༢༠༡༠ ཟླ་ ༧ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༩ སྔ་དྲོ་གངས་སྐྱིད་སྤྱི་ཐབ་ཚོགས་ཁང་ནང་དུ་ཕྱི་ནང་གི་གསར་འགོད་པ་གྲངས་ ༢༦ ཙམ་མཉམ་འཛོམས་ཐོག་རྒྱ་ནག་ངལ་རྩོལ་ཚོགས་པའི་ཚོགས་མི་གཉིས་ནས་གསར་འགོད་བསལ་བསྒྲགས་སྤེལ་དོན། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཁམས་དང་བཞིན་ཡུན་རིང་འཚོ་བཞུགས་མཛད་པ་ནི་རྒྱ་བོད་མི་རིགས་གཉིས་ཀྱི་བདེ་སྐྱིད་ཀྱི་རྩ་བ་ཡིན། རྒྱ་ནག་ངལ་རྩོལ་ཚོགས་པའི་ལྟ་ཚུལ་ལྟར་ན། ༸གོང་ས་མཆོག་གིས་ང་ཚོས་འདས་དོན་ལོ་རྒྱུས་ལ་རྩད་གཅོད་མི་བྱེད་ཅེས་པའི་གསུང་མོལ་འདི་ནི་ཧ་ལས་པའི་རྣམ་དཔྱོད་ལྡན་པའི་བཀའ་སློབ་ཞིག་རེད། ད་ལྟའི་བཙན་བྱོལ་གཞུང་གིས་འཛིན་བཞིན་པའི་དབུ་མའི་ལམ་གྱི་སྲིད་བྱུས་འདིར་རྒྱ་ནག་གཞུང་གིས་རང་སྐྱོང་རྫུན་མ་དང་། དོན་དམ་གྱི་རང་བཙན། རྣམ་པ་བསྒྲུར་བའི་རང་བཙན་རེད་ཟེར་ནས་ལོག་འགྲེལ་བྱེད་ཀྱི་ཡོད། རྒྱ་ནག་ངལ་རྩོལ་ཚོགས་པའི་ལྟ་ཚུལ་ལྟར་ན། དུས་རབས་གོང་མའི་ཕྱི་ལོ་ང་དགུ་ལོའི་གོང་དུ། གྲལ་རིམ་འཐབ་རྩོད་རྩ་འཛིན་བྱེད་པའི་ལོ་དུས་ཤིག་རེད། བསྒྱུར་བཅོས་སྒོ་དབྱེ་བྱས་ཚུན་གྲལ་རིམ་འཐབ་རྩོད་ཀྱི་གླེང་བརྗོད་དེ་རིམ་པས་མི་རྣམས་ཀྱིས་བརྗེད་པར་གྱུར་ཡོད། ད་ཆ་དུས་རབས་ཉེར་གཅིག་པའི་བཅུ་ཚན་ཐོག་མ་འདི་མཇུག་རྫོགས་བཞིན་ཡོད། དབུ་མའི་ལམ་འདིར་རྒྱ་ནག་དམར་ཤོག་གིས་གྲལ་རིམ་འཐབ་རྩོད་ཀྱི་དུས་མཚམས་དེའི་ལྐོག་གཡོ་གླེང་བའིལྟ་སྟངས་ལྟར་ངོས་འཛིན་བྱེད་མི་འོས། ༸གོང་ས་མཆོག་གིས་ཁ་གསལ་གཏིང་གསལ་གྱི་ལམ་ནས་ད་ལྟའི་དངོས་ཡོད་ཀྱི་ཆབ་སྲིད་ལམ་སྟོན་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་ལ་མིང་དོན་མཚུངས་པའི་རང་སྲིད་རང་སྐྱོང་དགོས་ཀྱི་ཡོད་ཅེས་གསུངས་ཡོད། འདི་ལྟར་བྱུང་ཚེ་ད་གཟོད་ཕྱོགས་གཉིས་ཀྱི་གོ་འཛོལ་རྣམས་སེལ་ཐུབ་ལ་རྒྱ་བོད་མི་རིགས་གཉིས་ཞི་མཐུན་མཉམ་གནས་ཀྱི་སྤྱི་ཚོགས་དང་མཛའ་བརྩེའི་ངང་གནས་ཐུབ་རྒྱུར་ནུས་ལྡན་གྱི་ལམ་བུ་ཉག་གཅིག་རེད། ཅེས་སོགས་ཀྱི་གསར་འགོད་གསལ་བསྒྲགས་དང་དྲི་བ་དྲིས་ལན་བཅས་གནང་ཡོད།
