༢༠༡༠ ཕྱི་ཟླ་ ༦ ཚེས་ ༡༤ རེས་གཟའ་ཟླ་བ།
༄༅། །འདི་གར་བོད་གཞུང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་གསལ། བོད་མདོ་ཁམས་སྐྱེ་རྒུ་མདོར་སྔར་མཐོང་དཀོན་པའི་ས་ཡོམ་གྱི་འཇིག་པ་བྱུང་མ་ཐག་ཕྱོགས་བཞི་མཚམས་བརྒྱད་དུ་གནས་པའི་བོད་མི་བཙན་བྱོལ་བ་ཡོངས་ནས་མ་སྐུལ་དང་བླངས་ཐོག་ཞབས་རིམ་གསོག་སྒྲུབ་དང་ཞལ་འདེབས་བསྡུ་སློང་གི་ལམ་ནས་ས་ཡོམ་གྱི་འཇིག་པའི་ཁྲོད་ཤ་ཁྲག་གཅིག་པའི་སྤུན་ཟླ་རྐྱེན་འདས་སོང་བ་དང་། རྨས་སྐྱོན་ཕོག་པ་རྣམས་ལ་གདུང་སེམས་མཉམ་སྐྱེ་མཚོན་ཆེད་བྱ་བ་བསྒྲུབས་དང་སྒྲུབ་བཞིན་ཡོད་པ་ལྟར། བྱང་ཨ་རིར་གནས་སྡོད་བོད་མི་ཚོས་ཕྱི་ལོ་ ༢༠༡༠ ཟླ་ ༦ ཚེས་ ༡༤ བར་ཞལ་འདེབས་བསྡུ་སློང་བྱུང་བའི་དངུལ་འབོར་ཨ་སྒོར་གྲངས་ ༤༡༠༠༦༤།༣༡ བཞི་འབུམ་ཆིག་ཁྲི་བརྒྱ་མེད་སྟོང་མེད་དྲུག་ཅུ་རེ་བཞི་དང་སེན་ཊི་གཅིག་ཟིན་ཡོད། ཞལ་འདེབས་ཀྱི་དངུལ་འབོར་དེ་དག་ནི་བྱང་ཨ་རིའི་ནང་ཡོད་བོད་རིགས་སྤྱི་མཐུན་ཚོགས་པ་དང་། ཆོས་ཚོགས། ཚོགས་སྐྱིད་ཁག སྒེར་པ་ཁག་གཅིག་ནས་ས་འགུལ་བྱུང་མ་ཐག་དང་། དེ་བཞིན་བདུན་ཚིགས་སོ་སོར་ཞབས་རིམ་གསོག་སྒྲུབ་སྐབས་མང་ཚོགས་ནས་ཕུལ་བ་ཤ་སྟག་ཡིན། གོང་ཞུས་ཞལ་འདེབས་འབུལ་མཁན་གྱི་ཁོངས་སུ་ནིའུ་ཡོཀ་དང་ནིའུ་ཇར་སིའི་ས་གནས་བོད་རིགས་སྤྱི་མཐུན་ཚོགས་པ་དང་། སྡེ་དགེ་སྐྱིད་སྡུག སྒ་པ་སྐྱིད་སྡུག ཆུ་བཞི་སྒང་དྲུག ཁོ་ལོ་རལ་ཌོ་ས་གནས་བོད་རིགས་སྤྱི་མཐུན་ཚོགས་པ། བྱང་ཁ་རོ་ལི་ནཱ་ས་གནས་བོད་རིགས་སྤྱི་མཐུན་ཚོགས་པ། ལྷོ་ཁལ་ལི་ཕོ་ནི་ཡ་ས་གནས་བོད་རིགས་སྤྱི་མཐུན་ཚོགས་པ། མིན་ནི་སོ་ཊར་ས་གནས་བོད་རིགས་སྤྱི་མཐུན་ཚོགས་པ། ནིའུ་མེག་སི་ཁོ་ཨལ་བྷ་གྷ་གྷི་ས་གནས་བོད་རིགས་སྤྱི་མཐུན་ཚོགས་པ། མདོ་སྔགས་ཀུན་ཕན་གླིང་ཆོས་ཚོགས། ནིའུ་ཡོཀ་གི་ཉེ་ཁུལ་མདོ་སྨད་སྐྱིད་སྡུག ཨི་ཏ་ཁ་ས་གནས་བོད་རིགས་སྤྱི་མཐུན་ཚོགས་པ། ཨེལ་མ་སི་མངའ་ཁུལ་བོད་རིགས། ཨལ་བྷ་ཌ་ས་གནས་བོད་རིགས་སྤྱི་མཐུན་ཚོགས་པ། ཕི་ལ་ཌལ་ཕེ་ས་གནས་བོད་རིགས་སྤྱི་མཐུན་ཚོགས་པ། རྒྱུད་སྟོད་ཆོས་ཚོགས། བྷོ་སེ་ཊོན་ས་གནས་བོད་རིགས་སྤྱི་མཐུན་ཚོགས་པ། ལི་ཐང་གི་གཞོན་སྐྱེས་དང་བླངས་པ། ལི་ཐང་སྐྱིད་སྡུག ཨིན་ཌི་ཡ་ནཱ་ས་གནས་བོད་རིགས་སྤྱི་མཐུན་ཚོགས་པ། ཀརྨ་པའི་ཐེབས་རྩ་ཁང་། ལྷོ་བྲག་སྐྱིད་སྡུག མོན་ཊཱ་ན་ས་གནས་བོད་རིགས་སྤྱི་མཐུན་ཚོགས་པ། སྒེར་པ་ཁག་གཅིག་བཅས་ཚུད་ཡོད། ཚོགས་སྐྱིད་ཁག་ནས་ཞབས་རིམ་གསོག་སྒྲུབ་སྐབས་སྐུ་ཚབ་དོན་གཅོད་མཆོག་དུས་ཚོད་མ་ལྕོགས་ན་མ་གཏོགས། ཞབས་རིམ་ཚང་མར་མཉམ་ཞུགས་གནང་ཡོད་པ་མ་ཟད། ཞབས་རིམ་གོ་སྒྲིག་གནང་མཁན་གྱི་རེ་འདུན་ལྟར་དེ་འབྲེལ་གྱི་གསུང་བཤད་ཀྱང་གནང་ཡོད།།
