༄༅། །རང་རེའི་བཟང་ཕྱོགས་ཀྱི་གྲུབ་འབྲས་ཁག་ནི་༸གོང་ས་ཆེན་པོའི་མཛད་འཕྲིན་ཁོ་ན་ལས་བྱུང་བར་བརྟེན། བོད་འབངས་སུ་གཏོགས་ཚད་ཡོངས་ཀྱིས་དགའ་དད་སྤྲོ་གསུམ་ངང་བཀའ་དྲིན་རྗེས་དྲན་ཞུ་འོས་ཐོག་བོད་མི་ནང་ཁུལ་ཆོལ་ཁ་ཆོས་ལུགས་དང་ལུང་ཚན་སྐྱེས་ཁུངས་སོགས་ཀྱི་ཕྱོགས་ལྷུང་བསམ་ཚུལ་དྲི་མས་མ་གོས་ཤིང་མཐུན་ལམ་དམ་ཚིག་ཟོང་ཁ་ཆིག་སྒྲིལ་དང་། ཕྱི་ནང་དགྲ་བོའི་དབྱེན་སྱོར་དཀྲུག་ཤིང་འོག་གཡམ་རྒྱུགས་སུ་མ་སོང་བར་རང་ཚུགས་རྣམ་སྤྱོད་དང་ལྡན་ཞིང་། སྤྱི་མཐུན་གོང་བུའི་ནུས་ཤུགས་སྲ་བརྟན་བྱ་རྒྱུ་སོགས་མདོར་ན་བོད་རྒྱལ་ཁབ་དང་མི་རིགས་ཀྱི་ལར་ཞེན་ཞུམ་པ་མེད་པའི་ངང་༸གོང་ས་༸སྐྱབས་མགོན་ཆེན་པོས་དུས་གསུམ་གསལ་གཟིགས་ཀྱིས་བཀའ་སློབ་ལམ་སྟོན་ཕེབས་པ་རྣམས་ཐོད་བཅིང་གིས་བཀའ་བཞིན་བསྒྲུབ་པ་མཆོད་པས་མཉེས་པ་དང་། རྒྱལ་བ་དགྱེས་པའི་མཆོད་སྤྲིན་དུ་འགྱུར་བའི་དམ་བཅའ་བསྐྱར་གསོ་བྱ་རྒྱུ་ནི་འཁྲུངས་སྐར་གྱི་ལེགས་སྐྱེས་འབུལ་མཚོན་དམ་པ་ཞིག་ཡིན་ཞེས་སོགས་དང་།
བོད་མིའི་མང་གཙོའི་འགྲོ་ལུགས་འཕེལ་རིམ་གང་ཅི་འཛམ་གླིང་ནང་ཡར་མཐོན་སྤྱི་སྲོལ་གྱི་ལམ་ལུགས་འགྲོ་སྟངས་དང་མཐུན་ཞིང་། མང་གཙོ་དོན་དམ་མཚན་ཉིད་ཚང་བའི་ཚགས་ཚུད་ཡར་རྒྱས་མདུན་བསྐྱོད་ཐུབ་ཐབས་སུ་བཙན་བྱོལ་ནང་དུས་བསྟུན་ལེགས་ཆའི་སྒྱུར་བཀོད་ཕྱག་བཞེས་རིམ་པར་བསྐྱངས་ཡོད་ཅིང་། ཁ་སྔོ་ཕྱི་ཟླ་ ༣ པའི་ནང་སྐབས་བཅུ་གཉིས་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་མཐའ་མའི་སྐབས་སུ་༸གོང་ས་མཆོག་ཆེད་དུ་ཆིབས་བསྒྱུར་ཞབས་བཀོད་དང་འབྲེལ་དགོངས་འཆར་བཀའ་སློབ་ཕེབས་དགོངས་བཞིན་བཀའ་བློན་ཁྲི་པའི་འོས་འདེམས་བྱ་ཕྱོགས་སྐོར་གྲོས་ཚོགས་སུ་སྤྱི་ཡོངས་བགྲོ་གླེང་སྱང་བཤད་ཉིན་བསྟུད་གནང་བ་དང་། དེ་རྗེས་སྤྱི་འཐུས་རྣམས་ཚོགས་ཆུང་དུ་ཆ་བགོས་ཀྱིས་ཇི་དགེའི་བསམ་ཞིབ་གྲོས་བསྡུར་ཞིབ་ལྷོང་མུ་མཐུད་ཞུས་མཐར་བཙན་བྱོལ་བོད་མིའི་བཅའ་ཁྲིམས་དང། འོས་བསྡུའི་སྒྲིག་གཞི་སོ་སོར་སྐབས་དོན་བསྐྱར་བཅོས་དང་འབྲེལ་བྱེས་སྡོད་རྒྱ་ཆེའི་མང་ཚོགས་ཀྱིས་བཀའ་བློན་ཁྲི་པ་ཐད་ཀར་འོས་འདེམས་ཀྱི་ལས་རིམ་འགྲོ་མུས་ལྟར་རིང་མིན་དངོས་གཞིའི་འོས་བསྡུ་བྱ་གཏན་འཁེལ་ཡོད་ཅིང་། བཀའ་བློན་ཁྲི་པའི་མི་འགྲོའི་ཐད་༸གོང་ས་མཆོག་གི་དགོངས་བཞེད་དང་མཐུན་པའི་དབུ་འོག་དཔུང་འདེགས་དང་། བོད་མིའི་རྩ་དོན་བསྒྲུབ་བྱ་རང་ཡུལ་རང་དབང་སླར་གསོའི་ལས་ཐབས་གང་ཅིར་སྲི་ཞུ་འཁུར་བསྐྱེད་བསྒྲུབ་ངེས་དྲག་འདེམས་ཐུབ་ཐབས་སུ་མང་ཚོགས་ནས་འགན་འཁུར་ཆེ་ཙམ་དགོས་གལ།
མཚོ་སྔོན་སྒོར་མོ་གྲོང་ཁྱེར་ནས་བོད་ཀྱི་རྒྱལ་ས་ལྷ་ས་བར་མེ་འཁོར་ལྕགས་ལམ་གསར་སྐྲུན་དང་། ཚ་འདམ་ནས་ལན་ཀྲུ་བར་རླངས་སྣུམ་ལྕགས་མདོང་འདྲེན་མཐུད་ཀྱི་ལས་འཆར་གྱིས་མཚོན་ནུབ་བརྒྱུད་གསར་སྤེལ་གྱི་ལས་གཞི་ཁག་ནི་རྒྱ་རིགས་ཁྱོན་ཆེ་བོད་ཀྱི་ས་ཁུལ་ཁག་ནང་གཏན་གཞི་སྤོ་ཤུགས་ཀྱིས་རིམ་པས་བོད་ཀྱི་སྣོད་བཅུད་ཡོངས་རྫོགས་ལ་དབང་བསྒྱུར་བྱ་རྒྱུའི་རྒྱ་བསྐྱེད་རིང་ལུགས་དང་། མི་སེར་སྤེལ་ཡུལ་གྱི་ཕུགས་ཡུལ་ངན་འཆར་ཞིག་ལས། བོད་དང་བོད་མིར་འཕྲལ་ཕུགས་གང་ལའང་ཕན་ཐོགས་ཡོད་པ་ཞིག་མ་ཡིན་པས་འདི་ནས་ངོ་རྒོལམཐའ་གཅིག་བྱ་རྒྱུ་ཡིན།
དེ་བཞིན་ཕྱི་ལོ་ ༢༠༠༨ ལོའི་འཛམ་གླིང་ཨོ་ལམ་སྤིག་རྩེད་འགྲན་མགྲོན་བདག་གི་ཐོབ་ཐང་རྒྱ་ནག་ལ་འོས་ཐོབ་ཐབས་ཤེས་ཡོད་རྒུ་རྩལ་སྤྲུག་བྱ་མུས་ཀྱང་། རྒྱ་ནག་དབང་འཛིན་པ་ཚོས་བོད་ནང་སོགས་ཀྱི་འགྲོ་བམིའི་ཐོབ་ཐང་བརྩི་མེད་རྡོག་རོལ་བཏང་དང་གཏོང་མུས་ཀྱི་གནས་སྟངས་ལ་རྩེད་འགྲན་གོ་སྒྲིག་འགན་ཁུར་ཚོགས་ཆུང་ནས་དགོངས་བཞེས་ཀྱིས་བཀག་འགོག་ཡོང་བ་དང་། དེ་བཞིན་འཛམ་གླིང་རྒྱ་ཆེའི་མང་ཚོགས་ནས་ཀྱང་འདི་སྐོར་མུ་ཐུད་རྒྱབ་སྐྱོར་ཡོང་བ་ཞུ་རྒྱུ་ཡིན་ཞེས་སོགས་ཀྱི་གསུང་བཤད་གནང་བ་རེད།།
