༢༠༡༠ ཟླ་ ༧ ཚེས་ ༢༣ རེས་གཟའ་པ་སངས།

༄༅། །ཕྱི་ལོ་ ༢༠༡༠ ཟླ‘ ༧ ཚེས་ ༢༢ རེས་གཟའ་ཕུར་བུའི་ཉིན་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པས་ (Human Rights Watch) རྒྱ་ནག་གཞུང་ནས་བོད་མི་ཚོར་ཁྲིམས་ལུགས་དང་མི་འཚམས་པའི་དྲག་གནོན་བྱས་པའི་སྙན་ཐོ། ༼ ཕྱི་ལོ་ ༢༠༠༨ ནས་ ༢༠༡༠ བར་བོད་ནང་དྲག་ཆས་ཉེན་རྟོག་པས་ཚུལ་མིན་གྱི་ཁྲིམས་ཆད་བཏང་བ། ངས་མིག་གི་དངོས་སུ་མཐོང་བྱུང་། ༽ ཞེས་པའི་སྙན་ཐོ་ཤོག་གྲངས་ ༧༣ ཅན་ཞིག་བཏོན་ཡོད། རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པའི་སྙན་ཐོ་ཤོག་ལྷེ་གྲངས་ ༧༣ ཙམ་ཡོད་པ་དེའི་ནང་མིག་མཐོང་ལག་ཟིན་བྱུང་བའི་གནས་ཚུལ་ལྟར་ན། ཕྱི་ལོ་ ༢༠༠༨ ཟླ་ ༣ ཚེས་ ༡༠ ཉིན་སྔར་མ་བྱུང་བའི་བོད་མིས་ཞི་རྒོལ་འགོ་འཛུགས་སྐབས་དང་དེ་རྗེས་རྒྱ་ནག་གཞུང་གི་ཉེན་རྟོག་དམག་མིས་བོད་མི་ཚོར་ཆེད་མངགས་ཁྲིམས་ལུགས་དང་མ་འཚམས་པའི་དྲག་གནོན་བྱས་ཡོད་པ་མ་ཟད། དུས་ད་ལྟའང་བོད་མི་གར་སོང་ཆ་མེད་འགྲོ་བཞིན་ཡོད་པ་དང། ཉེས་མེད་བཙོན་འཇུག་བྱས་པ། ཆབ་སྲིད་བཙོན་པ་རྣམས་ཀྱི་ནང་མི་ཚོར་སྡུག་སྦྱོང་གཏོང་བ། ཞི་རྒོལ་བྱེད་མཁན་བོད་མི་ཚོར་གདུང་སེམས་མཉམ་སྐྱེ་ཡི་རོགས་རམ་བྱེད་མཁན་ཚོར་མིག་རྟགས་བརྒྱབ་པ་སོགས་ཁྲིམས་འགལ་གྱི་ལག་བསྟར་བྱེད་བཞིན་ཡོད་ཅེས་སོགས་འཁོད་ཡོད། ༼ ཕྱི་ལོ་ ༢༠༠༨ ནས་ ༢༠༡༠ བར་བོད་ནང་དྲག་ཆས་ཉེན་རྟོག་པས་ཚུལ་མིན་གྱི་ཁྲིམས་ཆད་བཏང་བ། ངས་མིག་གི་དངོས་སུ་མཐོང་བྱུང་། ༽ ཞེས་པའི་སྙན་ཐོ་དེ་བོད་མི་སྐྱབས་བཅོལ་བ་དང་བོད་ནང་འགྲུལ་སྐྱོད་པ་གྲངས་ ༢༠༠ ལྷག་ཙམ་བོད་ནས་ཕྱི་རྒྱལ་དུ་འབྱོར་འཁྲལ་བཅར་འདྲི་བྱས་པའི་གནས་ཚུལ་ཞིག་ཡིན་པ་མ་ཟད། གནས་ཚུལ་རྣམས་དེ་སྔ་བཏོན་མེད་པ་དང། རྒྱ་ནག་གཞུང་གི་བརྒྱུད་ལམ་ཁག་ནས་ཐོན་པའི་གནས་ཚུལ་བཅས་ལ་གཞི་བཅོལ་བ་ཞིག་ཡིན་འདུག དེ་ཡང་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པའི་ཨེ་ཤི་ཡའི་ཁྲིམས་རྩོད་གཞུ་གཏུགས་པ་ལྕམ་སོ་ཕི་ཡ་རི་ཆཌ་སན་ (Sophie Richardson) ལགས་ཀྱིས། མིག་མཐོང་ལག་ཟིན་བྱུང་བའི་དཔང་རྟགས་དང་རྒྱ་ནག་གཞུང་གི་བརྒྱུད་ལམ་ཁག་ལ་གཞིགས་སྐབས་གོ་མཚོན་མེད་པའི་ཞི་རྒོལ་བ་རྣམས་ལ་གཞུང་གིས་ཆེད་མངགས་དྲག་གནོན་བྱས་ཡོད། སྙན་ཐོ་དེས་རྒྱ་ནག་གཞུང་གིས་བོད་མི་ཞི་རྒོལ་བ་ཚོར་རྒྱལ་སྤྱི་དང་རྒྱ་ནག་གི་ཁྲིམས་ལུགས་དང་མཐུན་པའི་ཉེས་ཆད་བཀལ་ཡོད་སྐོར་བརྗོད་པ་དེ་དངོས་འབྲེལ་གྱི་གནས་ཚུལ་ཞིག་མིན་པའི་ར་སྤྲོད་གསལ་པོ་བྱས་ཡོད་ཅེས་བརྗོད་འདུག