༄༅། །ཕྱི་ལོ་ ༢༠༠༡ ཕྱི་ཟླ་ ༣ ཚེས་ ༡༠ ཉིན་མོ་འདི་ནི་བོད་མི་མང་ལ་ཕྱིའི་བཙན་འཛུལ་ བ་རྒྱ་ནག་དམར་པོའི་གཞུང་གིས་འཆར་གཞི་དང་ལྡན་པའི་ཐོག་ནས་བོད་མི་རིགས་དང་།
རྩ་ཆེའི་ཆོས་དང་རིག་གཞུང་། བོད་ཀྱི་སྲིད་དབང་རྩ་མེད་བཟོ་རྒྱུའི་དྲག་ ཤུགས་དངོས་སུ་བསྟར་བར་བོད་མི་མང་ནས་མ་གྲོས་བསམ་པ་གཅིག་མཐུན་ཐོག་ནས་གཅེས་པའི་ལུས་སྲོག་བློས་བཏང་གིས་སྒེར་ལངས་བྱས་ཏེ་མི་ལོ་ ༤༢ ཧྲིལ་པོ་འཁོར་བའི་དུས་དྲན་བརྗེད་ཐབས་མེད་པ་ཞིག་ཡིན་ཅིང་། སྐབས་དོན་ཞུ་རྒྱུར། ཕྱི་ ལོ་ ༡༩༧༩ ལོར་རྒྱ་ནག་གི་དབུ་ཁྲིད་ཏེང་ཞའོ་ཕིང་ནས་བོད་རྒྱའི་དཀའ་རྙོག་ སེལ་ཕྱོགས་བོད་རང་བཙན་མ་བརྗོད་ན་དེ་མིན་གྱི་གནད་དོན་ཐོག་གྲོས་མོལ་བྱས་ན་འགྲིགས་པ་དང་། གྲོས་མོལ་གྱི་རྒྱལ་སྒོ་ཕྱེས་ཏེ་ཡོད་ཅེས་བརྗོད་ཡོད། དེར་བརྟེན་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༡༩༧༣ ལོ་ཙམ་ནས་བོད་རྒྱ་གཉིས་ཐད་ཀར་གྲོས་མོལ་གྱིས་བོད་ཀྱི་དཀའ་རྙོག་སེལ་རྒྱུའི་དགོངས་བཞེས་ཡོད་པ་ལྟར། འདས་པའི་བོད་ཀྱི་གནས་སྟངས་ཇི་ལྟར་ཡིན་པར་མ་ལྟོས་པར་ད་ལྟའི་བོད་ཀྱི་ཛ་དྲག་དཀའ་ངལ་སེལ་ཐུབ་པ་དང་། བོད་རྒྱ་གཉིས་མ་འོངས་པར་ཕུགས་རྒྱང་རིང་པོར་ཞི་བདེ་མཐུན་གནས་ཡོང་བའི་དགོངས་ཡངས་དཀྱེལ་ཆེའི་གཉིས་སྨན་དབུ་མའི་ཐབས་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་ཐབས་རྒྱ་ནག་ གཞུང་དང་ཐད་ཀར་བཀའ་མོལ་གྱི་ལམ་ནས་ཐབས་ཤེས་འབད་བརྩོན་གནང་ཡོད། འོན་ཀྱང་རྒྱ་ནག་གཞུང་གིས་བོད་ཀྱི་གནད་དོན་འདི་༸གོང་ས་མཆོག་སྐུ་སྒེར་གྱི་ གནད་དོན་ཞིག་ཏུ་སྒྱུར་ཐབས་བྱེད་པ་དང་བོད་ཁྱོན་ཡོངས་ཀྱི་དཀའ་ངལ་གནས་སྟངས་ཁས་ལེན་མ་བྱས་པར་ཡལ་ཡོལ་འབའ་ཞིག་གིས་དུས་ཚོད་འཕུལ་ཐབས་བྱས་པར་བརྟེན། ཕྱི་ལོ་ ༡༩༨༧ ལོར་བོད་རྒྱ་གཉིས་གྲོས་མོལ་གནང་སླད་གཉིས་སྨན་གྱི་དགོངས་གཞི་ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་ཞི་བའི་གྲོས་འཆར་དོན་ཚན་ལྔ་འདོན་གནང་དང་། དེ་རྗེས་ཕ་རན་སིའི་གྲོང་ཁྱེར་སི་ཏྲས་ སི་བག་ཏུ་ཡོ་རོབ་གྲོས་ཚོགས་ཐོག་གོང་གསལ་གྲོས་འཆར་སྐོར་རྒྱས་བཤད་ཀྱི་ གསུང་བཤད་གནང་ཡོད། དེར་རྒྱ་ནག་གཞུང་ནས་བསམ་ཤེས་མ་གནང་ཡང་། ཨ་རིས་གཙོས་པའི་འཛམ་གླིང་རྒྱལ་ཁབ་ཁག་གི་སྲིད་གཞུང་དང་། གྲོས་ཚོགས། གཞུང་འབྲེལ་དང་གཞུང་འབྲེལ་མིན་པའི་རྒྱལ་སྤྱིའི་ཚོགས་པ་ཁག མི་སྒེར་སོགས་མང་པོ་ཞིག་གིས་བསྔགས་བརྗོད་དང་རྒྱབ་སྐྱོར་གནང་བར་མ་ཟད། ཕྱི་རྒྱལ་ཡུལ་ཁག་ཏུ་ཡོད་པའི་རྒྱ་མི་ཤེས་ཡོན་ཅན་དང་མང་གཙོ་དོན་གཉེར་བྱེད་མཁན། དེ་བཞིན་རྒྱ་ནག་ནང་ ཡོད་པའི་རྒྱ་མི་གཟུར་གནས་ཤེས་ཡོན་ཅན་མང་པོ་ཞིག་བཅས་ནས་ཀྱང་ཡི་རང་བསྔགས་བརྗོད་ཀྱིས་རྒྱབ་སྐྱོར་ཞུས་ཡོད། དེའི་ཐོག་ནས་༸གོང་ས་མཆོག་གི་དབུ་མའི་ཐབས་ལམ་འདི་བོད་རྒྱ་ཕྱོགས་གཉིས་ཀའི་མི་མང་ལ་ཁེ་ཕན་ཡོད་པའི་འཚེ་མེད་ཞི་བའི་ལམ་ཕྱོགས་ཡང་དག་ཞིག་ཡིན་པ་ར་འཕྲོད་བྱུང་ཡོད། ཇི་ལྟར་ཡང་རྒྱ་ནག་གཞུང་གི་འགོ་ཁྲིད་ཚོས་རང་འདོད་མཁྲེགས་བཟུང་གིས་ད་ཕན་མི་ལོ་ཉི་ཤུ་རྩ་གཉིས་རིང་༸གོང་ས་མཆོག་གི་འབད་བརྩོན་དང་། རྒྱལ་སྤྱིའི་ཕྱོགས་གང་སའི་རེ་སྐུལ་དང་བསམ་ཚུལ་ལ་ལྟོས་མེད་ཀྱིས་་འོས་པའི་བརྡ་ལན་ཞིག་མ་ཞུས་ ཁར། རྒྱ་ནག་གཞུང་ནས་གཞི་མེད་སྒྲོ་བཏགས་ཀྱིས་༸གོང་ས་མཆོག་གི་འཚེ་མེད་ཞི་བའི་གཉིས་སྨན་གྱི་ཐབས་ལམ་འདི་རང་བཙན་དང་། ཕྱེད་རང་བཙན། རྣམ་པ་འགྱུར་བའི་རང་བཙན་རེད་ཟེར་བ་དང་། དངོས་དོན་དང་མ་འབྲེལ་བའི་སྔོན་འགྲོའི་ཆ་རྐྱེན་གང་བྱུང་བཏོན་ནས་གྲོས་མོལ་གྱི་ལམ་ལས་གཡོལ་ཐབས་བྱས་དང་བྱེད་བཞིན་པ་རེད། ང་ཚོས་བལྟས་ན་བོད་རྒྱ་ཕྱོགས་གཉིས་ཀར་ཞི་བའི་གྲོས་མོལ་ལ་བརྟེན་ནས་བོད་དོན་དཀའ་རྙོག་སེལ་ཐབས་བྱ་རྒྱུ་ལས་དེ་མིན་ལམ་གཞན་མེད་ལ། གནད་དོན་ཐག་གཅོད་ཇི་ཙམ་མགྱོགས་པ་བྱུང་ན་དེ་ཙམ་གྱིས་ཕྱོགས་གཉིས་ཀར་ལེགས་པ་ཡོངས་རྒྱུ་ཡིན། ༡༩༩༣ ཕྱི་ཟླ་ ༧ པ་ཙམ་ནས་རྒྱ་ནག་གཞུང་ནས་འབྲེལ་བ་མཚམས་གཅོད་གནང་ཡང་ང་ཚོའི་ཕྱོགས་ནས་མུ་མཐུད་གོ་སྐབས་ནམ་བྱུང་ལ་འབད་བརྩོན་བྱས་ཀྱང་གྲུབ་འབྲས་གང་ཡང་བྱུང་མེད། དཔེར་ན་སྔ་ལོ་སྐུའི་གཅེན་པོ་རྒྱ་ལོ་དོན་གྲུབ་མཆོག་སྐུ་སྒེར་གྱི་ཐོག་ནས་རྒྱ་ནག་པེ་ཅིང་དུ་ཕེབས་ཡོད་པ་དེ་སྐབས་རྒྱ་ནག་གི་དཔོན་རིགས་ངོ་མཇལ་བྱུང་སྟེ། ཁོ་ཚོའི་ཕྱོགས་ནས་༸གོང་ས་མཆོག་ལ་འབུལ་རྒྱུའི་གནས་འཕྲིན་ཞིག་འབུལ་བསྐུར་ཞུས་འདུག་ཅིང་། དེའི་ནང་དོན་ནི་ད་ཕན་རྒྱ་ནག་གི་དཔོན་རིགས་ཚོས་ཡོངས་གྲགས་བྱས་པའི་ལངས་ཕྱོགས་སྲིད་བྱུས་བསྐྱར་ཟློས་བྱས་པ་ལས། དམིགས་བསལ་གྱི་རེ་བའི་གནས་ཚུལ་གསར་པ་གང་ཡང་མི་འདུག་ཀྱང་ཚུར་འབྲེལ་བྱུང་བའི་གོ་སྐབས་འདི་ང་ཚོས་དམ་འཛིན་བྱས་ཏེ་ཕྱོགས་གཉིས་བར་འབྲེལ་བ་འགོ་འཛུགས་ཡོང་ཐབས་ལ་ལྷག་བསམ་དང་རེ་བ་བཅངས་ཏེ་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་ལ་འབྲེལ་བ་བྱས་པ་དང་། ཁོང་ཚོས་ཕྱོགས་ནས་ ཀ་ཀོར་སྣ་ཚོགས་བཤད་པར་མ་ལྟོས་པར། བོད་ཀྱི་དངོས་ཡོད་དཀའ་ངལ་སེལ་ཐབས་སྐོར་༸གོང་ས་མཆོག་གི་དགོངས་ཡངས་དཀྱེལ་ཆེའི་དགོངས་པ་བཞེས་ཚུལ་ཞིབ་ཕྲ་འཁོད་པ་ཞིག་རྒྱ་ནག་གི་དབུ་ཁྲིད་རྣམ་པར་འབུལ་རྒྱུ་དང་ཆབས་ཅིག་ནང་དོན་གསལ་བཤད་བྱེད་སླད་སྐུ་ཚབ་པེ་ཅིང་དུ་གཏོང་རྒྱུ་གལ་ཆེར་རྩིས་ནས་འབྲེལ་བ་ཞུས་ཡོད། ཡིན་ནའང་རྒྱ་ནག་གི་འགོ་ཁྲིད་ཚོས་ལན་དུ་ཀ་ཀོར་ཁོ་ན་བཤད་པ་དང་། བོད་མི་ས་ཡ་དྲུག་གི་བདེ་སྡུག་དང་འབྲེལ་བའི་བོད་དོན་འདི་༸གོང་ས་མཆོག་སྐུ་སྒེར་གྱི་གནད་དོན་ཞིག་ལ་སྒྱུར་ཐབས་བྱེད་པའི་གཡོ་བྱུས་མཁྲེགས་བཟུང་གིས་དོན་མེད་ཁག་འདོགས་བྱས་ཏེ་ཁས་ལེན་བྱས་མ་བྱུང་། དེར་བརྟེན་རྒྱུན་པར་རྒྱ་ནག་གཞུང་གིས་གྲོས་མོལ་གྱི་སྒོ་ཕྱེས་ཏེ་ཡོད་ཅེས་བརྗོད་པ་འདི་རྒྱལ་སྤྱིའི་གླེང་ཕྱོགས་ལ་མགོ་སྐོར་གཏོང་བའི་རྫུན་གཏམ་ཡིན་པ་དང་། རྒྱ་ནག་གི་འགོ་ཁྲིད་ཚོར་བོད་དོན་དཀའ་རྙོག་སེལ་རྒྱུའི་ལྷག་བསམ་དང་སྙིང་སྟོབས་མེད་པ་ར་འཕྲོད་གསལ་པོ་བྱུང་ཡོད། ༸གོང་ས་མཆོག་གི་ཕྱོགས་ནས་དབུ་མའི་ལམ་ལ་འགྱུར་བ་གང་ཡང་མེད་ཀྱང་། གལ་ཏེ་ད་དུང་རྒྱ་ནག་གཞུང་གིས་ སྟོང་བསམ་འཆང་སྟེ་༸གོང་ས་མཆོག་གི་གཉིས་ཕན་དབུ་མའི་ཐབས་ལམ་ལ་འོས་པའི་བརྡ་ལན་མ་ཞུས་ན། དེ་ལས་བྱུང་བའི་གནས་ཚུལ་གྱི་འགན་རྒྱ་ནག་གཞུང་ལ་ཡོད་པ་རེད། ང་ཚོའི་ཕྱོགས་ནས་རྒྱ་ནག་གཞུང་ལ་སྐུ་ཚབ་གཏོང་རྒྱུའི་རེ་བ་ཞུས་པ་ལྟར་མུ་མཐུད་འབད་བརྩོན་བྱེད་རྒྱུ་ཡིན། ཡིན་ནའང་འགན་ཁུར་བྱེད་མིན་དེ་རྒྱ་ནག་གཞུང་ལ་ཐུག་ཡོད།
བར་ལམ་བོད་རང་སྐྱོང་ལྗོངས་ཟེར་བའི་འགོ་ཁྲིད་བརྗེ་པོ་བརྒྱབ་རྗེས་ཀྱང་བོད་ནང་གི་གནས་སྟངས་ ཆེས་ཐབས་སྡུག་ཛ་དྲག་ཇེ་ཆེར་གཏོང་བ་ལས་བཟང་པོར་འགྱུར་བའི་རྣམ་འགྱུར་གང་ ཡང་མེད། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་ལ་གཞི་མེད་ཀྱི་མཚན་སྨོད་ཞུ་བ་དང་། བོད་ཀྱི་ཆོས་དང་རིག་གཞུང་དང་སྐད་ཡིག་ནི་བོད་རྒྱ་ཐ་དད་ཡིན་པའི་ངོ་བོ་མཚོན་བྱེད་ཅིག་ཡིན་སྟབས་དེར་སྒོ་ཀུན་ནས་དམ་དྲག་གཉའ་གནོན་བྱེད་པ། བོད་མི་མང་གིས་རང་གི་བདེ་སྡུག་དང་འབྲེལ་བའི་གནས་ལུགས་བཤད་ན་ཆབ་སྲིད་དང་འབྲེལ་བ་ཡོད་མིན་ལ་མ་ལྟོས་པར་ཁ་བྲལ་གྱི་ཉེས་ མིང་བཀལ་ཏེ་ཆད་གཅོད་བྱེད་པ། མདོར་ན་འགྲོ་བ་མིའི་ཐོབ་ཐང་ལྟ་ཅི། རྒྱ་ནག་རང་ཉིད་ཀྱི་རྩ་ཁྲིམས་ནང་གསལ་བའི་མི་རིགས་འདྲ་མཉམ་དང་ཆོས་དད་རང་མོས་ཟེར་བ་དེ་ཡང་རྩ་བ་ནས་མ་རེད། ལྷག་པར་སྔ་ལོ་ནས་བཟུང་ཚབ་བྱེད་གསུམ་ཟེར་བའི་ཆབ་སྲིད་ཀྱི་ལས་འགུལ་ཞིག་རྒྱ་ནག་ཁྱོན་ཡོངས་ལ་སྤེལ་བ་དེ་དག་བོད་ནང་སྤེལ་སྐབས་ཁ་བྲལ་རིང་ལུགས་པ་ཟེར་བ་གཙོ་གནད་དུ་བཟུ
