༢༠༡༠ ཕྱི་ཟླ་ ༦ ཚེས་ ༨ རེས་གཟའ་མིག་དམར།
༄༅། །འདི་གར་སྡེ་ར་ལྡུན་ས་གནས་འགོ་འཛིན་ལས་ཁང་ནས་བཏང་གནས་ནང་གསལ། ཕྱི་ལོ་ ༢༠༡༠ ཟླ་ ༠༤ ཚེས་ ༡༤ ཉིན་ཁམས་སྐྱེ་རྒུ་མདོར་བསམ་ཡུལ་ལས་འདས་པའི་ས་ཡོམ་གྱི་འཇིག་པ་ཆེན་པོ་ཕོག་རྐྱེན་རང་རིགས་བོད་མི་མང་དག་ཅིག་འདས་གྲོངས་གྱུར་བ་དང་དེ་བས་མང་བར་རྨས་སྐྱོན་ཚབས་ཆེ་བྱུང་བའི་བློ་ཕམ་གྱི་གནས་ཚུལ་ཐོན་མ་ཐག་དུ་སྡེ་ར་ལྡུན་གྱི་ཁྱབ་ཁོངས་ས་གནས་ཁག་གི་ནང་དུ་གདུང་སེམས་མཉམ་སྐྱེ་མཚོན་ཆེད་བདུན་ཚིགས་དང་པོ། གཉིས་པ། གསུམ་པ་བཅས་སུ་མཆོད་འབུལ་དང་སྨོན་ལམ་ཞུ་དགོས་གལ་ཆེ་དོན་ཆེ་རྩིས་ཏེ་མཆོད་འབུལ་ཞུས་ཡོད་པ་དང་།
དེ་བཞིན་ཕྱི་ལོ་ ༢༠༡༠ ཟླ་ ༦ ཚེས་ ༡ ཉིན་འདས་པོ་རྣམས་ཀྱི་ཞག ༤༩ འཁེལ་བ་བརྟེན། མུ་མཐུད་ཁྱབ་ཁོངས་ས་གནས་ཁག་གི་ནང་དུ་མཆོད་འབུལ་དང་སྨོན་ལམ་རྒྱ་ཆེ་གནང་སྐྱོང་ཡོང་བའི་གལ་ཆེའི་ལམ་སྟོན་གནང་བ་བཞིན་གོང་ཚེེས་ཉིན་གདུང་སེམས་མཉམ་སྐྱེ་མཚོན་ཆེད་མཆོད་འབུལ་རྒྱ་ཆེ་གནང་ཡོད། དེ་བཞིན་རང་གཞུང་གི་བཀའ་འབྲེལ་ལམ་སྟོན་སྔོན་ཕེབས་ལྟར་སྡེ་ར་ལྡུན་གྱི་ཁྱབ་ཁོངས་བོད་མི་རྣམས་ལ་ཞལ་འདེབས་གང་ཡོང་གནང་ཐབས་ཡོང་བའི་འབོད་སྐུལ་ཞུས་དོན་བཞིན་ས་གནས་མི་མང་རྣམས་ནས་སེམས་ཁུར་ཆེ་བཞེས་ཐོག་སྐྱེ་རྒུ་མདོར་ས་ཡོམ་གྱི་གོད་ཆག་ཕོག་པའི་རང་རིགས་བོད་མི་རྣམས་ཀྱི་ཕྱི་དངོས་པོའི་དཀའ་ངལ་སེལ་ཐབས་དང་། ཕྱོགས་མཚུངས་སྨན་བཅོས་ཚད་ལྡན་ཡོངས་ཐབས་སུ་དམིགས་ནས་ས་གནས་འགོ་འཛིན་བརྒྱུད་རྡ་སར་གསར་འཛུགས་བྱས་པའི་སྐྱེ་རྒུ་མདོ་ས་ཡོམ་གདུང་སེལ་ཚོགས་ཆུང་དུ་ཞལ་འདེབས་ཧིན་སྒོར་ ༢༥༢༡༢༤། བསྡུ་རུབ་ཀྱིས་རྩིས་འབུལ་ཞུས་ཡོད་པ་བཅས།།
