༢༠༡༠ ཕྱི་ཟླ་ ༧ ཚེས་ ༢ རེས་གཟའ་པ་སངས།
༄༅། །འདི་གར་ཨ་རིའི་སྐུ་ཚབ་དོན་ཁང་ནས་ཕྱི་ལོ་ ༢༠༡༠ ཟླ་ ༧ ཚེས་ ༢ ཉིན་བཏང་གནས་ནང་གསལ། བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་མཆོག་གིས་ཉེ་ཆར་བོད་རང་དབང་སློབ་ཕྲུག་ཚོགས་པས་ནིའུ་ཡོཀ་གྲོང་སྟོད་དུ་གོ་སྒྲིག་གནང་བའི་ཟབ་སྦྱོང་ཞིག་གི་ཐོག་བོད་མིའི་མང་གཙོའི་འཕེལ་རིམ་སྐོར་ཟབ་སྦྱོང་ལ་ཕེབས་མཁན་ཚོར་གསུང་བཤད་གནང་ཡོད། བོད་རང་དབང་སློབ་ཕྲུག་ཚོགས་པས་གོ་སྒྲིག་གནང་བའི་ཟབ་སྦྱོང་དེར་བྱང་ཨ་རི་ཁུལ་དང་། ཡོ་རོབ་ཁུལ་ནས་ཕེབས་པའི་སློབ་ཕྲུག་བརྒྱ་སྐོར་ཞིག་ནས་ཟབ་སྦྱོང་ལ་མཉམ་ཞུགས་གནང་ཡོད། དེ་ཡང་དོན་གཅོད་མཆོག་གིས་མང་གཙོའི་རིང་ལུགས་ལྡན་པའི་འཛམ་གླིང་རྒྱལ་ཁབ་གཞན་དང་འདྲ་བར་བཙན་བྱོལ་བོད་མི་ཡོངས་རྫོགས་ལ་རང་དབང་དང་། ཐོབ་ཐང་། འདྲ་མཉམ། ཁྲིམས་ཀྱི་དབང་སྒྱུར་བཅས་ལོངས་སུ་སྤྱོད་རྒྱུ་ཡོད་སྐོར་དང་། རྒྱ་གཞུང་ནས་བོད་ཀྱི་བདེན་པའི་འཐབ་རྩོད་འདི་༸གོང་ས་མཆོག་དང་བོད་མི་ཉུང་ཤས་ཤིག་གི་འཐབ་རྩོད་ཡིན་ཚུལ་བདེན་པ་མིན་པའི་དྲིལ་བསྒྲགས་བྱེད་བཞིན་ཡོད་སྟབས། བཙན་བྱོལ་བོད་མི་ཡོངས་ལ་མང་གཙོའི་ཐོབ་ཐང་ལོངས་སུ་སྤྱོད་རྒྱུ་ཡོད་པ་འདིས་རྒྱ་གཞུང་གི་ཤོད་སྟངས་ལ་རྣག་ཐོག་གཙག་འཁེལ་གྱི་ལན་འདེབས་བྱས་ཡོད་པའི་སྐོར། དེ་བཞིན་བོད་མིའི་མང་གཙོའི་ལམ་སྲོལ་འདི་མ་འོངས་པར་བོད་མི་ཡོངས་རྫོགས་ཆབ་སྲིད་དབུ་ཁྲིད་གཅིག་གི་འོག་ཤར་བསྐྱོད་དང་། ཡིད་ཆེས་བློ་གཏད་བྱེད་ཡུལ་གྱི་ལམ་སྲོལ་བཟང་པོ་ཞིག་ཏུ་འགྱུར་རྒྱུ་མ་ཟད། བོད་མིའི་ཆིག་སྒྲིལ་གྱི་ནུས་པ་སྲ་བརྟན་གཏོང་རྒྱུར་ཡང་ཕན་ནུས་ཐོན་ཐུབ་པའི་ཐུགས་རེ་གནང་གི་ཡོད་སྐོར་གསུངས་ཡོད། ཡང་དོན་གཅོད་མཆོག་ནས་རིང་མིན་བཀའ་བློན་ཁྲི་པ་དང་། སྤྱི་འཐུས་འོས་བསྡུའི་སྐབས་རང་ལོ་ ༡༨ ཡན་ཟིན་པའི་སློབ་ཕྲུག་ཚང་མས་ཆ་ཤས་མང་ཙམ་ལེན་ཐུབ་པའི་སླད་དེ་རིང་ཆེད་དུ་ཟབ་སྦྱོང་ལ་ཕེབས་པའི་སློབ་ཕྲུག་ཚོས་དམིགས་བསལ་གྱི་ནུས་པ་འདོན་སྤེལ་བྱེད་དགོས་པའི་འབོད་སྐུལ་གནང་ཡོད་པ་རེད། བོད་རང་དབང་སློབ་ཕྲུག་ཚོགས་པས་གོ་སྒྲིག་གནང་བའི་ཟབ་སྦྱོང་དེ་བདུན་ཕྲག་གཅིག་རིང་ནིའུ་ཡོཀ་གྲོང་སྟོད་དུ་ཚོགས་ཡོད་པ་དང་། གསུང་བཤད་གནང་མཁན་གྱི་གྲས་སུ་ད་དུང་བོད་རིགས་རྩོམ་པ་པོ་འཇམ་དབྱངས་ནོར་བུ་ལགས་དང་། གྲགས་ཙན་མང་གཙོ་དོན་གཉེར་བ་ཝེ་ཅིན་ཧྲིན། རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཞབས་ཁྲཱོ་ཀྲར་སྭན། ཕྱི་རྒྱལ་མཁས་དབང་སྦོབ་ཁྲ་མན། ཆབ་སྲིད་བཙོན་ཟུར་ངག་དབང་གསང་སྒྲོལ་ལགས་དང་ཆོས་དབྱིངས་ཀུན་བཟང་སོགས་གདན་ཞུ་གནང་ཡོད་པ་བཅས་སོ།།