ང་བ་དང་། གཞི་རིམ་ལས་བྱེད་པས་མི་ཆོག་པ་བཞི་སྟེ། ཆོས་ལ་དད་པ་བྱེད་མི་ཆོག་པ་དང་། ཁྱིམ་ཚང་ནང་མཆོད་གཤོམས་དང་༸གོང་ས་མཆོག་གི་སྐུ་པར། དར་ལྕོག་སོགས་ཆོས་ལུགས་ཀྱི་མཚན་རྟགས་ཉར་མི་ཆོག་པ། ཆོས་ལུགས་དང་བཀས་བཀོད་རྒྱུད་འཛིན་རྨོངས་དད་ཀྱི་བྱེད་སྒོར་ཞུགས་མི་ཆོག་པ། ཕྲུ་གུ་མངའ་ཁོངས་ཕྱི་རོལ་གྱི་སློབ་གྲྭར་གཏོང་མི་ཆོག་པ། གཞན་ཡང་ལྟ་བ་བཞིའི་སློབ་གསོ་ཟེར་བ་དང་ཆབས་ཅིག་ལས་འགུལ་སྤེལ་རྒྱུའི་འགོ་ཚུགས་པ་མ་ཟད། བོད་ནང་གྲོང་བརྡལ་ཡན་གྱི་གཙོ་བོའི་འགོ་ཁྲིད་ཚང་མ་རྒྱ་རིགས་བསྐོ་གཞག་བྱེད་འགོ་ཚུགས་ཀྱི་ཡོད་རེད། ད་ལམ་ཕྱི་ཟླ་ ༣ ཚེས་ ༥ ཉིན་པེ་ཅིང་དུ་རྒྱ་ནག་མི་མང་འཐུས་ཚོགས་ཀྱི་ཚོགས་ཆེན་ཚོགས་ཡོད་པ་དེའི་དགོང་མོ་སྲིད་འཛིན་གཞོན་པ་ཧུའུ་ཅིང་ཐའོ་ཡིས་བོད་ལྗོངས་ཀྱི་འཐུས་མི་ཚོགས་པ་ཟེར་བར་ཐུག་འཕྲད་གཏམ་བཤད་བྱས་པའི་ནང་ཁ་བྲལ་གྱེན་ལངས་སོགས་སྤྱི་ཚོགས་བརྟན་ལྷིང་མི་ཡོང་བའི་རྒྱུ་རྐྱེན་མཐའ་དག་ལ་བློ་བརྟན་འགྱུར་མེད་ཀྱིས་འཐབ་རྩོད་བྱ་རྒྱུ་འདི་ཚད་མཐོའི་ཆབ་སྲིད་ཀྱི་གལ་ཆེའི་ལས་དོན་དུ་བཟུང་ནས་དམ་འཛིན་ཧ་ཅང་ནན་པོ་བྱེད་དགོས་པ་དང་། ཁ་བྲལ་གྱི་ལས་འགུལ་མཐའ་དག་ལ་སྲིད་ཁྲིམས་ཀྱི་ཐོག་ནས་དོ་དམ་དང་། རྡུང་རྡེག་ནན་པོ་གཏོང་དགོས་ཞེས་བརྗོད་འདུག་གནས་ཚུལ་དེ་དག་ལ་གཞིགས་ན་བོད་ནང་གནས་ཚུལ་ཛ་དྲག་ཏུ་འགྲོ་རྒྱུ་ངེས་པ་ལྟར་དེ་ལུགས་འདི་ཕྱོགས་རང་རེའི་ཆབ་སྲིད་ཀྱི་ལས་འགན་ལྕི་རུ་འགྲོ་བཞིན་ཡོད་པས། གནས་ཚུལ་ལ་གཞིགས་ཏེ་རྒྱལ་སྤྱིའི་ཐོག་ལས་འགུལ་སྤེལ་རྒྱུའི་གྲ་སྒྲིག་དགོས་རྒྱུ་གལ་ཆེན་པོ་ཡིན། རྒྱལ་སྤྱིའི་ཁྱོན་ནས་མི་ལོ་སྟོང་ཕྲག་གསུམ་ལྷག་གི་ལོ་རྒྱུས་ཡོད་པའི་རྒྱལ་སྤྱིའི་ཁྱིམ་ཚང་གི་ཁྱིམ་མི་གཅིག་རྩ་མེད་དུ་གཏོང་བའི་རྒྱ་གཞུང་གི་སྲིད་བྱུས་དང་བྱེད་ཕྱོགས་ལ་འཆར་ཅན་ཡིན་དབང་དུ་མ་བཏང་བར་ཛ་དྲག་ནུས་ལྡན་གྱི་ཕྱག་བཞེས་གནང་དགོས་པའི་འབོད་སྐུལ་ཞུ་རྒྱུ་ཡིན། རྒྱ་ནག་གཞུང་གིས་བཙན་དབང་གདུག་རྩབ་དང་འཁྱོག་བཤད་ཀྱིས་བོད་རང་བཙན་འཐབ་རྩོད་ཉམས་དམས་སུ་གཏོང་རྒྱུའི་སྲིད་བྱུས་དེའི་ངན་འབྲས་རྒྱ་ནག་གཞུང་གི་མགོ་སྟེང་དུ་ལྷུང་རྒྱུ་ལས་དེ་མིན་གྱི་རྒྱལ་ཁའི་གྲུབ་འབྲས་ཡོང་མི་སྲིད་པ་རེད།
