༢༠༡༠ ཟླ་ ༧ ཚེས་ ༢༡ རེས་གཟའ་ལྷག་པ།
༄༅། ཕྱི་ལོ་ ༢༠༡༠ ཟླ་ ༧ ཚེས་ ༢༠ ཉིན་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་། སུད་སིའི་བོད་གཞུང་སྐུ་ཚབ་དོན་ཁང་། ཇི་ནི་ཝའི་རྒྱལ་སྤྱིའི་འགྲོ་བ་མིའི་ཐོབ་ཐང་སྦྱོང་བརྡར་བསྟིེ་གནས་ཁང་བཅས་ཀྱི་གོ་སྒྲིག་ཐོག་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་སྲུང་སྐྱོབ་སྒྲོམ་གཞི་ཞེས་པའི་བརྗོད་གཞིའི་ཐོག་ཟབ་སྦྱོང་ཚོགས་གནང་ཡོད། དེ་ཉིན་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨུ་རྒྱན་བསྟན་འཛིན་ལགས། རྒྱལ་སྤྱིའི་འགྲོ་བ་མིའི་སྦྱོང་བརྡར་བསྟི་གནས་ཁང་གི་ཚོགས་གཙོ་སྐུ་ཞབས་ཨཌ་རེན་ཛོ་ལར་ (Adrien Zoller) ལགས། གཞུང་འབྲེལ་དང་གཞུང་འབྲེལ་མིན་པའི་ཚོགས་པའི་སྐུ་ཚབ་རྣམ་པ། སྲིད་དོན་ཚན་རིག་སློབ་ཕྲུག གསར་འགོད་པ་བཅས་མི་གྲངས་ ༣༠ ཙམ་ལྷན་འཛོམས་ཀྱིས་ཐོག་མར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་གྱིས་ཟབ་སྦྱོང་དེའི་དགོས་དམིགས་ངོ་སྤྲོད་གསུང་བཤད་གནང་བ་དང་། དེ་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་དབུ་འཛིན་དང་། འབྲེལ་ཡོད་ཕྱག་ལས་གནང་མཁན་ཚོ། ཇི་ནི་ཝ་ནས་ཕེབས་པའི་ཐེངས་འདིའི་ཟབ་སྦྱོང་ཐོག་ལམ་སྟོན་གསུང་བཤད་གནང་མཁན་སྐུ་ཞབས་ཨཌ་རེན་ཛོ་ལར་ལགས། དེ་བཞིན་འདིར་ཟབ་སྦྱོང་ནང་མཉམ་ཞུགས་གནང་མཁན་གཞུང་ཞབས་རྣམ་པ་དང་། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་རྣམ་པ། མཐོ་སློབ་སློབ་མ་བཅས་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་ཟབ་སྦྱོང་འདི་ལྟ་བུ་ཞིག་གནང་གི་ཡོད་པ་རེད་ཅེས་ཐོས་པ་ཙམ་གྱིས་ཧ་ཅང་དགའ་པོ་བྱུང་། ད་ལྟ་གོང་དུ་གསུང་བཤད་གནང་མཁན་ཚོས་གསུངས་པ་ལྟར། འགྲོ་བ་མིའི་ཐོབ་ཐང་ཞེས་པའི་ཚིག་འདི་འཛམ་གླིང་ནང་ཚང་མས་གོ་མྱོང་བ་ཞིག་དང་། ཚང་མས་ཚིག་འདི་གོ་བ་དང་དེ་ནི་འོས་ཤིང་འཚམ་པའི་ཐོབ་ཐང་ཞིག་རེད་ཅེས་བསམ་གྱི་ཡོད། འོན་ཀྱང་ཐབས་སྐྱོ་བ་ཞིག་ལ་སྐབས་རེ་རྒྱལ་ཁབ་སོ་སོའི་ཚིག་བརྗོད་འདི་བེད་སྤྱོད་གཏོང་སྟངས་ལོག་པ་ཞིག་བཏང་སྟེ་ཁ་ནས་འགྲོ་བ་མིའི་ཐོབ་ཐང་ཞེས་གསུངས་པ་དང་། དོན་དངོས་སུ་དེ་སྲུང་བརྩི་མི་བྱེད་པར་ད་དུང་བེད་སྤྱོད་བཏང་སྟེ་སྐྱོན་བཟོ་བ་སོགས་ཀྱི་གནས་ཚུལ་ཧ་ཅང་ཐབས་སྐྱོ་བོ་དེ་འདྲ་ཆགས་ཀྱི་ཡོད། སྤྱིར་རྒྱལ་སྤྱིའི་ཚོགས་པ་བཙུགས་ཏེ་དེའི་ནང་འགྲོ་བ་མིའི་ཐོབ་ཐང་ཐོག་ལས་ཀ་འདྲ་མིན་བྱེད་ཀྱི་ཡིན་ཞེས་སྒྲིག་གཞི་དང་ཚོགས་མི་ཁག་མང་པོ་ཞིག་བཟོ་གི་ཡོད། ཡིན་ནའང་དངོས་སུ་ལག་བསྟར་བྱེད་སྐབས་ག་ཚོད་ཀྱི་སྒྲིག་གཞི་དེའི་ནང་སླེབས་ཀྱི་ཡོད་མེད་སོགས་བལྟས་ན། ང་ཚོ་བོད་ཀྱི་གནས་ཚུལ་དེ་ཏག་ཏག་ཅིག་བསླེབས་ཀྱི་མེད་པ་ཞིག་ཚང་མས་ཐུགས་ལ་ཡོད་པ་རེད་བསམ་གྱི་འདུག