༢༠༡༠ ཟླ་ ༧ ཚེས་ ༣༡ རེས་གཟའ་སྤེན་པ།
༄༅། །འདི་གར་དགའ་བྱང་ཐོས་བསམ་ནོར་གླིང་སློབ་གྲྭའི་སློབ་སྤྱི་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༧ ཚེས་ ༢༦ ཉིན་ཆར་རླུང་དྲག་ཏུ་འཚུབ་ན་ཡང་དགའ་ལྡན་བྱང་རྩེ་སློབ་གྲྭའི་སློབ་ཕྲུག་རྣམས་ཀྱིས་མ་སྐུལ་དང་བླངས་ཐོག་དགའ་ལྡན་གླིང་གི་ཁོར་ཡུག་གཙང་བཟོའི་ལས་འགུལ་སྤེལ་བར་ས་གནས་དགེ་འདུན་པ་ཚོས་དགའ་བསུ་ཆེན་པོ་གནང་ཡོད། དེ་ཡང་ཁོང་ཚོས་གསུང་དོན། ༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། འགྲོ་བ་མིའི་ཁོར་ཡུག་གི་བསྒྲགས་གཏམ་ཁ་ནས་བཤད་པ་ཙམ་མ་ཡིན་པར་ལག་ལེན་དུ་བསྟར་ཆེད། ང་ཚོས་མུ་མཐུད་ཟླ་རེེའི་ནང་ཐེངས་གཉིས་རེ་དགའ་ལྡན་གླིང་ལ་ཁོར་ཡུག་གཙང་བཟོའི་ལས་འགུལ་སྤེལ་རྒྱུ་ཡིན་ལ། དེ་ནི་རང་དོན་ཡིན་པ་མ་ཟད་སྤྱི་དོན་ཡང་རེད། རང་ཅག་གི་འཚོ་རྟེན་དུ་གྱུར་བའི་ཁོར་ཡུག་འདི་རྒྱུ་རྐྱེན་སྣ་ཚོགས་ཀྱིས་ཉམས་རྒུད་དུ་འགྲོ་བཞིན་པའི་སྐབས་འདིར་སྣོད་བཅུད་སྲུང་སྐྱོབ་བྱེད་པ་ནི་ཤིན་ཏུ་ནས་གལ་ཆེ། འགྲོ་བ་མིའི་རིགས་ཀྱི་འཚོ་སྡོད་བྱེད་སའི་རང་བྱུང་ཁམས་འདིའི་ཆགས་འཇིག་ཉམ་ང་ནི་ཐད་ཀར་མིའི་རིགས་ཀྱི་སྲིད་འབྱོར་རིག་གསུམ་གྱི་འཕེལ་རྒྱས་དང་ཉམས་རྒུད་ལ་འབྲེལ་བ་དམ་ཟབ་ཡོད་པ་མ་ཟད།
ཕྱི་སྣོད་ཀྱི་འཇིག་རྟེན་ཆགས་འཇིག་དང་ནང་བཅུད་ཀྱི་སེམས་ཅན་སྐྱེ་འཆི་ཀུན་ལ་དབང་བསྒྱུར་བའི་བདག་པོའང་རང་བྱུང་ཁམས་འདི་ཉིད་ཡིན་པས་ཀུན་གྱིས་འདི་ལ་ཚེ་སྲིང་བྱེད་པའི་མ་མ་ཟེར། ནམ་ཞིག་རང་བྱུང་ཁོར་ཡུག་འདི་འཇིག་ཚེ་མིའི་རིགས་ཀྱི་ཚེ་སྲོག་ཀྱང་དེ་ནས་མཇུག་བསྡུས་ཟིན་པས། ཁོར་ཡུག་སྲུང་སྐྱོབ་བྱེད་པ་ནི་རྒྱལ་ཁབ་དང་ལས་ཁུངས་ཀྱི་འོས་འགན་ཡིན་པ་མ་ཟད། ཁོར་ཡུག་དེ་དང་དེར་འཚོ་སྡོད་བྱེད་པའི་མི་ཚང་མའི་འོས་འགན་ཡང་ཡིན། དེ་ནི་རང་དོན་ཡིན་ལ་སྤྱི་དོན་ཡང་རེད། དེའི་ཕྱིར་༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་མི་རྣམས་ཀྱི་སྐྱེ་ཁམས་ཀུན་སྤྱོད་དང་ཁོར་ཡུག་སྲུང་སྐྱོབ་ཀྱི་འདུ་ཤེས་གསོ་སྐྱོང་བྱ་དགོས་པའི་ཐད་བཀའ་སློབ་རིམ་པར་ཕེབས་ཡོད་ལ། བདག་ཅག་གི་སྟོན་པས་ཀྱང་། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། དེ་ལ་ས་ཆེན་འདི་བརྟེན་དེ་ལ་འགྲོ་བ་འདི་དག་བརྟེན། ཞེས་གསུངས་ཡོད་པས། ང་ཚོས་འདི་དང་འདི་ལྟ་བུའི་ཁོར་ཡུག་གཙང་བཟོའི་ལས་འགུལ་ལ་དགའ་བསུ་དང་རྒྱབ་སྐྱོར་བྱེད་དགོས་ཞེས་གསུངས་ཡོད་པ་བཅས།།
