༢༠༡༠ ཟླ་ ༧ ཚེས་ ༡༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བདུན་ཅུ་དོན་ལྔར་ཕེབས་པའི་སྐུའི་འཁྲུངས་སྐར་སྲུང་བརྩིའི་དུས་ཆེན་མཛད་སྒོའི་ཐོག་བལ་ཡུལ་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ་མཆོག་གི་གསུང་བཤད་གནང་དོན། བལ་ཡུལ་ནང་དེང་སྐབས་ཆབ་སྲིད་བརྟན་ལྷིང་མེད་སྟབས། བལ་ཡུལ་མི་མང་ལ་དཀའ་ངལ་གཅིག་མཇུག་གཉིས་མཐུད་འཕྲད་བཞིན་ཡོད་པའི་དུས་སྐབས་འདིར་འཛམ་གླིང་ཞི་བདེའི་དེད་དཔོན་དང་བོད་མིའི་༸སྐྱབས་མགོན་ཏཱ་ལའི་བླ་མ་མཆོག སྟོན་པ་སྐུ་བལྟམས་པའི་གནས་བལ་ཡུལ་གྱི་གནས་མཆོག་ལུ་བི་ནིར་ཆིབས་སྒྱུར་བསྐྱང་སྟེ་བལ་ཡུལ་མི་མང་ལ་ཞི་བདེ་དང་བདེ་སྐྱིད་ཡོང་སླད་ཐུགས་སྨོན་སྐྱབས་འཇུག་དང་བླང་དོར་གྱི་བཀའ་སློབ་སྩལ་རྒྱུའི་འབོད་སྐུལ་ཞུ་རྒྱུ་ཡིན། ༸གོང་ས་ཏཱ་ལའི་བླ་མ་མཆོག་བལ་ཡུལ་གྱི་མི་མང་ཆེད་གནས་མཆོག་ལུ་བི་ནིར་ཆིབས་སྒྱུར་བསྐྱང་རྒྱུར་བལ་ཡུལ་གཞུང་ནས་ཁོར་ཡུག་བསྐྲུན་དགོས། བོད་ཀྱི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ནི་དེང་སྐབས་འཛམ་གླིང་འདིའི་སྟེང་ཞི་བདེའི་ལྟ་སྤྱོད་ཁྱབ་སྤེལ་དང་ཉམས་ལེན་གནང་མཁན་ཁོང་ལས་ལྷག་པ་ཞིག་མེད། བལ་ཡུལ་མི་མང་ནི་ཞི་བདེ་དང་མང་གཙོ། འགྲོ་བ་མིའི་ཐོབ་ཐང་བཅས་ལ་གདུང་ཞེན་ཆེ་བས་བལ་ཡུལ་མི་མང་ནས་༸གོང་ས་ཏཱ་ལའི་བླ་མ་མཆོག་བལ་ཡུལ་ནང་༸ཞབས་སོར་འཁོད་རྒྱུའི་རེ་སྒུག་ཞུ་བཞིན་ཡོད། ཅེས་དང་ད་དུང་ཁོང་གིས། རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་དང་དོན་འབྲས་སོན་པའི་གྲོས་མོལ་གྱི་ལམ་ནས་བོད་ཀྱི་དཀའ་ངལ་སེལ་རྒྱུར་བལ་ཡུལ་མི་མང་གི་ཚབ་ཞུས་ཏེ་འབོད་སྐུལ་ཞུ་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད།།