ལོ་ལྟར་བཞིན་རྒྱལ་སྤྱིའི་ནང་འགྲོ་བ་མིའི་ཐོབ་ཐང་དང་ལྷག་པར་བོད་པའི་གནས་སྟངས་དེ་དངོས་གསལ་དོད་པོ་ཞེ་དྲག་ཡོད་སྟབས། དུས་རྟག་ཏུ་གཞུང་འབྲེལ་གྱི་ལས་ཁུངས་ཁག་དང་། དེ་བཞིན་ཚོགས་པ་ཁག་དང་མི་སྒེར་གྱིས་ཐོག་ནས་གང་ཐུབ་ཐུབ་ཐོབ་ཐང་དགོས་ཡོད་ཅེས་ཚོགས་འདུ་དང་། དེ་བཞིན་གོ་སྐབས་གང་བྱུང་ལའང་གསུངས་ཀྱི་ཡོད། དོན་དངོས་སུ་ང་ཚོའི་དགོས་མཁོ་དང་ཐོབ་ཐང་སོགས་རག་ཁག་པོ་ཞེ་དྲག་ཆགས་ཡོད། དེང་སང་གནས་སྟངས་དེ་རྒྱ་མིའི་ཕྱོགས་ནས་ཐབས་བྱུས་མང་དུ་འཐེན་ཏེ་རྒྱལ་སྤྱིའི་ནང་རྒྱ་མིར་ཚོང་འབྲེལ་སོགས་ཀྱི་ཐོག་ནས་བསྟུན་དགོས་ཀྱི་ཡོད་པར་བརྟེན། འགྲོ་བ་མིའི་ཐོབ་ཐང་གི་བདེན་པ་ང་ཚོར་ཡོད་ཀྱང་དངོས་སུ་བདེ་སྡུག་ཞུ་བར་འགྲོ་དུས་གོ་སྐབས་རགས་མ་རགས་སོགས་ཀྱི་གནས་ཚུལ་དེ་འདྲ་ཆགས་ཡོད་པ་རེད་བསམ་གྱི་འདུག་པས་གལ་ཆེ་བ་ཞིག་ལ་ང་རང་ཚོ་ནང་ཁུལ་བོད་ནང་འགྲོ་བ་མིའི་ཐོབ་ཐང་མི་འདུག་ཅེས་བརྗོད་པ་ཙམ་གྱི་འགྲིག་གི་མེད། རྒྱལ་སྤྱི་ནས་སྒྲིག་འཛུགས་བཟོས་ཏེ་དེའི་ནང་ཆ་རྐྱེན་མང་པོ་ཞིག་བཟོས་ཡོད། དཔེར་ན། བྱིས་པ་དང་ཆོས་ཕྱོགས་ཀྱི་ཐོབ་ཐང་། ཆབ་སྲིད་བཙོན་པའི་ཐོབ་ཐང་སོགས་སྡེ་ཚན་མང་པོ་ཞིག་ད་ལྟ་སློབ་འཁྲིད་གནང་སྐབས་གསུང་གི་རེད་བསམ་གྱི་འདུག ཁོང་ཚོའི་ཁྲིམས་དང་སྒྲིག་གཞི་རྣམས་ཤེས་པའི་ཐོག་ནས་ཞུ་སྟངས་སོགས་གང་འདྲ་བྱེད་དགོས་པ་དང་། དེ་བཞིན་ལུགས་དང་མཐུན་པའི་སྒོ་ནས་བྱས་ན་ཕྲན་བུ་ཉན་མཁན་དང་ཏན་ཏན་ཕན་ཐོགས་ཡོང་རྒྱུའི་གཞི་རྩ་ཞིག་ཆགས་ཀྱི་རེད་དྲན་གྱི་འདུག ད་ཐེངས་ཉིན་གསུམ་རིང་གི་ཟབ་སྱོང་འདིའི་ནང་མཉམ་ཞུགས་གནང་བའི་རིང་ཐུགས་སྣང་ཆེན་པོ་གནང་སྟེ་ཞིབ་ཚགས་པོའི་ཐོག་དོགས་དྲི་སོགས་དྲིས་ཏེ་གོ་སྐབས་ལེན་དགོས་པ་སོགས་ཀྱི་གསུང་བཤད་གནང་རྗེས་ཕྱི་དྲིལ་བཀའ་བློན་མཆོག་གིས་དབྱིན་སྐད་ཐོག་མུ་མཐུད་གསུང་བཤད་གནང་བའི་ནང་སྐུ་ཞབས་ཨཌ་རེན་ཛོ་ལར་མཆོག་ལ་ས་ཐག་རིང་པོ་ནས་འདིར་ཟབ་འཁྲིད་གནང་བར་ཕེབས་པར་ཐུགས་རྗེ་ཆེ་ཞུས་པ་དང་ཆབས་ཅིག་སྔོན་དུ་བོད་སྐད་ནང་གསུང་བཤད་གནང་བ་སྙིང་བསྡུས་ཤིག་དབྱིན་སྐད་ཐོག་གསུངས། དེ་ནས་བསྟན་འཛིན་ནོར་རྒྱས་ལགས་ཀྱི་ཟབ་སྦྱོང་གཙོ་སྐྱོང་གནང་གྲུབ་བསྟུན་ཟབ་འཁྲིད་པ་གཙོ་བོ་སྐུ་ཞབས་ཨཌ་རེན་ཛོ་ལར་ལགས་ཀྱིས་ཟབ་འཁྲིད་དབུ་འཛུགས་ཀྱིས་ཉིན་གསུམ་རིང་སློབ་ཁྲིད་གནང་རྒྱུ་ཡིན་འདུག་པ་བཅས།།
