༢༠༡༠ ཟླ་ ༧ ཚེས་ ༢༣ རེས་གཟའ་པ་སངས།
༄༅། །འདི་གར་ཕྱི་དྲིལ་འགྲེམས་སྟོན་ཚན་པའི་ལས་བྱེད་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༠༧ ཚེས་ ༠༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་དུས་སྟོན་དང་སྟབས་བསྟུན་གྱིས་བོད་གཞུང་ཕྱི་དྲིལ་ལས་ཁུངས་ཀྱི་འགྲེམས་སྟོན་ཚན་པས་རྒྱ་གར་དབུས་ཨོ་རི་ས་ཕུན་ཚོགས་གླིང་གཞིས་ཆགས་སུ་ཟླ་ ༠༧ ཚེས་ ༠༦ ནས་ ༠༨ བར་ཉིན་གསུམ་རིང་སྐོར་སྐྱོད་འགྲེམས་སྟོན་གོ་སྒྲིག་ཞུས་ཐོག བོད་མི་རྣམས་རྒྱ་གར་དུ་བཙན་བྱོལ་ལ་འབྱོར་ཏེ་མི་ལོ་ ༥༠ རིང་བོད་མིའི་སྤྱི་ཚོགས་ཀྱི་འཕེལ་རིམ་དང་། ཕ་ཡུལ་ཕྱོགས་ལ་རྒྱང་བལྟ་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་གོ་སྒྲིག་ཞུས་ཡོད། ཉིན་ཐོག་མའི་སྔ་དྲོ་ཚོུད་ ༧།༣༠ ཐོག་དགོན་སྡེ་ཁག་གི་བླ་སྤྲུལ་དགེ་འདུན་རྣམ་པ་དང་། ཨོ་རི་ས་ཕུན་ཚོགས་གླིང་ས་གནས་གྲོས་ཚོགས་ཀྱི་ཚོགས་གཙོ། ས་གནས་འགོ་འཛིན། རང་བདེན་ཚོགས་ཆུང་། སློབ་གྲྭའི་སློབ་སྤྱིའི་སྐུ་ཚབ། རྒྱ་བོད་འཕྲོད་བསྟེན་སྨན་ཁང་གི་འགན་འཛིན། གཞིས་གྲོང་གི་སྤྱི་མི། མཉམ་འབྲེལ་ཚོགས་གཙོ། སློབ་ཕྲུག མང་ཚོགས་བཅས་ཀྱིས་རང་ལུགས་གཟབ་མཆོར་ལེགས་པར་གྱོན་ནས་རྟེན་མཁར་དུ་འདུ་འཛོམས་ཐོག་དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་བསངས་གསོལ་གཟབ་རྒྱས་ཞུས། དེ་ནས་ས་གནས་འགོ་འཛིན་ལས་ཁུངས་ནས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་དུང་རྒྱ་སྤོས་སྣེ་དང་བཅས་ཏེ་བཞུགས་ཁྲིར་གདན་འདྲེན་ཞུས་མཚམས་འཕགས་བོད་གཉིས་ཀྱི་རྒྱལ་གླུ་དང་སྐུའི་འཁྲུངས་སྐར་གྱི་བསྟོད་དབྱངས་རྔ་རོལ་དང་བཅས་ཕུལ། དེ་རྗེས་ས་གནས་གྲོས་ཚོགས་ཀྱི་ཚོགས་གཙོ་དང་ས་གནས་འགོ་འཛིན་རྣམ་གཉིས་ཀྱིས་རྒྱལ་བའི་སྐུ་པར་མཐོང་གྲོལ་རིན་པོ་ཆེར་མལ་རྟེན་གསུམ་འདེགས་འབུལ་ཞུས་མཚམས་རིམ་བཞིན་སྐུ་མགྲོན་དང་། ལས་བྱེད། མང