༢༠༡༠ ཟླ་ ༧ ཚེས་ ༢༦ རེས་གཟའ་ཟླ་བ།
༄༅། །འདི་གར་བོད་གཞུང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨ་རིའི་ཤར་ཕྱོགས་ས་ཁུལ་གྱི་རྒྱ་རིགས་ཚོགས་པ་ཁག་གཉིས་ནས་གདན་ཞུ་གནང་དོན་ལྟར། ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་རྒྱ་ནག་སྐམ་ས་ཆེན་པོ་ནས་ཨ་རིར་འབྱོར་བའི་རྒྱ་རིགས་ཁག་གཅིག་ལ་དབུ་མའི་ལམ་གྱི་སྐོར་འགྲེལ་བརྗོད་གནང་ཡོད། དེ་ཡང་ཨ་རིའི་ཤར་ཕྱོགས་སུ་ཡོད་པའི་མང་གཙོའི་འཐབ་ཕྱོགས་ཞེས་པ་དང་། རྒྱ་ནག་མང་གཙོ་ཏང་ཞེས་པའི་རྒྱ་རིགས་ཀྱི་ཚོགས་པ་གཉིས་ནས་ཁོང་ཚོའི་ཚོགས་པ་དང་འབྲེལ་བ་ཡོད་པའི་རྒྱ་རིགས་རྣམས་ལ་སྐབས་དང་དུས་སུ་གོ་རྟོགས་སྤེལ་བའི་ལས་འགུལ་འདྲ་མིན་སྤེལ་བཞིན་ཡོད་པ་ལྟར། ཕྱི་ཟླ་ ༧ ཚེས་ ༢༠ ཉིན་གྱི་ལས་འགུལ་ནང་༸གོང་ས་༸སྐྱབས་མགོན་ཆེན་པོ་མཆོག་གིས་འདོན་གནང་མཛད་པའི་དབུ་མའི་ལམ་གྱི་དགོངས་གཞིའི་ཐོག་འགྲེལ་བརྗོད་བྱུང་ན་དགེ་མཚན་འདུག་ཅེས་ཚོགས་པའི་ཚོགས་གཙོ་སྐུ་ཞབས་ཐང་ཡོན་ཅུན་ནས་བོད་གཞུང་ཨ་རི་སྐུ་ཚབ་དོན་ཁང་ལ་འབྲེལ་བ་ཞུས་དོན་ལྟར་དོན་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས་ནས་དབུ་མའི་ལམ་གྱི་དོན་སྙིང་དང་ཁྱད་ཆོས། ༸གོང་ས་༸སྐྱབས་མགོན་ཆེན་པོ་མཆོག་གིས་དབུ་མའི་ལམ་འདོན་གནང་མཛད་པའི་རྒྱུ་མཚན་དང་དམིགས་ཡུལ། དེ་བཞིན་དབུ་མའི་ལམ་ནི་གློ་བུར་དུ་བྱུང་བ་ཞིག་མིན་པར། ༸གོང་ས་མཆོག་གི་དགོངས་པར་ལོ་རབས་བདུན་ཅུའི་འགོ་སྟོད་ནས་ཡོད་ལ། ཕྱོགས་མཚུངས་མང་ཚོགས་བརྒྱ་ཆ་དྲུག་ཅུ་རེ་བཞི་བརྒལ་བས་མོས་མཐུན་གཙང་མ་ཡོད་པའི་སྲིད་བྱུས་ཤིག་ཡིན་པ་བཅས་ཀྱི་སྐོར་ལ་འགྲེལ་བརྗོད་ཞིབ་ཕྲ་གནང་ཡོད། གོ་རྟོགས་སྤེལ་བའི་ལས་
འགུལ་དེར་བཅར་མཁན་གྱི་གྲས་སུ་རྒྱ་རིགས་རྒན་དར་གཞོན་གསུམ་བསྡོམས་ ༧༧ ཙམ་ཕེབས་ཡོད་པ་ཚང་མ་རྒྱ་ནག་སྐམ་ས་ཆེན་པོ་ནས་ཡིན་ཞིང་། གསུང་བཤད་གྲུབ་རྗེས་མི་གྲངས་ ༡༡ ཙམ་ནས་དབུ་མའི་ལམ་གྱི་སྐོར་ལ་དྲི་བ་བཏོན་པར་ཀུན་དགའ་བཀྲིས་ལགས་ནས་ལན་འདེབས་གནང་ཡོད། དེ་རྗེས་སྐུ་ཞབས་ཐང་ཡོན་ཅུན་ནས་མཇུག་བསྡོམས་ཀྱི་གསུང་བཤད་གནང་སྐབས། བོད་ནི་ལོ་རྒྱུས་ཐོག་རང་བཙན་གྱི་རྒྱལ་ཁབ་གཅིག་ཡིན་ཡང་། ལོ་རབས་ལྔ་བཅུ་པའི་ནང་རྒྱ་ནག་གིས་བཙན་བཟུང་བྱས་རྗེས་རྒྱལ་ཁབ་ཀྱི་རྣམ་པར་བསྡད་མེད། ཡིན་ན་ཡང་བོད་ནི་སྔར་བཞིན་བྱམས་བརྩེ་ལྡན་ཞིང་། ནང་པའི་ཆོས་ཀྱི་རིག་གཞུང་ལྡན་པའི་རླབས་ཆེན་མི་རིགས་ཤིག་ཡིན། ང་ཚོས་༸གོང་ས་ཏཱ་ལའི་བླ་མ་མཆོག་གི་རྣམ་དཔྱོད་ཚོར་ཐུབ་པ་མ་ཟད། བོད་མི་མང་གིས་རང་སྐྱོང་རྩོད་ལེན་བྱེད་པའི་དགོས་འདུན་ཤེས་རྟོགས་ཡོད་ལ་རྒྱབ་སྐྱོར་ཡང་ཡོད། ས་ཁོངས་རང་སྐྱོང་དང་རང་རྐྱ་འཕེལ་ཞིང་རང་དབང་ལྡན་པའི་དམངས་ཁྲོད་ཀྱི་སྤྱི་ཚོགས་ནི་མ་འོངས་པའི་རྒྱ་ནག་གི་མང་གཙོའི་ལམ་ལུགས་ཀྱི་རྨང་གཞི་ཡིན་ཞེས་གསུང་ཡོད། དེ་ཉིན་གྱི་ཚོགས་འདུ་དེ་ནི་ཉིན་གུང་ཆུ་ཚོད་ ༢ པར་དབུ་འཛུགས་གནང་ཞིང་། ཆུ་ཚོད་ ༤ པར་མཇུག་བསྒྲིལ་འདུག་པ་བཅས།།
