༢༠༡༠ ཟླ་ ༧ ཚེས་ ༢༡ རེས་གཟའ་ལྷག་པ།
༄༅། ཕྱི་ལོ་ ༢༠༡༠ ཟླ་ ༧ ཚེས་ ༢༠ ཉིན་གྱི་ཕྱི་དྲོ་ཆུ་ཚོད་ ༢།༣༠ ཐོག་བཙན་བྱོལ་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གཙོ་བཞུགས་ཐོག་དྲུང་ཆེ་རྣམ་གཉིས་དང་། དྲུང་འཕར། དེ་བཞིན་ལྷན་ཁང་དང་ལས་ཁུངས་ཁག་གི་མགྲིན་ཚབ་པ། ཕྱི་དྲིལ་ལས་ཁུངས་ཀྱི་གསར་འགྱུར་རྒྱུད་ལམ་ཁག་གི་འབྲེལ་ཡོད་ལས་བྱེད་བཅས་མི་གྲངས་ ༢༠ བརྒལ་བ་ལྷན་འཛོམས་གནང་སྟེ་ཐོག་མར་ཕྱི་དྲིལ་བཀའ་བློན་མཆོག་ནས་ལམ་སྟོན་བཀའ་སློབ་ཁ་གསལ་གནང་ཡོད། དེ་རྗེས་ཕྱི་དྲིལ་དྲུང་ཆེས་ལམ་སྟོན་གསུང་བཤད་གནང་རྗེས་མགྲིན་ཚབ་པ་རྣམས་དང་ལྷན་དུ་འབྱུང་འགྱུར་ལས་ཁུངས་སོ་སོ་ནས་གནས་ཚུལ་མཁོ་སྤྲོད་གནང་ཕྱོགས་ཐད་ཕན་ཚུལ་བསམ་ཚུལ་བརྗེ་ལེན་གནང་ཡོད་པའི་ནང་གཙོ་བོ་མ་འོངས་པར་མགྲིན་ཚབ་རྣམ་པའི་ལས་འགན་གང་དང་གང་ཡིན་ཡིག་ཐོག་གནང་ཐུབ་ཚེ་དགེ་མཚན་ཆེ་སྐོར་དང་། དེ་བཞིན་གསར་འགྱུར་མཁོ་སྤྲོད་གནང་ཕྱོགས་ཐད་ཟབ་སྦྱོང་གནང་ཐུབ་ཚེ་ཁེ་ཕན་ཆེ་བ་ཡོང་རྒྱུ་སོགས་ཀྱི་བསམ་ཚུལ་བསྡུ་ལེན་ཡང་གནང་ཡོད་པ་བཅས་ཀྱི་གནས་བསྡུས་སུ།
