༢༠༡༠ ཟླ་ ༧ ཚེས་ ༥ རེས་གཟའ་་ཟླ་བ།
ཕྱི་དྲེལ་བཀའ་བློན་མཆོག་ནས་གསར་འགོད་པའི་ལག་དེབ་ཅེས་པའི་དེེབ་དབུ་འབྱེད་གནང་བཞིན་པ།
༄༅། ཕྱི་ལོ་ ༢༠༡༠ ཟླ་ ༧ ཚེས་ ༥ ཉིན་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་ནོར་ཝེ་བོད་ཀྱི་རླུང་འཕྲིན་ལས་ཁང་ནས་དཔར་སྐྲུན་ཞུས་པའི་གསར་འགོད་པའི་ལག་དེབ་གཅིག་དབུ་འབྱེད་གནང་ཡོད། དེ་ཉིན་སྔ་དྲོ་ཆུ་ཚོད་ ༩།༣༠ ཡོལ་ཙམ་ཐོག་སྐུ་མགྲོན་གཙོ་བོ་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་དང་། ནོར་ཝེ་དབུས་ལས་ཁུངས་ཀྱི་འགན་འཛིན་སྐུ་ཞབས་ཨོ་ཡེསི་ཊིན་ཨེལ་མི་(Oystein Alme)ལགས། ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས། ནོར་ཝེ་རླུང་འཕྲིན་ལས་ཁང་གི་འགན་འཛིན་ཀརྨ་ཡེ་ཤེས་ལགས། རླུང་འཕྲིན་ལས་ཁུངས་ཀྱི་ལས་བྱེད་དང་། རྡ་ས་ཁུལ་གྱི་གསར་འགོད་པ་བཅས་ཁྱོན་མི་གྲངས་ ༢༠ བརྒལ་བ་ལྷན་འཛོམས་ཐོག་ནོར་ཝེ་རླུང་འཕྲིན་ལས་ཁང་གི་འགན་འཛིན་ཀརྨ་ཡེ་ཤེས་ལགས་ཀྱིས་ངོ་སྤྲོད་གསུང་བཤད་གནང་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། དེ་རིང་འདིར་ཕེབས་པའི་ནོར་ཝེ་རླུང་འཕྲིན་ཁང་གི་འགན་འཛིན་ཀརྨ་ཡེ་ཤེས་ལགས་དང་། ནོར་ཝེ་དབུས་ལས་ཁུངས་ཀྱི་འགན་འཛིན་ཨོ་ཡེསི་ཊིན་ལགས། དེ་བཞིན་གསར་འགོད་ཀྱི་ཕྱག་ལས་གནང་མཁན་ཚང་མར་བཀྲིས་བདེ་ལེགས་ཞུ་རྒྱུ་ཡིན། ཀརྨ་ཡེ་ཤེས་ལགས་ཀྱིས་དེ་རིང་གི་མཛད་སྒོ་དེ་ནང་ལུགས་སྟབས་བདེ་ཞིག་ཡིན་ཞེས་གསུངས་སོང་། འོན་ཀྱང་ངའི་ཚོར་བར་ཧ་ཅང་ཡག་པོ་བྱུང་འདུག་སྙམ་པ་བྱུང་། དེའི་རྒྱུ་མཚན་ནི་ལོ་ ༡༥ སྔོན་ལ་ནོར་ཝེ་རླུང་འཕྲིན་ཐོག་མར་འགོ་བཙུགས་པ་ནས་ད་བར་གྱི་གོམ་པ་སྤོ་སྟངས་ལ་དཀའ་ངལ་མང་པོ་ཞིག་འཕྲད་ཡོད། ཡིན་ནའང་ད་ལྟ་ལོ་ ༡༥ འཁོར་བའི་དུས་ལ་ཉེ་བའི་སྐབས་འདིར་ནོར་ཝེ་རླུང་འཕྲིན་ཁང་གི་ཕྱག་ལས་གནང་མཁན་ཚང་མས་ཞུམ་པ་མེད་པའི་ཐོག་སྐུ་ལས་བསྐྱོན་ནས་ཕྱག་ལས་ཡག་པོ་གནང་གི་འདུག དེ་བཞིན་ཨོ་ཡེསི་ཊིན་ལགས་སུ་ཆ་བཞག་ན་ཐོག་མ་འགོ་འཛུགས་སྐབས་ནས་ནོར་ཝེ་བོད་དོན་རྒྱབ་སྐྱོར་ཚོགས་པར་དང་བླངས་གནང་བ་མ་ཟད། ད་ལྟའི་ཆར་ནོར་ཝེ་དབུས་ལས་ཁུངས་ཀྱི་འགན་འཛིན་གནང་གི་ཡོད། དེ་ཚོ་ཚང་མར་རྒྱབ་ཤིག་བརྒྱབ་སྟེ་བལྟས་ན་དངོས་གནས་ཚང་མས་སྐུ་ལས་བརྒྱབ་ནས་གྲུབ་འབྲས་ཡག་པོ་ཐོན་འདུག