སྐུ་ཚབ་དོན་གཅོད་ཐུབ་བསྟན་བསམ་སྒྲུབ་ལགས།
༢༠༡༠ ཟླ་ ༧ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༦ ཉིན་དབྱིན་ཡུལ་བོད་གཞུང་སྐུ་ཚབ་དོན་གཅོད་ཁང་གིས་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༧༥ ལ་ཕེབས་པའི་སྐུའི་ཁྲུངས་སྐར་དུས་ཆེན་དེ་བཞིན་དབྱིན་ཡུལ་གྱི་རྒྱལ་ས་ལོན་ཌོན་ནང་བརྟེན་གཞི་བྱས་པའི་ཀ་ཡེ་ལ་ཤི་ཚོགས་ཁང་ནང་སྲུང་བརྩི་གཟབ་རྒྱས་ཞུས་ཡོད། མཛད་སྒོ་དེར་གྲོས་ཚོགས་ཀྱི་འཐུས་མི་རྣམས་དང་། བོད་དོན་རྒྱབ་སྐྱོར་ཚོགས་པའི་ཚོགས་མི། རོགས་སྐྱོབ་ཐེབས་རྩ་ཁང་གི་ཚོགས་མི། གསར་འགོད་པ། གཞུང་གི་སྐུ་ཚབ་འཐུས་མི། བོད་རིགས་ཚོགས་པའི་ཚོགས་མི་བཅས་མཉམ་ཞུགས་གནང་ཡོད། དེ་ཡང་མཛད་སྒོའི་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟེན་པའི་སྨོན་ལམ་གསུང་འདོན་གནང་བ་དང་སྦྲགས་དབྱིན་ཡུལ་ནང་གནས་སྡོད་བོད་མི་རྣམས་ཀྱི་གླུ་གཞས་ཁག་གཅིག་གཟིགས་འབུལ་ཞུས་ཡོད། དེ་རྗེས་དབྱིན་ཡུལ་བོད་གཞུང་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་ཀྱི་མཛད་སྒོ་དང་འབྲེལ་བའི་གསུང་བཤད་གནང་དོན། ང་ཚོས་༸གོང་ས་མཆོག་གིས་སྐུའི་འཁྲུངས་སྐར་གྱི་ཉིན་མོ་ཁྱད་པར་ཅན་འདི་དབྱིན་ཡུལ་ནང་རྟེན་གཞི་བྱས་པའི་བོད་ཀྱི་གྲོགས་པོ་རྣམས་དང་སྐུ་ཚབ་འཐུས་མི་ལྷན་འཛོམས་ཐོག་སྲུང་བརྩི་ཞུ་རྒྱུ་བྱུང་བར་ང་ཅང་དགའ་པོ་བྱུང་། མཛད་སྒོ་འདིར་དངོས་སུ་ལྷན་ཞུགས་གནང་མཁན་ཚོ་དང་གཞན་ཡང་དངོས་སུ་ལྷན་ཞུགས་གནང་མ་ཐུབ་པའི་བོད་ཀྱི་གྲོགས་པོ་ཚོས་༸གོང་ས་མཆོག་ལ་འཁྲུངས་སྐར་གྱི་མཚམས་འདྲི་ཞུས་ཡོད་པ་དེས་ཁོང་ཚོའི་༸གོང་ས་མཆོག་ལ་གུས་ཞབས་དང་བརྩི་བཀུར་ཡོད་པ་གསལ་པོ་མཚོན་བཞིན་ཡོད་ཅེས་གསུངས་ཡོད་པ་བཅས།
