༢༠༡༠ ཟླ་ ༧ ཚེས་ ༡༢ རེས་གཟའ་ཟླ་བ།
༄༅། །འདི་གར་ལྡི་ལི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་༢༠༡༠ ཟླ་ ༧ ཚེས་ ༦ ཉིན་༸གོང་ས་མཆོག་ཕྱི་ལུགས་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་དུས་ཆེན་ཉིན་ལྡི་ལི་དོན་གཅོད་ལས་ཁང་ནས་ཕྱི་དྲོ་ཆོུད་ ༥ ནས་ ༧ བར་ (India Habitat Center Gulmohar) དུ་༸གོང་ས་མཆོག་གི་མཛད་འཕྲིན་ཐོག་ (Celebrating The Dalai Lama) ཅེས་པའི་བརྗོད་གཞིའི་ཐོག་མཁས་པའི་གསུང་བཤད་ལས་རིམ་ཞིག་གོ་སྒྲིག་ཞུས་ཡོད། ཚོགས་འདུའི་གཙོ་སྐྱོང་བ་རྒྱ་གར་གཞུང་གི་ཁྲིམས་རྩོད་པ་ཟུར་པ་སྐུ་ཞབས་སོ་ལི་སོ་རབྷ་ཇི་མཆོག་ནས་གནང་ཡོད་ཅིང་། གསུང་བཤད་གནང་མཁན་གྲས་སུ་རྒྱ་གར་གྱི་ཕྱི་སྲིད་དྲུང་ཆེ་ཟུར་པ་སྐུ་ཞབས་ཀཌྷ་ཝལ་སི་བྷལ་མཆོག་དང་། རྒྱ་གར་གྱི་གཞུང་ཚབ་ཟུར་པ་སྐུ་ཞབས་ཌ་ལིབ་མེཧ་ཊ་མཆོག གསར་འགོད་པ་གྲགས་ཅན་སྐུ་ཞབས་ཨེམ་ཇེ་ཨཀཱ་བྷར་མཆོག རྒྱ་གར་གྱི་སྔ་རབས་བྲོ་མཁན་ལྕམ་སྐུ་སོ་ཌྷལ་མཌྷ་སིངྒ་མཆོག ༸གོང་ས་མཆོག་གི་ཀུན་ཕན་བདེ་རྩའི་དྲུང་ཆེ་སྐུ་ཞབས་ར་ཇིབྷ་མེཧ་རོཏྲ་མཆོག་བཅས་ཡོད། ལྡི་ལི་དོན་ཁང་ནས་མགྲོན་འབོད་ཞུས་པ་ལྟར་གསུང་བཤད་ལས་རིམ་ཐོག་ལྡི་ལི་གནས་འཁོད་ཕྱི་རྒྱལ་གཞུང་ཚབ་པ་དང་གཞུང་ཚབ་ཁག་གི་ལས་བྱེད། རྒྱ་གར་གྱི་མི་སྣ་གྲགས་ཅན། བོད་དོན་རྒྱབ་སྐྱོར་བ། གསར་འགོད་པ། ལྡི་ལི་ཁུལ་གནས་མཐོ་སློབ་ཁག་གི་གཙོ་འཛིན་དང་སློབ་དཔོན་སོགས་གནད་ཡོད་མི་སྣ་ ༡༢༥ ཙམ་དང་ལྡི་ལི་མཐོ་སློབ་ནང་སྐྱོད་བཞིན་པའི་རང་རེའི་སློབ་ཕྲུག་ ༣༠ བཅས་བསྡོམས་མི་གྲངས་ ༡༥༥ ཙམ་འདུ་འཛོམས་བྱུང་ཡོད། དེ་ཡང་ཐོག་མར་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་སུ་དགུང་གྲངས་ ༧༥ ཕེབས་པའི་སྐུའི་འཁྲུངས་སྐར་ཉིན་༸གོང་ས་མཆོག་གི་མཛད་འཕྲིན་དང་འབྲེལ་བའི་མཁས་པའི་གསུང་བཤད་གོ་སྒྲིག་ཞུ་དགོས་དོན་ངོ་སྤྲོད་དང་། གསུང་བཤད་གནང་མཁན་མཁས་དབང་རྣམ་པ་དང་དེ་གར་ཕེབས་མཁན་རྣམས་ལ་འཚམས་འདྲི་ཞུས་ཡོད། དེ་རྗེས་ཚོགས་འདུའི་གཙོ་སྐྱོང་བས་༸གོང་ས་མཆོག་གི་མཛད་འཕྲིན་དང་འབྲེལ་བའི་གསུང་བཤད་གནང་རྗེས་གསུང་བཤད་གནང་མཁན་མཁས་དབང་སོ་སོས་རང་ཉིད་ཀྱི་འདས་པའི་ལོ་ ༥༠ ནང་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བའི་ཉམས་མྱོང་དང་༸གོང་ས་མཆོག་གི་མཛད་འཕྲིན་ཐོག་གུས་བརྩི་ཆེན་པོས་གསུང་བཤད་ཟབ་རྒྱས་གནང་བ་མ་ཟད། མགོན་པོ་གང་ཉིད་མཆོག་མཛད་འཕྲིན་ལ་བསྟོད་བསྔགས་བླ་ན་མེད་པ་ཞུས་ཡོད། དེ་ཉིན་དགོང་དྲོ་ཆུ་ཚོད་ ༧།༣༠ ཐོག་རྒྱ་གར་གཞུང་གི་ལས་ཞབས་མི་སྣ་དང་། ཕྱི་རྒྱལ་གཞུང་ཚབ་པ་དང་གཞུང་ཚབ་ཁག་གི་འབྲེལ་ཡོད་ལས་བྱེད། བོད་དོན་རྒྱབ་སྐྱོར་བ། གསར་ཤོག་དང་བརྒྱུད་ལམ་ཁག་གི་གསར་འགོད་པ་གྲགས་ཅན། རྒྱ་གར་གཞུང་གི་གཞུང་ཞབས་པ་དང་གཞན་ཡང་བོད་དོན་ཐོག་སེམས་འཁུར་ཆེ་བའི་གནད་ཡོད་མི་སྣ། དོན་ཁང་གི་ཐུགས་འདྲིས་ཆེ་བའི་མི་སྣ་སོགས་ཁྱོན་བསྡོམས་མི་གྲངས་ ༣༥༠ ཙམ་ལ་དམིགས་བསལ་གསོལ་སྟོན་ཞིག་གོ་སྒྲིག་ཞུས་ཡོད་པ་རེད། གསོལ་སྟོན་དབུ་འཛུགས་མ་གནང་གོང་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་ནས་དགའ་བསུའི་འཚམས་དྲི་ཞུས་པ་དང་། དཔལ་ལྡན་རྒྱུད་སྟོད་དགེ་འདུན་པ་བཞི་གྲྭ་གཅིག་ནས་༸གོང་ས་མཆོག་གི་སྐུ་ཕྱའི་སླད་སྨོན་ལམ་འདོན་ཆོག་གནང་རྗེས་༸གོང་ས་༸སྐྱབས་མགོན་པོ་མཆོག་ཐོག་མར་བཞུགས་སྒར་དུ་ཕེབས་སྐབས་རྒྱ་གར་ཕྱི་སྲིད་ལས་ཁང་གི་འབྲེལ་མཐུད་པ་སྐུ་ཞབས་ཨིན་ཌར་མ་ལིཀཱ་མཆོག་ནས་རང་ཉིད་ཀྱི་མྱོང་ཚོར་ཐོག་གསུང་བཤད་གནང་། དེ་ནས་སྔ་དྲོ་ཆུ་ཚོད་ ༡༡ ནས་དགོང་དྲོ་ཆུ་ཚོད་ ༡༡ བར་ (India Habitat Center Foyer) དུ་བོད་ཀྱི་འགྲེམས་སྟོན་ཁང་ནས་༸གོང་ས་མཆོག་གི་མཛད་རྣམ་དང་འབྲེལ་བའི་སྐུ་པར་འགྲེམས་སྟོན་གོ་སྒྲིག་ཞུས་ཡོད་པར་སྐུ་མགྲོན་རྣམ་པ་དང་། གཞན་ཡང་ (India Habitat Center) དུ་རྒྱུན་ཕེབས་གནང་མཁན་གྱི་མི་སྣ་མང་པོས་གཟིགས་ཞིབ་གནང་སྟེ་ངོ་གདོང་དགའ་སྤྲོའི་འཛུམ་མདངས་རྣམ་པས་ཡོངས་སུ་བརྟས་ཡོད་པ་བཅས།
