༢༠༡༠ ཟླ་ ༧ ཚེས་ ༡༣ རེས་གཟའ་མིག་དམར།
༄༅། །བོད་མིའི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཕྱི་ལུགས་སུ་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་དུས་ཆེན་ཁྱད་པར་ཅན་འདི་འཛམ་གླིང་ཡུལ་གྲུ་གང་སར་སྲུང་བརྩི་ཞུ་བཞིན་ཡོད་པ་ལྟར། ཨོ་སི་ཊོ་ལི་ཡ་བོད་གཞུང་སྐུ་ཚབ་དོན་གཅོད་ལས་ཁུངས་དང་བོད་རིགས་སྤྱི་མཐུན་ཚོགས་པ་གཉིས་ནས་གོ་སྒྲིག་ཐོག ཕྱི་ལོ་ ༢༠༡༠ ཟླ་ ༧ ཚེས་ ༧ ཉིན་ཨོ་སི་ཊོ་ལི་ཡའི་རྒྱལ་ས་ཀེན་སྦེ་རར་༸གོང་ས་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཤིག་ཞུས་ཡོད། དེ་ཡང་མཛད་སྒོའི་ཐོག་མར་༸གོང་ས་མཆོག་གི་སྐུ་དཔར་མཐོང་གྲོལ་རིན་པོ་མཆོག་བཞུགས་ཁྲིར་གདན་འདྲེན་ཞུས་ཏེ་སེར་སྐྱ་མི་མང་རྣམས་ནས་མཇལ་ཁ་དང་མཇལ་དར་ཕུལ་བ་དང་། ཀེན་སྦེ་རའི་བོད་རིགས་མཐུན་ཚོགས་ཀྱི་དྲུང་ཆེ་ཐུབ་བསྟན་ཚེ་དབང་ལགས་ནས་ལས་རིམ་གཙོ་སྐྱོང་ཐོག་མཛད་སྒོ་དབུ་འཛུགས་ཞུས་ཡོད། མཛད་སྒོར་ཨོ་སི་ཊོ་ལི་ཡའི་གྲོས་ཚོགས་འཐུས་མི་དང་། གཞུང་ཚབ་པ་ཁག་གཅིག འདོད་མའི་མི་རིགས་ཀྱི་སྐུ་ཚབ། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་འཐུས་མི་དང་། བོད་མི། རྒྱ་རིགས། བལ་པོ་དང་། ཤྲི་ལང་ཀ་སོགས་མི་གྲངས་ ༢༠༠ ལྷག་ལྷན་འཛོམས་བྱུང་བའི་དབུས་སུ་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་ཀྱིས་རྒྱལ་བའི་མཛད་རྣམ་སྙིང་བསྡུས་ངོ་སྤྲོད་ཀྱིས་གསུང་བཤད་གནང་རྗེས། སྐུ་མགྲོན་གཙོ་བོ་གྲོས་ཚོགས་གོང་མའི་འཐུས་མི་དང་ལྗང་གུ་ཚོགས་པའི་ཚོགས་གཙོ་སྐུ་ཞབས་སྦོབ་སྦོ་རོན་(Bob Brown) མཆོག་ནས་སྐུའི་འཁྲུངས་སྐར་འཚམས་འདྲིའི་ཤིས་ཚིག་དང་ཆབས་ཅིག་གསུང་དོན། བོད་ཀྱི་གནད་དོན་སེལ་རྒྱུར་བོད་ཙམ་མ་ཟད། འཛམ་གླིང་ཞི་བདེ་དང་ཁོར་ཡུག་ལ་འབྲེལ་བ་ཤུགས་ཆེ་ཡོད་སྟབས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ད་བར་འགྲོ་བ་མིའི་བདེ་སྡུག་ལ་སྒེར་སེམས་མེད་པ་ལེགས་སྐྱེས་ཕུལ་དང་འབུལ་བཞིན་པ་དང་དེ་བཞིན་ཁོར་ཡུག་སྲུང་སྐྱོབ་ཐད་མཛད་རྗེས་བླ་ན་མེད་པ་བསྐྱངས་པའི་བཀའ་དྲིན་སྙིང་བཅང་ཞུ་དགོས། དེ་རིང་དམིགས་བསལ་གྱི་དུས་ཆེན་འདི་དང་སྟབས་བསྟུན་ང་ཚོས་༸གོང་ས་ཏཱ་ལའི་བླ་མ་མཆོག་སྐུ་ཚེ་བསྐལ་བརྒྱར་བརྟན་པའི་སྨོན་འདུན་ཞུ་རྒྱུ་ཡིན། འདི་ནི་སྤྱི་བྱིངས་ངོས་ནས་བརྗོད་ན་གལ་འགངས་ཆེན་པོ་ཡིན་ཞེས་གསུངས་ཡོད། འཁྲུངས་སྐར་མཛད་སྒོའི་ཐོག་ད་དུང་སི་ཌི་ནི་དང་ཝིག་ཊོ་རི་ཡ། ཁུཡིན་སེ་ལེན་ཊིའི་བོད་རིགས་མཐུན་ཚོགས་ཁག་གིས་འཁྲབ་སྟོན་པ་དང་། ཨོ་སི་ཊོ་ལི་ཡའི་ཤྲི་ལང་ཀ་དང་བལ་ཡུལ་མཐུན་ཚོགས་ཀྱི་འཁྲབ་སྟོན་པས་རིག་གཞུང་འཁྲབ་སྟོན་གནང་བ་མ་ཟད། རྒྱ་རིགས་སློབ་ཕྲུག་ཀྱང་སི་ཌི་ནིར་ཆེད་ཕེབས་ཀྱིས་སྐུ་མགྲོན་རྣམས་ལ་ཨོག་ལེན་ཆུང་བའི་རོལ་ཆ་དཀྲོལ་བ་དང་། ཀན་སྦེ་ར་བོད་རིགས་མཐུན་ཚོགས་ཀྱི་ཚོགས་གཙོ་བསྟན་འཛིན་ལྷ་དར་ལགས་ནས་མཛད་སྒོར་ཕེབས་མཁན་རྣམས་ལ་དམིགས་བསལ་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་དངོས་གཞི་གྲུབ་རྗེས་སྐུ་མགྲོན་རྣམ་པར་བཞེས་ཏོག་སྣ་ཚོགས་བཤམས་ཡོད། དེ་བཞིན་བོད་རིགས་དང་སྐུ་མགྲོན་རྣམས་ནས་སྒོར་གཞས་འཁྲབ་སྟོན་གནང་སྟེ་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད་འདུག་པ་བཅས།
