ཕྱི་ལོ་ ༢༠༡༠ ཟླ་ ༧ ཚེས་ ༣༠ རེས་གཟའ་པ་སངས།
༄༅། ཕྱི་ལོ་ ༢༠༡༠ ཟླ་ ༧ ཚེས་ ༢༨ ཉིན་བཞུགས་སྒར་བོད་ཀྱི་དཔེ་མཛོད་ཚོགས་ཁང་དུ་ནོར་བེ་བོད་ཀྱི་རླུང་འཕྲིན་ཁང་གིས་གོ་སྒྲིག་ཐོག་བོད་མིའི་མང་གཙོའི་འཕེལ་རིམ་དང་བཀའ་སྤྱིའི་འོས་བསྡུའི་གལ་གནད་སྐོར་བགྲོ་གླེང་ཞིག་སྐོང་ཚོགས་གནང་ཡོད།དེ་ཉིན་ཕྱི་དྲོ་ཆུ་ཚོད་ ༥།༣༠ ཐོག་བཀའ་ཁྲི་ཟམ་གདོང་རིན་པོ་ཆེ་མཆོག་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག གཞུང་ཞབས་འདེམས་བསྐོ་ལྷན་ཁང་དང་དབུས་འོས་བསྡུའི་འགན་འཛིན་གཅིག་ལྕོགས་འཇམ་དཔལ་ཆོས་བཟང་མཆོག་གི་དབུས་པའི་བོད་མི་མང་སྤྱི་འཐུས་དང་གཞོན་ནུ་བུད་མེད་སློབ་ཕྲུག དེ་བཞིན་ཉེ་འཁོར་གྱི་དོ་སྣང་ཅན་གྱི་གཞོན་སྐྱེས་འགའ་བཅས་མི་གྲངས་ ༧༠ བརྒལ་བ་ལྷན་འཛོམས་ཐོག་ནོར་བེ་རླུང་འཕྲིན་ཁང་གི་ལས་བྱེད་པ་སངས་དོན་ལྡན་ལགས་ཀྱིས་བགྲོ་གླེང་གཙོ་སྐྱོང་ངོ་སྤྲོད་གནང་གྲུབ་མཚམས་བཀའ་ཁྲི་མཆོག་དང་། ཚོགས་གཙོ་མཆོག དབུས་འོས་བསྡུའི་འགན་འཛིན་མཆོག་ཁག་སོ་སོར་བཀའ་ཁྲི་དང་། སྤྱི་འཐུས་ཇི་ཙམ་གྱི་གལ་གནད་དང་། བཀའ་སྤྱིའི་འོས་གཞིར་རྩ་ཁྲིམས་ལྟར་འོས་ཆོས་ཇི་དགོས་སོགས་ཀྱི་དྲི་བ་དྲི་ལན་གནང་བ་མ་ཟད། མང་ཚོགས་ཀྱི་བསམ་ཚུལ་དང་དྲི་བ་ཁག་ལའང་ལན་འདེབས་ལྷུག་པོ་གནང་རྗེས་བགྲོ་གླེང་མཛད་གཙོ་རྣམ་པ་གསུམ་གྱིས་མཇུག་སྡོམ་གསུང་བཤད་རེ་གནང་བའི་སྙིང་དོན་ཐོག་མར་དབུས་འོས་བསྡུའི་འགན་འཛིན་འཇམ་དཔལ་ཆོས་བཟང་མཆོག་གིས་གསུང་དོན། མང་ཚོགས་ཀྱི་ངོས་ནས་བཀའ་ཁྲི་འདེམས་བསྐོ་གལ་ཆེན་བརྩིས་པ་ལྟར་སྤྱི་འཐུས་མཁྱེན་ཡོན་ལྡན་པ་ངེས་པར་དུ་སླེབས་ཐུབ་པའི་འབོད་སྐུལ་ཞུ་གི་ཡོད། ཅེས་དང་། དེ་བཞིན་བཀའ་ཁྲི་མཆོག་གིས་གསུང་དོན། འོས་བསྡུའི་ལས་རིམ་དེ་མི་གཞན་གྱི་གནོན་ཤུགས་དང་རྒྱུད་སྐུལ་མ་ཡིན་པར་སོ་སོའི་བསམ་བློ་བཏང་ནས་ཐག་གཅོད་གནང་ཐུབ་པའི་རེ་སྐུལ་ཞུ་གི་ཡོད། ཅེས་དང་། སྤྱི་འཐུས་ཚོགས་གཙོ་མཆོག་གི་གསུང་དོན། སྤྱི་ཚོགས་ནང་འོས་བསྡུའི་ཐད་བགྲོ་གླེང་མང་པོ་ཡོང་གི་ཡོད། སོ་སོ་རང་གི་སུ་ལ་འོས་བླུགས་རྒྱུའི་མི་དེའི་ལོ་རྒྱུས་ཤེས་པའི་ཐོག་མི་རེ་ངོ་རེ་ནས་མི་འདི་བླུགས་བསམ་པའི་ངེས་ཤེས་རྙེད་པ་དགོས་ཀྱི་འདུག ཅེས་སོགས་ཀྱི་གསུང་བཤད་གྲུབ་བསྟུན་གཙོ་སྐྱོང་བས་ཐུགས་རྗེ་ཆེ་ཞུས་ཏེ་བགྲོ་གླེང་ཚོགས་འདུ་གྲོལ། ནོར་བེ་བོད་ཀྱི་རླུང་འཕྲིན་ཁང་གི་བོད་མིའི་མང་གཙོའི་སྐོར་ལ་ལས་འགུལ་སྤེལ་བ་འདི་ཉིན་ཤས་རྗེས་འོད་སྡེར་ཐོག་འགྲེམས་སྤེལ་གནང་འཆར་ཡོད་འདུག་པ་བཅས།
