༢༠༡༠ ཟླ་ ༧ ཚེས་ ༡༢ རེས་གཟའ་ཟླ་བ།

༄༅། འདི་གར་ནཱ་སིག་བོད་མི་བདེ་དོན་མཐུན་ཚོགས་དང་ས་གནས་གཞོན་ནུ་ཐུན་མོང་གིས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༧ ཚེས་ ༦ ཉིན་ནཱ་སིག་བོད་མི་བདེ་དོན་མཐུན་ཚོགས་དང་ས་གནས་གཞོན་ནུ་ཐུན་མོང་གིས་གོ་སྒྲིག་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད། དེ་ཡང་སྔ་དྲོ་ཆུ་ཚོད་ ༨ ཐོག་མི་མང་རྣམས་ཀྱིས་གནས་ས་སྤན་གྲོ་གླིང་རི་རྩེར་སྐུ་རླུང་དར་འཛུགས་དང་བསངས་གསོལ་གནང་ཡོད། དེ་ནས་ཆུ་ཚོད་ ༩ ཐོག་ཁྲོམ་རྭའི་མདུན་ཐང་དུ་མི་མང་འདུ་འཛོམས་ཀྱིས་༸གོང་ས་༸སྐྱབས་མགོན་རིན་པོ་ཆེ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་ཁ་དང་མཇལ་དར་བསྒྲོན། དེ་རྗེས་ཆུ་ཚོད་ ༡༠།༣༥ ཐོག་སྐུ་མགྲོན་གཙོ་བོ་ནཱ་སིག་གྲོང་སྡེ་ལས་ཁུངས་ཀྱི་སྤྱི་ཁྱབ་ལྕམ་སྐུ་ན་ཡ་ན་གྷོ་ལབ་ཝལ་ཛ་ཌེ་(Nayana Gholap Walzade) ལགས་ཀྱིས་མཆོད་མེ་ཞལ་ཕྱེ་གནང་། དེ་བཞིན་དམིགས་བསལ་སྐུ་མགྲོན་དུ་ནཱ་སིག་གྲོང་སྡེ་ལས་ཁུངས་ཀྱི་རྒྱུན་ལས་ཚོགས་གཙོ་སྐུ་ཞབས་སན་ཇེ་ས་བྷ་ལེ (Sanjay Sabale ) ལགས་ཀྱིས་སྐུའི་འཁྲུངས་སྐར་དགའ་སྟོན་གྱི་སྒོ་ང་བག་ལེབ་གཏུབས་པ་དང་འབྲེལ་མགོན་པོ་གང་ཉིད་མཆོག་གིས་དཔོན་རིགས་ཁག་དང་ལྷན་མཇལ་འཕྲད་མཛད་པའི་སྐུ་པར་སོགས་མང་ཚོགས་སུ་རྒྱ་མི་ཆུང་བ་འགྲེམས་སྟོན་ཞུས་ཡོད། དེ་བཞིན་ས་གནས་ཀྱི་རྒྱ་གར་དཔོན་རིགས་མང་དག་ཅིག་གིས་མཛད་སྒོའི་ནང་མཉམ་ཞུགས་གནང་ཡོད། དེ་ཉིན་སྐུ་མགྲོན་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་དང་། བོད་མིའི་བདེན་མཐའ་མྱུར་དུ་གསལ་བའི་སྨོན་ལམ་ཡོད་ཅེས་གསུང་བཤད་གཟབ་རྒྱས་གནང་ཡོད། དེ་ནས་སྐུ་མགྲོན་དང་། མི་མང་རྣམས་ལ་གསོལ་ཇ་དང་། འབྲས་སིལ། ཟས་མངར་སོགས་ཕུལ་ཏེ་མཛད་སྒོ་རྒྱས་ཁའི་ངང་གྲོལ་ཡོད་པ་བཅས།།