་ཚོགས་བཅས་ནས་མཇལ་ཁ་དང་གུས་ཕྱག་ཕུལ་རྗེས་རྟེན་འབྲེལ་མཚོན་ཆེད་གསོལ་ཇ་དང་འབྲས་སིལ་ཕུལ་ཏེ་ས་གནས་འགོ་འཛིན་དང་ས་གནས་གྲོས་ཚོགས་ཀྱི་ཚོགས་གཙོ་རྣམ་གཉིས་ནས་བཀའ་སྤྱིའི་གསུང་བཤད་སྒྲོགས་སྱང་གནང་། དེ་རྗེས་ཕྱི་དྲིལ་འགྲེམས་སྟོན་འབྲེལ་ཡོད་ལས་བྱེད་བསྟན་འཛིན་རབ་དགའ་ལགས་ནས་པར་རིས་འགྲེམས་སྟོན་ལས་གཞིའི་སྐོར་མང་ཚོགས་ལ་གསལ་བཤད་ཞུས། དེ་ནས་ས་གནས་གྲོས་ཚོགས་ཀྱི་ཚོགས་གཙོ་དང་ས་གནས་འགོ་འཛིན་རྣམ་གཉིས་ནས་པར་རིས་འགྲེམས་སྟོན་དབུ་འབྱེད་གནང་མཚམས་རིམ་བཞིན་སྐུ་མགྲོན་དང་། ལས་བྱེད། མང་ཚོགས་བཅས་ནས་པར་རིས་ཁག་ལ་ལྟ་ཞིབ་གནང་སྐབས་གསལ་བཤད་དགོས་རིགས་རྣམས་ལ་འབྲེལ་ཡོད་ལས་བྱེད་ཀྱིས་གསལ་བཤད་འཐུས་གཙང་ཞུས་པ་དང་ཆབས་ཅིག གཞུང་འབྲེལ་དུས་དེབ། གསར་ཤོག་བཅས་རིན་མེད་ཐོག་འགྲེམས་སྤེལ་དང་ལེགས་སྤེལ་ཉེས་འགོག་གི་དགོངས་འཆར་རྣམས་བསམ་ཚུལ་ཐོ་དེབ་ནང་བཀོད་ཡོད། དེ་རྗེས་ཨོ་རི་ས་གཞིས་ཆགས་ཀྱི་ལྷ་མོའི་ཚོགས་པས་རྟེན་འབྲེལ་མཚོན་ཆེད་བཀྲ་ཤིས་ཞོལ་པ་དང་གཞན་ཡང་རིག་གཞུང་འཁྲབ་སྟོན་ཁག ལག་རྩེད་སྤོ་ལོའི་འགྲན་བསྡུར་སོགས་གོ་སྒྲིག་ཞུས་ཡོད། དགོང་དྲོ་གཞིས་གྲོང་རེ་མོས་ཀྱིས་བོད་དོན་དང་འབྲེལ་བའི་གློག་བརྙན་སྟོན་སྐབས་བོད་གཞུང་ཕྱི་དྲིལ་ལས་ཁུངས་དང་བོད་ཀྱི་འགྲེམས་སྟོན་ཁང་སྐོར་མང་ཚོགས་ལ་ (Powerpoint Presentation) བརྒྱུད་གསལ་བཤད་ཞུས། དེ་ནས་ཉིན་གཉིས་པར་ཨོ་རི་ས་གཞིས་ཆགས་ཀྱི་ལྷ་མོའི་ཚོགས་པས་འགྲོ་བ་བཟང་མོའི་ལྷ་གཞུང་འཁྲབ་སྟོན་སྐབས་པར་རིས་མུ་མཐུད་འགྲེམས་སྟོན་ཞུས་པ་བཅས་འཁྲུངས་སྐར་དུས་སྟོན་གཉིས་ཀྱི་མཛད་སྒོར་མང་ཚོགས་རྣམས་དགའ་བདེའི་དཔལ་ལ་རོལ་བ་དང་ཆབས་ཅིག ༸གོང་ས་མཆོག་གི་མཛད་འཕྲིན་དང་། བཙན་བྱོལ་བོད་མིའི་སྤྱི་ཚོགས་ཀྱི་འཕེལ་རིམ། བོད་གཞུང་ཕྱི་དྲིལ་ལས་ཁུངས་བཅས་ཀྱི་སྐོར་རྒྱ་མི་ཆུང་བ་ཞིག་ཤེས་རྟོགས་ཐུབ་པའི་དགེ་མཚན་བྱུང་ཡོད་པ་བཅས།།
