༢༠༡༠ ཟླ་ ༧ ཚེས་ ༩ རེས་གཟའ་པ་སངས།
༅༅། །ཕྱི་ལོ་ ༢༠༡༠ ཟླ་ ༧ ཚེས་ ༦ རེས་གཟའ་མིག་དམར་གྱི་ཉིན་ཨ་རིའི་རྒྱལ་ས་ཝ་ཤིང་ཌོན་ནང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པི་ལོ་སི་ (NancyPelosi) མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་ཉིན་སྤེལ་བའི་འཚམས་འཕྲིན་ནང་འཁོད་དོན། དེ་རིང་ནི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་གྱི་ཉིན་མོ་དེ་ཡིན་པས། བོད་ཕྱི་ནང་གཉིས་སུ་ཡོད་པའི་བོད་མི་རྣམས་དང་འཛམ་གླིང་ས་ཕྱོགས་གང་སར་ཡོད་པའི་བོད་དོན་རྒྱབ་སྐྱོར་བ་བཅས་ཚང་མས་ཞི་བདེ་དང་མཁྱེན་རྒྱ་ཡངས་པའི་སྐྱེ་བུ་ཁོང་ལ་གུས་འདུད་ངང་དུས་ཆེན་འདི་སྲུང་བརྩི་ཞུ་བཞིན་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་རང་ཉིད་ནང་པའི་དགེ་སློང་ཉམ་ཆུང་ཞིག་ཡིན་ཞེས་ཡང་ཡང་གསུང་བཞིན་ཡོད། འོན་ཀྱང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་འཛམ་གླིང་གི་མི་མང་ཧ་ཅང་མང་པོ་ཞིག་ལ་ནང་པའི་དགེ་སློང་ཉམ་ཆུང་ཞིག་ལས་ལྷག་པའི་མཚོན་དོན་ཞིག་ཆགས་ཡོད། མི་གྲངས་སྟོང་ཕྲག་མང་པོར་ཆོས་ཕྱོགས་ཀྱི་༸སྐྱབས་གནས་ཤིག་དང་སེམས་ནང་གི་ཞི་བདེ་དང་འཆམ་མཐུན་བསྐྲུན་རྒྱུར་བློ་སྤོབས་སྦྱིན་མཁན་ཞིག་ཆགས་ཡོད། ཁོང་གིས་འཛམ་གླིང་ས་ཕྱོགས་གང་སར་ཆིབས་སྒྱུར་བསྐྱངས་ཏེ་ཆོས་ལུགས་འདྲ་མིན་དབར་མཛའ་མཐུན་གྱི་འབྲེལ་བ་གོང་འཕེལ་བཏང་གནང་མཛད་ཡོད། ཁོང་གིས་རང་ཉིད་ཀྱི་མཚན་གནས་ཐོག་བོད་ཙམ་མ་ཟད།འཛམ་གླིང་ནང་གི་དཀའ་ངལ་རྣམས་ཤེས་རབ་དང་བྱམས་བརྩེ། འཚེ་བ་མེད་པ་བཅས་ཀྱི་ཐབས་ལམ་གོང་འཕེལ་བཏང་བའི་ཐོག་སེལ་ཐབས་མཛད་ཡོད་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེ་རྒྱལ་སྤྱིའི་ནང་སེམས་འཚབ་བྱེད་དགོས་པའི་གནད་དོན་ཞིག་ཏུ་བསྒྱུར་ཡོད། དཀའ་ངལ་དེ་སེལ་རྒྱུར་དུས་ཡུན་རིང་པོ་ཕྱིན་ཡོད། ཕན་ཚུན་གྲོས་མོལ་གྱི་ལམ་ནས་འགྲིག་འཇགས་ཤིག་བྱུང་ཚེ་བོད་ནང་བརྟན་ལྷིང་ཡོང་ཐུབ་པ་མ་ཟད། འཛམ་གླིང་ནང་རྒྱ་ནག་གི་ཆེ་མཐོང་གོང་མཐོར་འགྲོ་ངེས་རེད། བོད་ཀྱི་༸སྐྱབས་མགོན་ཏཱ་ལའི་བླ་མ་རྒྱ་ནག་ནང་ཕེབས་ཏེ་རྒྱ་ནག་གཞུང་འཛིན་གྱི་མི་སྣ་གཙོ་གྲས་རྣམས་དང་ཐད་ཀར་གྲོས་མོལ་གནང་རྒྱུའི་ཐུགས་འདོད་ཡོད་སྐོར་བཀའ་གནང་ཡོད། དོན་སྨིན་ལྡན་པའི་གྲོས་མོལ་ཞིག་ཡོང་སླད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གདན་ཞུ་གནང་བའི་ཐོག་པེ་ཅིང་གཞུང་གིས་རང་གི་གདེང་སྤོབས་མངོན་པའི་བརྡ་ལན་ཞིག་གཏོང་རྒྱུར་ངས་སྙིང་ཐག་པ་ནས་རེ་བ་ཞུ་བཞིན་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཚེ་མེད་ཞི་བའི་ལམ་ནས་རྒྱ་ནག་གཞུང་དང་ལྷན་འགྲིག་འཇགས་ཡོང་རྒྱུར་རྒྱལ་སྤྱིའི་རྒྱབ་སྐྱོར་ཡོང་བའི་འབོད་སྐུལ་གནང་ཡོད། ཨ་རིའི་གྲོས་ཚོགས་ཀྱིས་ད་བར་བོད་དོན་ལ་རྒྱབ་སྐྱོར་བྲག་རི་བཞིན་སྲ་བརྟན་གནས་ཡོད་ཅེས་བརྗོད་རྒྱུར་ང་ལ་སྤོབས་པ་ཡོད། ཕྱི་ལོ་ ༢༠༠༧ ལོར་བོད་ཀྱི་༸སྐྱབས་མགོན་ཏཱ་ལའི་བླ་མས་འཚེ་མེད་ཞི་བ་དང་འགྲོ་བ་མིའི་ཐོབ་ཐང་། ཆོས་ལུགས་ཕན་ཚུན་དབར་བསམ་ཤེས་གོང་འཕེལ་བཅས་ཀྱི་ཐོག་རླབས་ཆེན་གྱི་ཞབས་འདེགས་བསྒྲུབས་པར་ཨ་རིའི་གྲོས་ཚོགས་ནས་གསེར་གྱི་རྟགས་མ་འབུལ་བཞེས་སྐབས་ང་རང་སྲིད་འཛིན་སྐུ་ཞབས་བྷུ་ཤི་མཆོག་དང་ལྷན་དུ་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་གྱི་ཉིན་འདིར་ངས་ཁོང་གི་བྱམས་བརྩེ་དང་ཞི་བདེ། འཛམ་གླིང་སྐྱེ་འགྲོ་ཀུན་ལ་འགྲོ་བ་མིའི་ཐོབ་ཐང་ཡོང་བའི་སྐུ་ཚེའི་མཛད་རྗེས་ལ་བསྔགས་བརྗོད་ཞུ་རྒྱུ་ཡིན།།
འཕྲིན་ཡིག་ངོ་མ་དབྱིན་ཡིག་ནང་ཡོད་པས་དེར་རྩ་འཛིན་ཡོང་བ་ཞུ།
