༢༠༡༠ ཟླ་ ༧ ཚེས་ ༩ རེས་གཟའ་པ་སངས།
༄༅། །འདི་གར་འགྲེམས་སྟོན་ལས་བྱེད་ཀྱིས་སྦན་རྡ་ར་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༠༧ ཚེས་ ༠༢ དང་ཚེས་ ༠༣ ཉིན་སོ་སོར་བོད་གཞུང་ཕྱི་དྲིལ་ལས་ཁུངས་ཀྱི་འགྲེམས་སྟོན་ཚན་པའི་ལས་བྱེད་གསུམ་ནས་རྒྱ་གར་དབུས་སྦན་རྡ་ར་ནོར་རྒྱས་གླིང་དུ་ཆེད་བཅར་གྱིས་བཙན་བྱོལ་བོད་མི་རྣམས་རྒྱ་གར་དུ་བཙན་བྱོལ་ལ་འབྱོར་ཏེ་མི་ལོ་ ༥༠ རིང་བོད་མིའི་སྤྱི་ཚོགས་ཀྱི་འཕེལ་རིམ་དང་། ཕ་ཡུལ་ཕྱོགས་ལ་རྒྱང་བལྟ་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་གོ་སྒྲིག་ཞུས་ཡོད། སྦན་རྡ་ར་ས་གནས་འགོ་འཛིན་གྱིས་ལམ་སྟོན་ལྟར་གཞིས་གྲོང་ཁག་གཉིས་ལ་ལས་རིམ་གོ་སྒྲིག་ཞུ་སྐབས་སྦན་རྡ་ར་ནོར་རྒྱས་གླིང་ས་གནས་གྲོས་ཚོགས་ཀྱི་ཚོགས་གཙོ་དང་། ས་གནས་འགོ་འཛིན། རང་བདེན་ཚོགས་ཆུང་། གཞིས་གྲོང་གིསྤྱི་མི་རྣམ་པ། སློབ་གྲྭའི་སྐུ་ཚབ། སློབ་ཕྲུག མང་ཚོགས་བཅས་གཞིས་གྲོང་གཉིས་ནས་ཁྱོན་བསྡོམས་མི་གྲངས་ ༦༠༠ ལྷག་
ཙམ་འདུ་འཛོམས་བྱུང་ཡོད། དེ་ཡང་ཐོག་མར་འགྲེམས་སྟོན་འབྲེལ་ལས་སྤེན་པ་ཚེ་རིང་ལགས་ནས་སྐོར་བསྐྱོད་འགྲེམས་སྟོན་སྐོར་ངོ་སྤྲོད་གནང་ཡོད། དེ་ནས་སྦན་རྡ་ར་ནོར་རྒྱས་གླིང་གི་ས་གནས་འགོ་འཛིན་བཟང་པོ་ལགས་ཀྱིས་སྐོར་བསྐྱོད་དུ་ཕེབས་པའི་འགྲེམས་སྟོན་ཚན་པའི་ལས་བྱེད་རྣམས་གཞིས་ཆགས་སུ་ཕེབས་དགོས་པའི་རྒྱུ་མཚན་སོགས་ངོ་སྤྲོད་གནང་། དེ་རྗེས་སྐོར་བསྐྱོད་འགྲེམས་སྟོན་གྱི་འགན་འཁུར་བ་བཀྲ་ཤིས་ཕུན་ཚོགས་ལགས་ཀྱིས་བོད་གཞུང་ཕྱི་དྲིལ་ལས་ཁུངས་དང་། བོད་ཀྱི་འགྲེམས་སྟོན་ཚན་པའི་སྐོར་ཀམ་པུ་ཊར་(Powerpoint Presentation)བརྒྱུད་ནས་ངོ་སྤྲོད་ཟབ་རྒྱས་གནང་། དེ་ནས་འགྲེམས་སྟོན་འབྲེལ་ལས་བསྟན་འཛིན་རབ་དགའ་ལགས་ནས་འགོ་ལས་མི་མང་ཡོངས་ནས་མཐུན་འགྱུར་རོགས་རམ་གནང་བ་དང་། པར་རིས་ཀྱི་ལས་རིམ་ནང་མཉམ་ཞུགས་གནང་བར་ཐུགས་རྗེ་ཆེ་ཞུའི་གསུང་བཤད་གནང་གྲུབ་མཚམས་ས་གནས་གྲོས་ཚོགས་ཀྱི་ཚོགས་གཙོ་དང་། ས་གནས་འགོ་འཛིན། རྒས་གསོ་ཁང་གི་འགན་འཛིན་བཅས་ནས་པར་རིས་དབུ་འབྱེད་གནང་། དེ་ནས་རིམ་བཞིན་སྐུ་མགྲོན། སློབ་ཕྲུག་མི་མང་ཡོངས་ནས་པར་རིས་འགྲེམས་སྟོན་ཁག་ལ་ལྟ་ཞིབ་གནང་བ་དང་། དྲི་བ་གནང་བ་རྣམས་ལ་ལན་འདེབས་གསལ་བཤད་ཞུས་པ་མ་ཟད། གཞུང་འབྲེལ་འགྲེམས་སྤེལ་ཞུ་དགོས་གསར་ཤོག་དང་དུས་དེབ་རྣམས་མང་ཚོགས་ལ་བགོས་འགྲེམས་ཞུས། པར་རིས་ཁག་ལ་ལྟ་ཞིབ་གནང་ནས་བསམ་ཚུལ་རྣམས་དགོངསའཆར་ཐོ་དེབ་ནང་བཀོད་ཡོད། དེ་ཉིན་དགོང་དྲོ་ཆུ་ཚོད་ ༠༦།༠༠ ཐོག་བོད་དོན་དང་འབྲེལ་བའི་གློག་བརྙན་བསྟན་ཡོད་པ་དང་འབྲེལ་བཙན་བྱོལ་བོད་གཞུང་གི་སྒྲོམ་གཞི་དང་། བཙན་བྱོལ་ནང་ཕེབས་རྗེས་ཀྱི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར། ཡང་སྒོས་བཙན་བྱོལ་བོད་གཞུང་འདི་དག་མང་གཙོ་ཚད་ལྡན་ཞིག་ཏུ་འཛུགས་བསྐྲུན། ཤེས་ཡོན་བསྟི་གནས་སློབ་གྲྭ་ཁག་གི་བྱུང་རིམ། ཆོས་སྡེ་ཁག་སླར་གསོ་གནང་རྒྱུར་དགོན་པ་གསར་རྒྱག་ལ་སོགས་པའི་པར་རིས་འགྲེམས་སྟོན་བརྒྱུད་མང་ཚོགས་རྣམས་ལ་གསལ་བཤད་འཐུས་ཚང་ཞུས་ཐུབ་པར་མང་ཚོགས་ནས་ཀྱང་མངགས་བརྗོད་རྒྱ་གང་ཆེ་གནང་ཡོད་པ་བཅས།།
