྷོ་ཨ་ཕི་རི་ཀའི་དབུ་ཁྲིད་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཡེ་ཤུའི་བླ་ཆེན་སྐུ་ཞབས་ཌེ་སི་མོན་ཊ་ཊ་ (Desmond Tutu) མཆོག་དང་། ལྷོ་ཨ་ཕི་རི་ཀའི་སྲིད་འཛིན་ཟུར་པ་སྐུ་ཞབས་ཌི་ཀ་ལག་ (FW de Klerk) མཆོག དེ་བཞིན་རྒྱལ་སྲས་སྐུ་ཞབས་བྷུ་ཐེ་ལེ་ཛི་ (Buthelezi) མཆོག་བཅས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་སྐུའི་འཁྲུངས་སྐར་གྱི་འཚམས་འཕྲིན་ཕུལ་བ་ཁག་སྒྲོགས་སྱང་ཞུས། དེ་ཡང་སྐུ་ཞབས་ཌེ་སི་མོན་ཊ་ཊ་མཆོག་གིས་འཚམས་འཕྲིན་ནང་འཁོད་དོན། བོད་ནང་དུ་ཡོད་པའི་བོད་མི་རྣམས་ཀྱིས་ངའི་གཏམ་བཤད་འདི་ཀློག་མི་ཐུབ། འོན་ཀྱང་ང་ཚོས་བོད་མི་རྣམས་ལ་གདུང་སེམས་མཉམ་སྐྱེ་ཀྱིས་རྒྱབ་སྐྱོར་ཞུས་པའི་ཐོག་བོད་མི་རྣམས་ནས་རང་གི་རྩ་བའི་བླ་མ་༸གོང་ས་ཏཱ་ལའི་བླ་མ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་གྱི་དུས་ཆེན་གུ་ཡངས་ཐོག་བོད་ནང་སྲུང་བརྩི་ཞུ་རྒྱུར་འབོད་སྐུལ་གྱི་ཞུ་སྙན་འབུལ་བཞིན་ཡོད་པ་དེ་ཁྱེད་རྣམ་པས་མཁྱེན་རྟོགས་ཡོད་པའི་རེ་བ་ཞུ་བཞིན་ཡོད་ཅེས་དང་། དེ་བཞིན་སྲིད་འཛིན་ཟུར་པ་སྐུ་ཞབས་ཌི་ཀ་ལག་མཆོག་གིས་འཚམས་འཕྲིན་ནང་། གོ་ལ་གཅིག་གྱུར་ལམ་ལུགས་ཀྱིས་འཛམ་གླིང་མི་མང་ཚོར་ཁེ་ཕན་དང་དུས་མཚུངས་དཀའ་ངལ་ཡང་ཧ་ཅང་ཆེན་པོ་བཟོས་ཡོད་པ་མ་ཟད། དེའི་ཤུགས་སྣོན་དབང་སྒྱུར་འོག་རང་གི་ཆོས་དང་ལེགས་བྱང་ངོ་བོ་བདག་གཅེས་བྱེད་རྒྱུར་འཛམ་གླིང་མི་མང་རྣམས་ལ་དཀའ་ངལ་ཧ་ཅང་འཕྲད་བཞིན་ཡོད། ༸གོང་ས་ཏཱ་ལའི་བླ་མ་མཆོག་ནི་དཀའ་ངལ་དེ་དག་ནང་ལྷུང་བའི་འཛམ་གླིང་མི་མང་རྣམས་ཀྱི་རེ་བའི་སྒྲོན་མེ་ལྟ་བུ་ཆགས་ཡོད་ཅེས་དང་། ཕྱོགས་མཚུངས་རྒྱལ་སྲས་སྐུ་ཞབས་བྷུ་ཐེ་ལེ་ཛི་མཆོག་གི་འཚམས་འཕྲིན་ནང་། ངས་སྐུ་ཉིད་ཀྱི་འཁྲུངས་སྐར་ལ་འཚམས་འདྲི་བཀྲིས་བདེ་ལེགས་ཞུ་རྒྱུ་དང་། སྐུ་ཉིད་སྐུ་ཁམས་གསལ་ཐང་དང་སྐུ་ཚེ་ཡུན་རིང་བརྟན་པའི་སྨོན་འདུན་ཞུ་བཞིན་ཡོད་ཅེས་སོགས་འཁོད་ཡོད།
དེ་རྗེས་ལྷོ་ཨ་ཕི་རི་ཀའི་སྐུ་ཚབ་དོན་གཅོད་སྐུ་ཞབས་བསོད་ནམས་བསྟན་འཛིན་ལགས་ཀྱིས་མཛད་བཅར་བ་རྣམས་ལ་དུས་ཆེན་ངོ་སྤྲོད་གནང་བ་དང་སྦྲགས་ཉེ་ལམ་བོད་ནང་རྒྱ་ནག་གཞུང་གིས་བོད་མི་སྙན་ངག་མཁན་དང་ཤེས་ཡོན་མི་སྣ། དེ་བཞིན་བཟོ་རིག་ཆེད་ལས་པ་དང་ཁོར་ཡུག་སྲུང་སྐྱོབ་པ་རྣམས་ལ་དམ་བསྒྲགས་ཆེ་རུ་གཏོང་བཞིན་ཡོད་པ་མ་ཟད། ཁོང་ཚོར་ཁྲིམས་ལུགས་དང་མ་མཐུན་པའི་ཁྲིམས་ཆད་བཏང་བའི་གནས་ཚུལ་རྣམས་གསལ་བཤད་ནན་པོ་གནང་ཡོད། དེ་བཞིན་ཁོང་གིས་རྒྱ་ནག་གཞུང་གིས་བོད་ནང་དུ་བྱུང་བའི་དོན་རྐྱེན་དེ་དག་མངོན་ཆུང་ཞིག་ཏུ་བསྒྱུར་རྒྱུའི་འབད་བརྩོན་བྱེད་བཞིན་ཡོད་ནའང་དངོས་ཡོད་ཀྱི་གནས་ཚུལ་ནི་དུས་ད་ལྟའང་བོད་ནང་གི་གཞིས་ལུས་བོད་མི་རྣམས་རྟག་ཏུ་འཇིག་སྣང་འོག་གནས་དགོས་པས་སེམས་ནང་བདེ་སྐྱིད་ཀྱིས་ཕོངས་བཞིན་ཡོད། བོད་མི་རྣམས་ལ་ཨ་ཕི་རི་ཀའི་གཞུང་དང་མི་མང་། དེ་བཞིན་གཞུང་འཛིན་དབུ་ཁྲིད་རྣམ་པས་བོད་ཀྱི་གནད་དོན་སེལ་རྒྱུར་རྒྱ་ནག་འགོ་ཁྲིད་ཚོར་གནོན་ཤུགས་སྤྲོད་དགོས་སྐོར་གསུངས་ཡོད། དེ་རྗེས་ལྷོ་ཨ་ཕི་རི་ཀའི་གཞས་པ་དང་རྩོམ་བྲིས་པ་ལྕམ་ཨེན་ཌི་རི་ཧ་ཊིང་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་བསྟོད་གླུ་ཕུལ་བ་དང་སྦྲགས་དུས་ཆེན་གྱི་མཛད་སྒོ་ལེགས་པར་མཇུག་བསྒྲིལ་ཡོད་པ་བཅས།།