ད་ལྟ་ལོ་ ༡༥ རྗེས་ཁྱེད་རྣམ་པས་ཕྱག་ལས་གནང་བཞིན་པ་མ་ཟད། གསར་འགོད་པའི་ཕྱག་ལས་གནང་ཕྱོགས་ཐོག་ཐུགས་འགན་བཞེས་ཏེ་ཕྱག་ལས་གནང་མཁན་ཙམ་མ་ཡིན་པར་མི་མང་ཁྲོད་དུའང་བརྒྱུད་ལམ་དེའི་ནང་འགྲོ་སྟངས་ཀྱི་གོ་རྟོགས་ཡོང་ཆེད་དཔེ་དེབ་འདི་བཟོས་གནང་བར་ཡག་པོ་རེད་བསམ་གྱི་འདུག དེ་རིང་ནོར་ཝེ་རླུང་འཕྲིན་ཁང་ནས་ཐུགས་འགན་བཞེས་ཏེ་མཐུན་འགྱུར་དང་སྐུ་ངལ་ལ་མ་ལྟོས་པར་ཐབས་ཤེས་གནང་སྟེ་དཔེ་དེབ་འདི་སྟོན་ཐུབ་པར་བརྟེན་ནོར་ཝེ་རླུང་འཕྲེིན་ཁང་གི་ཕྱག་ལས་གནང་མཁན་ཚོར་བཀྲིས་བདེ་ལེགས་དང་ཡག་པོ་ཞེ་དྲག་བྱུང་འདུག་ཞུ་རྒྱུ་ཡིན། དེ་བཞིན་བོད་པའི་རླུང་འཕྲིན་ཁང་ནང་ཨ་རིའི་ནང་ཁག་གཉིས་དང་བཞུགས་སྒར་གྱི་ནོར་ཝེ་རླུང་འཕྲིན་ཁང་དེ་རེད། མང་པོ་ཞིག་གིས་ནོར་ཝེ་རླུང་འཕྲིན་ཁང་ལ་དོ་སྣང་ཆེན་པོ་བྱས་ཏེ་ལྟ་ཉན་བྱེད་དགོས་པའི་རྒྱུ་མཚན་ནི་བཞུགས་སྒར་རང་ནས་གནས་ཚུལ་ཡོང་གི་ཡོད་སྟབས་ཚང་མས་དོ་སྣང་ཆེན་པོ་བྱེད་ཀྱི་ཡོད། དེར་བརྟེན་དེ་ཡར་རྒྱས་གཏོང་ཆེད་ང་རང་ཚོ་ཚང་མས་དོ་སྣང་དང་རྒྱབ་སྐྱོར་གནང་དགོས་རྒྱུ་གལ་ཆེན་པོ་ཆགས་ཀྱི་འདུག མཐའ་དོན་ཕྱག་ལས་འདིའི་ནང་ཡོད་མཁན་ཚོས་མ་མཁྱེན་པ་དེ་ཚོར་ཐུགས་སྣང་འཕར་མ་གནང་ན་ཡར་རྒྱས་དང་ཤེས་བྱར་མཐའ་མེད་སྟབས་ཐུགས་ཕན་གསོ་གི་རེད་བསམ་གྱི་འདུག་ཅེས་སོགས་ཀྱི་གསུང་བཤད་གནང་ཡོད། དེ་རྗེས་ཕྱི་དྲིལ་བཀའ་བློན་མཆོག་གིས་དབྱིན་སྐད་ཐོག་ནོར་ཝེ་དབུས་ལས་ཁུངས་ཀྱི་འགན་འཛིན་ཨོ་ཡེསི་ཊིན་ལགས་སུ་བསྔགས་བརྗོད་གནང་ཡོད། གསར་འགོད་པར་མཁོ་གནད་ཆེ་བའི་དེབ་འདི་བཞིན་གཙོ་ཆེ་རྒྱལ་མཚམས་མེད་པའི་གསར་འགོད་མཐུན་ཚོགས་དང་། ་བརྗོད། གསར་འགོད་རང་དབང་དང་འབྲེལ་ཡོད་ཡིག་ཆ་འགའ་ཤིག་ནས་ཟུར་འདོན་གྱིས་དབྱིན་ཡིག་ནས་བོད་ཡིག་ཐོག་ཕབ་བསྒྱུར་གྱིས་ཕྱོགས་སྒྲིག་ཞུས་ཏེ་བཙན་བྱོལ་བོད་མིའི་མང་གཙོ་དབུ་བརྙེས་ཏེ་མི་ལོ་ལྔ་བཅུ་འཁོར་ལ་ཉེ་བའི་སྐབས་དང་བསྟུན་དཔར་སྐྲུན་དང་འགྲེམས་སྤེལ་ཞུས་པ་ཞིག་ཡིན་འདུག
