༢༠༡༠ ཟླ་ ༧ ཚེས་ ༢༠ རེས་གཟའ་མིག་དམར།
༅༅། །ཕྱི་ལོ་ ༢༠༡༠ ཟླ་ ༧ ཚེས་ ༢༠ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད་ ༡༠ པར་༸གོང་ས་༸སྐྱབས་མགོན་ཆེན་པོ་མཆོག་བདུན་ཕྲག་གཅིག་ཙམ་རིང་ལ་དྭགས་ནུབ་ར་ཁུལ་དུ་མཛད་འཕྲིན་སྐྱོང་ཆེད་བཞུགས་སྒར་ནས་ཆིབས་སྒྱུར་སྐྱོང་སྐབས་བོད་མི་གཙོ་བོར་གྱུར་བའི་དད་ལྡན་མང་ཚོགས་རྣམས་ཀྱིས་ལག་ཏུ་སྤོས་སྣེ་དང་དཀར་གཙང་མཇལ་དར་ཐོགས་ཏེ་ཕེབས་སྐྱེལ་གཟབ་རྒྱས་ཞུས་ཡོད། དེ་ཡང་མགོན་པོ་གང་ཉིད་མཆོག་གིས་ཕྱི་ཚེས་ ༢༡ ནས་ ༢༢ བར་སུ་མུར་ཁུལ་དུ་རྟེན་གཞི་བྱས་པའི་བསམ་གཏན་གླིང་དགོན་པར་གསུང་ཆོས་བཀའ་དྲིན་སྩལ་གནང་མཛད་རྒྱུ་དང།
ཕྱི་ཚེས་ ༢༣ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཡར་མ་མགོན་པོ་དགོན་པར་རྡོ་རྗེ་གཅོད་པའི་ལྗགས་ལུང་སྩལ་གནང་མཛད་རྒྱུ་དང། ཕྱོགས་མཚུངས་བདེ་སྐྱིད་དགོན་པར་རྒྱལ་བ་བྱམས་པའི་སྐུ་བརྙན་གསར་བཞེངས་ལེགས་གྲུབ་བྱུང་བ་དེར་རབ་གནས་བཀའ་དྲིན་སྩལ་གནང་མཛད་རྒྱུ་ཡིན་འདུག བདེ་སྐྱིད་དགོན་པ་ནི་ལ་དྭགས་ནུབ་ར་ཁུལ་གྱི་ནང་པའི་དགོན་པ་རྙིང་ཤོས་དེ་ཡིན་པ་མ་ཟད། དགོན་པ་དེའི་གྱང་ངོས་སུ་བྲིས་པའི་ལྡེབས་རིས་རྣམས་བོད་ཀྱི་གཙང་བཀྲ་ཤིས་ལྷུན་པོ་དགོན་པའི་ལྡེབས་རིས་རྣམས་ལ་དཔེ་བླངས་པ་ཞིག་ཡིན་པ་དང་ལྡེབས་རིས་རྣམས་མང་ཚོགས་ཁྲོད་ཧ་ཅང་སྙན་གྲགས་ཆེན་པོ་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༢༦ ནས་ ༢༧ བར་བདེ་སྐྱིད་ཕོ་བྲང་དུ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་སྩལ་གནང་མཛད་རྒྱུ་ཡིན་འདུག་པ་བཅས།།
