༢༠༡༠ ཟླ་ ༧ ཚེས་ ༢༦ རེས་གཟའ་ཟླ་བ།
༄༅། འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༧ ཚེས་ ༦ ཉིན་ལྡི་ལི་བོད་སྒར་བསམ་ཡས་གླིང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་སུ་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད། དེ་ཡང་དེ་ཉིན་སྔ་དྲོ་ཆུ་ཚོད་ ༧ ཐོག་ལྡི་ལིའི་བོད་སྒར་བསམ་ཡས་གླིང་ཁུལ་དུ་གནས་སྡོད་བོད་རིགས་སེར་སྐྱ་མི་མང་རྣམས་ནས་རང་ལུགས་གཟབ་མཆོར་ལེགས་པར་གྱོན་ཏེ་ས་གནས་བོད་ཁྱིམ་ཉིན་སློབ་ཀྱི་མདུན་ཐང་དུ་འདུ་འཛོམས་ཀྱིས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་སློབ་གྲྭའི་ཚོགས་ཁང་ནས་སེར་ཕྲེང་དང་བཅས་གདན་ཞུས་ཀྱིས་བཞུགས་ཁྲིར་འཁོད་བསྟུན། ལཀ་ཤི་མི་ནཱ་གྷར་བློ་གསལ་གླིང་གི་བླ་གྲྭ་རྣམས་ཀྱིས་༸རྒྱལ་བའི་འཁྲུངས་ལྷའི་གསོལ་མཆོད་གཙོ་གྱུར་གངས་ལྗོངས་བསྟན་སྲུང་དམར་ནག་གི་དབུས་དཀར་ཕྱོགས་སྐྱོང་བའི་སྲུང་མའི་འཕྲིན་བསྐུལ་དང་།
༸རྒྱལ་བའི་སྐུ་ཁམས་དང་མཐུན་པའི་སྐུ་རླུང་དར་འཛུགས། དེ་བཞིན་དར་ཆེན་ལ་ན་བཟའ་སྒྲོན་འབུལ་དང་ཆབས་ཅིག་བསང་མཆོད་ཀི་བསྭོའི་ལྷ་རྒྱལ་འཐེན། དེ་རྗེས་སྐུ་མགྲོན་གཙོ་བོ་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཆོས་སྐྱོང་དབང་ཕྱུག་ལགས། ཨཅ་ཡེ་ཤེས་ཕུན་ཚོགས་ལགས། དགེ་བཤེས་གཡུང་དྲུང་རྒྱལ་མཚན་ལགས། ས་གནས་འགོ་འཛིན་ལེགས་སྐྱེས་རྡོ་རྗེ་ལགས་བཅས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མལ་རྟེན་གསུམ་འདེགས་འབུལ་ཞུས་པ་ལྟར་སྐུ་མགྲོན་རྣམས་དང་ལས་བྱེད། སེར་སྐྱ་མི་མང་ཡོངས་ནས་སྐུ་པར་མཐོང་གྲོལ་རིན་པོ་ཆེར་མཇལ་ཁ་དང་མཇལ་དར་སྒྲོན་འབུལ་ཞུས། དེ་རྗེས་སྐུ་མགྲོན་གཙོ་བོ་མཆོག་དང་མཛད་སྒོར་ཕེབས་པའི་བོད་མི་མང་སྤྱི་འཐུས་བཅས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཆེད་བྱ་བྱིའུ་ཚེ་ཐར་བཏང་བ་དང་ཤིང་སྡོང་འདེབས་འཛུགས་གནང་རྗེས་བོད་སྒར་བསམ་ཡས་གླིང་བརྒྱ་འཐུས་ཡིག་ཚང་ནས་མཛད་སྒོར་ཕེབས་པ་རྣམས་ལ་གསོལ་ཇ་