༢༠༡༠ ཕྱི་ཟླ་ ༧ ཚེས་ ༢ རེས་གཟའ་པ་སངས།

ལྕམ་སོ་ན་ལི་ཇོ་ཤི།

༄༅། །ཕྱི་ལོ་ ༢༠༡༠ ཟླ་ ༧ ཚེས་ ༡ ཉིན་དབྱིན་ཇིའི་རྒྱལ་ས་ལོན་ཌོན་ནང་བོད་ཀྱི་གློག་བརྙན་དུས་སྟོན་འགོ་འཛུགས་བྱས་ཡོད། དུས་སྟོན་དེའི་རིང་བོད་ཀྱི་སྒྱུ་རྩལ་དང་ལེགས་བྱང་སོགས་ཀྱི་ཐོག་བཟོས་པའི་གློག་བརྙན་དྲག་གྲས་ཁག་འདེམས་སྒྲུག་གིསསྟོན་རྒྱུའི་འཆར་གཞི་ཡོད་འདུག དུས་སྟོན་དེ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་དང་སྟབས་བསྟུན་ཏེ་གོ་སྒྲིག་ཞུ་བཞིན་ཡོད་འདུག དུས་སྟོན་དེས་དམིགས་རྒྱུའི་གནད་དོན་གཙོ་བོ་གཉིས་ཡོད་པ་ནི། བོད་ཀྱི་ཁོར་ཡུག་དང་གླུ་གཞས་བཅས་ཀྱི་གནད་དོན་ཐོག་དོ་སྣང་ཡོང་བ་ཞིག་བྱེད་རྒྱུ་ཡིན་པ་མ་ཟད། བོད་མི་གཞོན་སྐྱེས་དང་རྒྱ་གར་བ་གཞོན་སྐྱེས་ཁག་གཅིག་གིས་བཟོས་པའི་གློག་བརྙན་སྟོན་རྒྱུ་ཡིན་པ་དང་། དེ་བཞིན་སྐབས་དེར། འཛམ་གླིང་གི་སྣེ་གསུམ་པ། ཞེས་པར་རིས་འགྲེམས་སྟོན་ཞིག་གོ་སྒྲིག་ཐོག་བོད་ནང་གནམ་གཤིས་འགྱུར་ལྡོག་དང་ཆུའི་གནད་དོན་སྐོར་གྱི་གོ་རྟོགས་སྤེལ་རྒྱུ་དང་། ཕྱོགས་མཚུངས་ཕྱི་ཚེས་ ༩ ཉིན་རང་དབང་། དད་དམ། དྲང་བདེན་ཞེས་པའི་བརྗོད་གཞིའི་ཐོག་སྙན་རྩོམ་གྱི་ཚོགས་འདུ་ཞིག་ཀྱང་ཚོགས་འཆར་ཡོད་འདུག དེ་བཞིན། ངའི་མིང་པལྨ་ཡིན། སྤྲིན་རྒྱབ་ཀྱི་ཉི་མ། བོད་གཞུང་ཟློས་གར་ཚོགས་པ། རྒྱལ་སྤྱིའི་གློག་བརྙན་དུས་སྟོན། བོད་ཀྱི་རང་དབང་འཐབ་རྩོད་སོགས་གློག་བརྙན་ཁག་གཅིག་ཀྱང་སྟོན་རྒྱུ་ཡིན་འདུག འདི་ལོའི་ཕྱི་ཟླ་ ༨ ནས་གློག་བརྙན་གྱི་དུས་སྟོན་དེ་བཞིན་ས་གནས་གཞན་ཁག་ཏུ་སྐོར་བསྐྱོད་འགྲོ་རྒྱུ་ཡིན་པ་མ་ཟད། དུས་སྟོན་སྐབས་ཞལ་འདེབས་བྱུང་བ་རྣམས་སྐྱེ་རྒུ་མདོར་གཏོང་རྒྱུ་ཡིན་འདུག འདི་ལོའི་དུས་སྟོན་ནི་བོད་ཀྱི་གློག་བརྙན་དུས་སྟོན་ལོ་གསུམ་པ་དེ་ཡིན་འདུག་པ་དང་། གོ་སྒྲིག་གནང་མཁན་ (Day for Night)  ཞེས་པའི་གཞུང་འབྲེལ་མིན་པའི་ཚོགས་པ་དེ་ཡིན་འདུག ཚོགས་པ་དེའི་ཚོགས་གཙོ་ནི་རྒྱ་གར་བ་ལྕམ་སོ་ན་ལི་ཇོ་ཤི་ (Sonali Joshi)  ཡིན་འདུག་པ་བཅས།།