༢༠༡༠ ཟླ་ ༧ ཚེས་ ༢༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༢༦ རེས་གཟའ་ཟླ་བའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནུབ་ར་མངའ་ཁོངས་ བདེ་སྐྱིད་དགོན་པར་མང་ཚོགས་ལ་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་དང་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་གསུང་ཆོས་བཀའ་དྲིན་ཆེ་བ་སྩལ། ཕྱི་ཚེས་ ༢༧ རེས་གཟའ་མིག་དམར་ཉིན་གྱི་སྔ་དྲོར་མགོན་པོ་གང་ཉིད་མཆོག་གིས་ལམ་གཙོ་རྣམ་གསུམ་གྱི་གསུང་ཆོས་ལྷག་འཕྲོས་རྣམས་སྩལ་གྲུབ་རྗེས་ཆོས་ཞུ་བ་མི་གྲངས་ ༡༥༠༠༠ ཙམ་ལ་ཚེ་དཔག་མེད་ཀྱི་ཚེ་དབང་སྩལ། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་བཞུགས་གནས་ཕོ་བྲང་དུ་༸ཞབས་སོར་འཁོད་མཚམས་ཕྱི་རྒྱལ་ཡུལ་སྐོར་སྤྲོ་འཆམ་པ་མི་གྲངས་ ༥༠༠ ཙམ་ལ་མཇལ་ཁ་སྩལ་བ་དང་བསྟུན་རང་གི་ཕ་མེས་ཀྱི་ཆོས་ལུགས་ལ་དོ་སྣང་དགོས་གལ་ཆེ་སྐོར་བཀའ་སློབ་སྩལ། བཀའ་སློབ་གྲུབ་བསྟུན་མགོན་པོ་གང་ཉིད་མཆོག་གིས་ལམ་སྒྲོན་དཔེ་སྟོན་སློབ་གྲྭར་ཆིབས་སྒྱུར་བསྐྱངས་ཏེ་སློབ་གྲྭའི་ཚ་གློག་ཁང་གསར་པར་རབ་གནས་དང་དབུ་འབྱེད་མཛད། དེ་རྗེས་ནང་ཆོས་ངོ་སྤྲོད་ཀྱི་བགྲོ་གླེང་ཚོགས་འདུར་ཆིབས་སྒྱུར་བསྐྱངས། དེ་ཡང་བགྲོ་གླེང་ཚོགས་འདུ་གོ་སྒྲིག་གནང་མཁན་ན་ལེཎྜ་དང་ཨ་ཏི་ཤ་ཆོས་ཚོགས་གཉིས་ཡིན་འདུག ན་ལེཎྜའི་ཆོས་ཚོགས་ནི་ཕྱི་ལོ་ ༢༠༠༥ ལོར་གསར་འཛུགས་གནང་བ་ཞིག་ཡིན་པ་དང་། ཆོས་ཚོགས་དེར་དཔལ་ལྡན་སྐུ་སྒེར་ཡིག་ཚང་ནས་སྐབས་མཚམས་མཐུན་འགྱུར་རོགས་རམ་སྩོལ་བཞིན་ཡོད། ནལེཎྜ་ཆོས་ཚོགས་ཀྱི་གོ་སྒྲིག་འོག་རེས་གཟའ་ཉི་མ་ནམ་ཡིན་ལ་གཞོན་སྐྱེས་ཚོར་ནང་ཆོས་ངོ་སྤྲོད་ཀྱི་འཛིན་གྲྭ་གོ་སྒྲིག་ཞུ་བཞིན་པ་དང། ཕྱོགས་མཚུངས་ཨ་ཏི་ཤའི་ཆོས་ཚོགས་ནི་ཕྱི་ལོ་ ༡༩༨༨ ལོར་གསར་འཛུགས་གནང་ཞིང་ནང་ཆོས་ཀྱི་གཞུང་ཆེན་རྣམས་ཕལ་སྐད་དུ་ཕབ་སྒྱུར་གྱིས་གཞོན་སྐྱེས་གཙོ་བོ་གྱུར་བའི་མང་ཚོགས་རྣམས་ལ་ནང་ཆོས་ངོ་སྤྲོད་གནང་མུས་རེད་འདུག ཕྱི་ཚེས་ ༢༨ རེས་གཟའ་ལྷག་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ནུབ་ར་ཁུལ་གྱི་མཛད་འཕྲིན་རྣམས་ཡོངས་སུ་ལེགས་པར་གྲུབ་སྟེ་སྔ་དྲོ་ཆུ་ཚོད་ ༨།༣༠ ཐོག་ལ་དྭགས་ནུབ་ར་ཐེའོ་སི་གནམ་ཐང་ནས་རྡ་སར་ཆིབས་༸ཞལ་སྒྱུར་སྐབས་གནམ་ཐང་དུ་དགའ་ལྡན་ཁྲི་རིན་པོ་ཆེ་མཆོག་དང་ཁྲིག་སེ་རིན་པོ་ཆེ་མཆོག ལ་དྭགས་ས་གནས་གྲོས་ཚོགས་ཀྱི་འཐུས་མི། ལ་དྭགས་ནང་པའི་ཚོགས་འདུའི་ཚོགས་གཙོ། ནུབ་རའི་རྫོང་དཔོན། ནུབ་ར་ས་གནས་འཛིན་སྐྱོང་ལྷན་ཚོགས་ཀྱི་ཚོགས་མི་བཅས་ཀྱིས་ཕེབས་སྐྱེལ་ཞུས་འདུག་པ་བཅས།།
