བོད་ཀྱི་རྒྱལ་རབས་ལོ་རྒྱུས་སྨྲ་བ་མཁས་དབང་བྱམས་པ་བསམ་གཏན་ལགས་ཀྱིས་གསུང་བཤད་གནང་བཞིན་པ།
༢༠༡༠ ཟླ་ ༧ ཚེས་ ༨ རེས་གཟའ་ཕུར་བུ།
༄༅། ཕྱི་ལོ་ ༢༠༡༠ ཟླ་ ༧ ཚེས་ ༥ ཉིན་བོད་ཀྱི་དཔེ་མཛོད་ཁང་གིས་གོ་སྒྲིག་ཐོག་དཔེ་མཛོད་ཚོགས་ཁང་དུ༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོས་རུ་སུའི་རྒྱལ་པོར་བསྩལ་བའི་ནང་གནད་ཕྱག་བྲིས་ཞིག་དང་འབྲེལ་རུ་སུ་དང་བོད་གཉིས་བར་འབྲེལ་བའི་ལོ་རྒྱུས་བརྗོད་གཞིར་བཟུང་སྟེ་ཝ་ན་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་དཔོན་བྱམས་པ་བསམ་གཏན་ལགས་ཀྱིས་དཔྱད་གླེང་གསུང་བཤད་གནང་ཡོད། དེ་ཉིན་ཕྱི་དྲོ་ཆུ་ཚོད་ ༣ ཐོག་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷ་རྡོར་ལགས་དང་། སློབ་དཔོན་བྱམས་པ་བསམ་གཏན་ལགས་དབུས་སུ་འཁོད་རྗེས་བོད་མི་མང་སྤྱི་འཐུས་རྣམ་གཉིས་དང་། ཉམས་ཞིབ་པ། ཉེ་འཁོར་གྱི་ལོ་རྒྱུས་དོ་སྣང་ཅན་བཅས་མི་གྲངས་ ༣༠ བརྒལ་བ་ལྷན་འཛོམས་ཐོག་དཔེ་མཛོད་འགན་འཛིན་ནས་སློབ་དཔོན་ལགས་ངོ་སྤྲོད་མདོར་བསྡུས་ཤིག་གནང་རྗེས་སློབ་དཔོན་བྱམས་པ་བསམ་གཏན་ལགས་ནས་གསུང་བཤད་གནང་དོན། དགའ་ལྡན་ཕོ་བྲང་གི་ཆོས་སྲིད་གཉིས་ཀྱི་ལོ་རྒྱུས་འགོ་ཚུགས་པ་ནས་ད་ལྟའི་བར་དུས་ཚོད་དཀའ་ངལ་ཅན་ཞིག་འོག་གི་བོད་གངས་ཅན་ལྗོངས་ལ་ཧ་ཅང་བཀའ་དྲིན་ཆེ་བ་༸རྒྱལ་དབང་སྐུ་ཕྲེང་བཅུ་གསུམ་པས་བོད་ཀྱི་བསྟན་པ་ཆབ་སྲིད་དོན་ལ་ཐབས་ཤེས་ཡོད་རྒུ་རྩལ་སྤྲུག་གནང་ཡོད་པའི་ནང་ནས་ད་ལྟའི་ཕྱག་བྲིས་འདི་ཆ་ཤས་གཅིག་ཡིན། དེ་ཡང་གཅིག་ནི་ཕྱི་ལོ་ ༡༩༡༢ ༸རྒྱལ་དབང་སྐུ་ཕྲེང་བཅུ་གསུམ་པས་རུ་སུའི་རྒྱལ་པོར་ཕྱག་བྲིས་དེ་བཏང་གནང་བའི་སྐབས་ལ་དུས་ཚོད་དེ་གནད་འགག་ཆེ་སྟངས་སྐོར་ཞིག་དང་། གཉིས་ནི་དུས་རབས་བཅུ་དགུ་པའི་མཇུག་ནས་བོད་ཀྱི་ཆབ་སྲིད་ཀྱི་གནས་བབ་དེ་བོད་ཀྱི་གཡས་གཡོན་དུ་ཡོད་པའི་ཨེ་ཤེ་ཡའི་སྟོབས་ཆེན་རྒྱལ་ཁབ་གསུམ་དེ་ཤར་ལ་ཡོད་པའི་རྒྱ་ནག་དང་། ལྷོ་ངོས་ཀྱི་རྒྱ་གར་དབྱིན་ཇི་གཞུང་། བྱང་ཤར་ཕྱོགས་སུ་རུ་སུ་བཅས་ཀྱི་བོད་ཀྱི་སྟེང་ལ་སོ་སོའི་དབང་སྒྱུར་བྱེད་རྒྱུའི་འགྲན་བསྡུར་གྱི་འཐབ་རྩོད་ནང་བོད་དེ་ཚུད་ནས་རྒྱལ་ཁབ་དེ་གསུམ་གྱི་སོ་སོའི་ཁེ་ཕན་དང་དགོས་མཁོ་ལ་དཔག་པའི་ཐག་གཅོད་བྱས་ཏེ་ཆིང་ཡིག་ཁག་བཞག་པ་སོགས་དེ་ཚུར་རྒྱབ་ཀྱི་བོད་དང་རྒྱ་གཉིས་ཀྱི་རྩོད་རྙོག་གནས་སྟངས་དེ་རུ་སུ་དང་དབྱིན་ཇི་གཉིས་ལ་མ་བརྟེན་པའི་བྱེད་ཐབས་མེད་པའི་སྐོར་ཞིག་དང་། གསུམ་པ་༸རྒྱལ་དབང་སྐུ་ཕྲེང་བཅུ་གསུམ་པས་བོད་ལ་སྲིད་བྱུས་འཛིན་སྟངས་དེར་འུ་ཐུག་ཏེ་རུ་སུར་འབྲེལ་བ་ཞིག་མ་གནང་བར་ཐབས་ཟད་ནས་མཐའ་མའི་ཐུགས་རེ་ཞིག་བཅོལ་ཏེ་ཕྱག་བྲིས་གནང་བའི་སྐོར་དང་། བཞི་པ་ཕྱི་ལོ་ ༡༩༡༤ ལོར་བོད་དང་རྒྱ་མི་དབྱིན་ཇི་གསུམ་གྱི་སིང་ལར་བཞག་པའི་ཆིང་ཡིག་དེའང་བོད་དང་དབྱིན་ཇིས་དགོས་ཀྱི་འདུག་ཅེས་བརྗོད་ཏེ་བྱས་ཏེ་སྒྲུབ་པ་ཞིག་མིན་པར་རུ་སུ་དང་དབྱིན་ཇིའི་ཆབ་སྲིད་ལ་འཕོ་འགྱུར་ཕྱིན་པའི་བྱས་འབྲས་ཞོར་དུ་སླེབས་པ་ཞིག་ཡིན་པ་བཅས་ཀྱི་སྐོར་ལ་འགྲེལ་བརྗོད་གནང་བ་སོགས་བརྗོད་གཞི་དེ་དག་སྐོར་ལ་ཞིབ་རྒྱས་གསུང་རྗེས་དྲི་བ་དྲི་ལན་བཅས་གནང་ཡོད། སློབ་དཔོན་བྱམས་པ་བསམ་གཏན་ལགས་སུ་ཉེ་ལམ་ནས་ཡི་གེ་དེའི་ངོ་བཤུས་ཁ་ཤོག་ཏུ་ནང་གནད་ཅེས་འཁོད་པ་ཞིག་ལག་སོན་བྱུང་འདུག་ལ་ཕྱག་བྲིས་དེའི་ནང་དོན་གལ་ཆེན་ཡིན་པ་བཅས་གསུང་གནང་ཡོད་པའི་གནད་བསྡུས་སུ།
