༢༠༡༠ ཟླ་ ༧ ཚེས་ ༢༧ རེས་གཟའ་མིག་དམར།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ། ནག་ཆུ་རྫོང་ཁོངས་སུ་ཡོད་པའི་ཤག་རོང་པོ་དགོན་དུ་རྒྱ་ནག་གཞུང་ཕྱོགས་ནས་ད་ལོའི་ཕྱི་ཟླ་༤ པའི་ནང་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་ཤུགས་ཆེ་རུ་བཏང་བ་དང་འབྲེལ་རོང་པོ་ཆོས་རྗེའི་ཡང་སྲིད་བརྩད་གཅོད་ཀྱི་ཐོག་ལ་ཕྱི་ཕྱོགས་སུ་འབྲེལ་བ་བྱས་པར་དོགས་གཞི་བྱས་ཏེ་དགོན་པ་དེའི་བླ་མ་ཟླ་བ་རིན་པོ་ཆེ་མཁྱེན་རབ་དབང་ཕྱུག་བསམ་གཏན་བསྟན་པའི་རྒྱལ་མཚན་དཔལ་བཟང་པོ་མཆོག་དང་། དགོན་པའི་ལས་སྣེ་གྲྭ་དུང་ཕུག་དང་ངག་དབང་ཐོགས་མེད། མི་སྐྱ་བཀྲིས་དོན་གྲུབ་བཅས་ལྷ་ས་ནས་འཛིན་བཟུང་བྱས་པ་དེ་དག་རིམ་པས་གློད་བཀྲོལ་བཏང་ཡོད་ཀྱང་། ད་ལྟ་རང་ལོ་ ༣༥ སོན་པའི་དགོན་པའི་ལས་སྣེ་གྲས་གྲྭ་ངག་དབང་ཐོགས་མེད་ཀྱི་ཤག་ཏུ་༸གོང་ས་མཆོག་གི་སྐུ་པར་ཉར་བའི་ཉེས་མིང་འོག་དུས་བཀག་བཙོན་འཇུག་ལོ་གཉིས་ཀྱི་ཁྲིམས་ཆད་བཏང་འདུག དེ་མིན་སློབ་གསོའི་ལས་འགུལ་སྤེལ་རིང་༸གོང་ས་༸སྐྱབས་མགོན་ཆེན་པོ་མཆོག་ལ་དགག་རྒྱག་དང་། རོང་པོ་དགོན་པའི་བླ་མ་ཟླ་བ་རིན་པོ་ཆེ་ཏཱ་ལའི་བླ་མའི་རྗེས་འབྲངས་པ་ཡིན་པས་མཐའ་གཅིག་ཏུ་དགག་པ་རྒྱག་དགོས་པ། དེ་བཞིན་དགོན་པའི་ངོས་ནས་བླ་མ་ཟླ་བ་དང་འབྲེལ་བ་བྱས་མ་ཆོག་པ་དང་རྗེས་སུ་ཡང་སྲིད་ཀྱང་ངོས་འཛིན་བྱས་ཆོག་གི་མེད་ཟེར་བ་སོགས་ཚིག་བརྗོད་འདྲ་མིན་བེད་སྤྱོད་བཏང་སྟེ་སློབ་གསོའི་ལས་འགུལ་ཤུགས་ཆེ་སྤེལ་སྟབས་དགོན་པའི་དགེ་བསྐོས་བཀྲིས་བསྟན་བཟང་ལགས་དང་། གྲྭ་བྱམས་པ་ཟེར་བ་གཉིས་སེམས་ཁམས་མི་བདེ་བར་གྱུར་ཏེ་དགེ་བསྐོས་བཀྲིས་བསྟན་བཟང་ལགས་ལས་སྣེ་ཤོར་ནས་ཁྱིམ་དུ་སྡོད་དགོས་བྱུང་ཡོད། ཕྱོགས་མཚུངས་སློབ་གསོའི་ལས་འགུལ་སྤེལ་རིང་༸གོང་ས་མཆོག་ལ་མཚན་སྨད་ཞུ་བཅུག་པ་དང་། དགོན་པའི་བླ་མ་ཟླ་བ་རིན་པོ་ཆེ་བཙོན་དུ་བཅུག་པ་སོགས་ཚད་ལས་འདས་པའི་སེམས་སྡུག་གིས་མ་བཟོད་པར་ད་ལྟ་དགུང་ལོ་ ༧༠ ཙམ་དུ་སོན་པའི་དགེ་སློང་ངག་དབང་རྒྱ་མཚོ་ཞུ་བ་ཞིག་གིས་ཕྱི་ཟླ་ ༧ ཚེས་ ༢༠ ཉིན་ཡི་གེ་བཞག་སྟེ་རང་ཤི་བརྒྱབ་པའི་གནས་ཚུལ་ཐོན་པར་བརྟེན་རྒྱ་གཞུང་འབྲེལ་ཡོད་ལས་བྱེད་ནས་ཁོ་པ་ན་ནས་ཤི་བ་རེད་མ་གཏོགས་རང་ཤི་བརྒྱབ་པའི་སྐོར་སུས་ཀྱང་ཕྱིར་བཤད་མི་ཆོག་པའི་སྡིགས་ར་བསྐུལ་ཡོད་པ་མ་ཟད། ཁོང་ནས་བཞག་པའི་ཡི་གེ་དེ་དག་ཀྱང་རྒྱ་གཞུང་འབྲེལ་ཡོད་ལས་བྱེད་ནས་བཙན་འཁྱེར་བྱས་འདུག ཕྱི་ཟླ་ ༧ ཚེས་ ༡༧ ཉིན་དགོན་པའི་འགན་འཁུར་བྱེད་མཁན་གྲས་གྲྭ་ངག་དབང་བློ་བཟང་གི་གཙོས་དགེ་འདུན་པ་བཅུ་བདུན་གྱིས་༸གོང་ས་མཆོག་དང་བླ་མ་ཟླ་བ་གཉིས་ལ་དགག་པ་རྒྱག་འདོད་མེད་པ་དང་། དགོན་པ་དང་བླ་མའི་དབར་འབྲེལ་བ་བྱ་བཅུག་དགོས་པའི་རྒྱུ་མཚན་དྲངས་ཀྱང་ཁས་ལེན་མ་བྱས་པར་བརྟེན་འུ་ཐུག་ཐབས་ཟད་ཀྱིས་དགོན་པ་ནས་ཕྱིར་འདོན་དགོས་བྱུང་འདུག་ཀྱང་།བདུན་ཕྲག་རེ་རེའི་མཚམས་ཤང་སྲིད་གཞུང་དུ་ཐེངས་རེ་ཡོང་དགོས་པ་དང་། ལོ་གཉིས་རིང་ས་ཆ་འདྲ་མིན་ལ་འགྲོ་མི་ཆོག་པའི་བཀའ་རྒྱ་བཏང་ཡོད་འདུག དེ་བཞིན་ཟླ་ ༧ ཚེས་ ༢༡ ཉིན་དགོན་པར་༸གོང་ས་མཆོག་ལ་དགག་རྒྱག་གི་སློབ་གསོའི་ལས་འགུལ་སྤེལ་སྐབས་་གྲྭ་མཁྱེན་རབ་ནོར་བུ་ཞུ་བ་ཞིག་ནས་དགོན་པ་དང་བླ་མའི་དབར་འབྲེལ་བ་བྱེད་མ་ཆོག་ན་དགོན་པར་བསྡད་ཀྱང་ཅི་ཕན། དེ་ལས་ལྡེ་མིག་ཁྱེད་ཚོས་བདག་པོ་རྒྱོབ་ཟེར་ནས་དགོན་པའི་འདུ་ཁང་གི་ལྡེ་མིག་ཕྱིར་འཕངས་ཏེ་ཚོགས་ཐོག་ནས་ལངས་ཏེ་ཕྱིན་པར་བརྟེན་འཛིན་བཟུང་བྱས་ཏེ་ད་ལྟ་གློད་བཀྲོལ་བཏང་མེད་པ་དང་། དེ་མིན་སྐབས་དེར་དགེ་འདུན་པ་ངག་དབང་ནོར་བུ་ཞུ་བ་ཞིག་ནས་ལས་བྱེད་ལ་འབུད་རྒྱག་བཏང་བར་བསྙད་ནས་འཛིན་བཟུང་བྱས་ཀྱང་གློད་བཀྲོལ་བཏང་ཟིན་འདུག་པ་བཅས་གང་ལྟར་རོང་པོ་དགོན་དུ་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་ཤུགས་ཆེ་རུ་བཏང་སྟེ་གང་བྱུང་འཛིན་བཟུང་དང་། རྒྱུན་གཏན་ཆོས་སྤྱོད་སློབ་གཉེར་གྱི་གོ་སྐབས་མེད་པར་མི་འདོད་བཞིན་དུ་རྩ་བའི་བླ་མར་སྐུར་འདེབས་བྱེད་བཅུག་པ་སོགས་ལ་བརྟེན་དགོན་པའི་ནང་དགེ་འདུན་པ་རང་ཤི་རྒྱག་དགོས་བྱུང་བའི་ཡིད་སྐྱོའི་གནས་ཚུལ་མུ་མཐུད་འཐོན་བཞིན་པ་དེས་རྒྱ་ནག་གཞུང་གིས་བོད་ཀྱི་དགོན་སྡེ་ཁག་ནང་དྲག་ཤུགས་དང་བཙན་ཤུགས་ཀྱི་ཐོག་ནས་སློབ་གསོའི་ལས་འགུལ་སྤེལ་ཏེ་མི་སེམས་བསླུ་ཐབས་བྱེད་བཞིན་པར་གྲུབ་འབྲས་གང་ཡང་ཡོང་རྒྱུ་མིན་པའི་དོན་དངོས་ཀྱི་གནས་ཚུལ་གསལ་བཤད་ཐུབ་པ་བྱུང་ཡོད།།