དང་འབྲས་སིལ་ཕུལ། དེ་ནས་ས་གནས་བོད་ཁྱིམ་ཉིན་མོའི་སློབ་གྲྭའི་སློབ་ཕྲུག་རྣམས་ནས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་དང་དྲུག་ཅུའི་དབྱངས་ལྡན་སོགས་བཏང་། དེ་རྗེས་ས་གནས་འགོ་འཛིན་ནས་སྐུ་མགྲོན་རྣམས་ལ་ཕེབས་བསུའི་འཚམས་འདྲི་དང་སྦྲགས་དུས་ཆེན་དང་འབྲེལ་བའི་གསུང་བཤད་གནང་། དེ་ནས་སྐུ་མགྲོན་གཙོ་བོ་མཆོག་གིས་བཀའ་ཤག་གི་གསུང་བཤད་སྒྲོགས་སྦྱང་དང་གསུང་བཤད་གནང་། དེ་རྗེས་བོད་མི་མང་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་ཡོོད། དེ་ནས་ལྡི་ལི་མངའ་སྡེའི་གྲོས་ཚོགས་འཐུས་མི་སྐུ་ཞབས་པར་ལཏ་སིངྒ་སཱ་ནི་དང་(SHO Timarpur) ལགས་ཀྱིས་དུས་སྟོན་དང་འབྲེལ་བའི་གསུང་བཤད་གནང་། དེ་རྗེས་ (NDTV Greenathon) ལས་རིམ་ཐོག་སྐུ་མགྲོན་གཙོ་བོ་མཆོག་དང་ལྡི་ལི་ཁུལ་དུ་གནས་སྡོད་བོད་རིགས་རྣམས་ནས་རྒྱ་གར་གྱི་གྲོང་གསེབ་སྐྱོ་པོ་ཞིག་ལ་ཁོར་ཡུག་དང་འབྲེལ་བའི་ལས་འགུལ་ནང་མཉམ་ཞུགས་ཀྱིས་མཐུན་འགྱུར་བྱེད་རྒྱུའི་དམ་བཅའ་བཞག དེ་རྗེས་བོད་ཁྱིམ་ཉིན་སློབ་ཀྱི་སློབ་ཕྲུག་རྣམས་ནས་གཞས་སྣ་འཁྲབ་སྟོན་གནང་རྗེས་ལྡི་ལི་བོད་སྒར་བསམ་ཡས་གླིང་གི་བརྒྱ་དཔོན་རྡོ་རྗེ་དོན་གྲུབ་ལགས་ཀྱིས་མཛད་སྒོར་ཕེབས་པའི་སྐུ་མགྲོན་རྣམ་པ་དང་མི་མང་ཡོངས་ལ་ཐུགས་རྗེ་ཆེ་ཞུའི་གསུང་བཤད་གནང་། དེ་ཉིན་ (ISBT Kashmere Gate) ཉེ་འགྲམ་དུ་ཡུལ་མི་འགྲུལ་བཞུད་པ་རྣམས་ལ་ཆབ་མངར་མོ་སྦྱིན་པ་གཏོང་བ་དང་། དེ་བཞིན་རམ་གྷར་དུ་སྲོག་བླུ་རྒྱ་ཆེ་བཏང་སྟེ་སྐུའི་འཁྲུངས་སྐར་དུས་ཆེན་དགའ་སྤྲོའི་རྣམ་པའི་ཁྲོད་དུ་གྲོལ། གཞན་ཡང་དེ་ཉིན་ལྡི་ལི་དོན་ཁང་ནས་བཀའ་ཕེབས་དོན་བཞིན་དགོང་མོ་ཆུ་ཚོད་ ༡༠ བར་ (India Habitat Centre Gulmohar) དུ་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ (Celebrating the Dalai Lama ) ཅེས་པའི་བརྗོད་གཞིའི་ཐོག་མཁས་པའི་གསུང་བཤད་ཀྱི་ལས་རིམ་ནང་ས་གནས་འགོ་འཛིན་ལས་ཁུངས་ཀྱི་ལས་བྱེད་པ་རྣམས་ཀྱིས་མཉམ་ཞུགས་བྱས་ཡོད་པ་བཅས།།