རྒྱ་ནག་གཞུང་གིས་ནུབ་རྒྱུད་ཐོན་འབྱེད་ཆེན་མོ་ཟེར་བའི་འཛུགས་སྐྲུན་གྱི་ལས་འཆར་གཞི་རྒྱ་ཆེན་པོ་ཞིག་སྤེལ་བཞིན་ཡོད་པ་དེའི་ཁོངས་སུ་གངས་ལྗོངས་བོད་ཀྱི་ས་ཁུལ་ཁག་ཀྱང་ཚུད་ཡོད་པ་རེད། དེར་བརྟེན་ང་ཚོའི་ངོས་ནས་བོད་མི་མང་ལ་ཁ་ཡོད་ལག་ཡོད་ཀྱི་ཕན་ཐོགས་ཡོད་པའི་འཛུགས་སྐྲུན་གང་ཞིག་ཀྱང་རྒྱལ་སྤྱིའི་ནང་ནས་སུས་མ་རྩ་འཇོག་པ་དང་། རོགས་པ་བྱེད་པར་དགའ་བསུ་བྱེད་རྒྱུ་ཡིན། འོན་ཀྱང་བོད་ནང་མེ་འཁོར་ལྕགས་ལམ་འཛུགས་རྒྱུ་ལྟ་བུ་ཡར་རྒྱས་ཀྱི་འཛུགས་སྐྲུན་ལ་མིང་བཏགས་ཏེ་དོན་དུ་རྒྱ་མི་མང་པོ་བོད་ནང་གནས་སྤོས་དང་། བོད་ཀྱི་ཕུན་སུམ་ཚོགས་ པའི་གཏེར་དངོས་རྒྱ་ནག་ནང་དབོར་འདྲེན། བོད་ཡུལ་རྒྱ་ཡུལ་ཅན་དུ་སྒྱུར་བ་སོགས་ཀྱི་ལས་འགུལ་མཐའ་དག་ལ་ངོ་རྒོལ་བྱ་རྒྱུ་ཡིན། དེ་ལུགས་འཛམ་གླིང་རྒྱལ་ཁབ་ཁག་གི་སྲིད་གཞུང་དང་། རྒྱལ་སྤྱིའི་ཚོགས་སྡེ་ཁག་གིས་བོད་ནང་གི་འཛུགས་སྐྲུན་ལས་གཞིར་རྒྱབ་སྐྱོར་གནང་སྐབས་ངེས་པར་དུ་དེའི་ཕན་འབྲས་ལ་ཞིབ་འཇུག་ནན་པོ་གནང་སྟེ་བོད་ཀྱི་རིག་གཞུང་དང་བོད་མི་རིགས་ཀྱི་ངོ་བོ་རྩ་མེད་བཟོ་བ་དང་། དཔལ་འབྱོར་དང་ཁོར་ཡུག་རྩ་བརླག་གཏོང་བའི་ལས་གཞི་ལ་རྒྱབ་སྐྱོར་མ་གནང་རོགས་ཞེས་འབོད་སྐུལ་ནན་པོ་ཞུ་རྒྱུ་དང་། ད་ཕན་འཛུགས་སྐྲུན་ལས་གཞིའི་ཐད་བཙན་བྱོལ་བོད་གཞུང་གི་རྒྱུས་སྟོན་ཡིག་ཆ་རྩ་འཛིན་གནང་མཁན་དང་། ང་ཚོར་རྒྱབ་སྐྱོར་གནང་མཁན་མཐའ་དག་ལ་ཐུགས་རྗེ་ཆེ་ཞུ་རྒྱུ་ཡིན།
ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་མཆོག་གིས་གཙོས་པའི་རྒྱའི་བཙོན་ཁང་ནང་ཡོད་པའི་བོད་ཀྱི་ཆབ་སྲིད་བཙོན་པ་ཚོའི་ལུས་སྲོག་ལ་ཉེན་ཁ་ཤིན་ཏུ་ཆེ་བའི་ནང་གནས་ཡོད་པས་སྲིད་གཞུང་ཁག་དང་། གྲོས་ཚོགས་ཁག གཞུང་འབྲེལ་མིན་པའི་ཚོགས་པ་ཁག བོད་དོན་རྒྱབ་སྐྱོར་ཚོགས་པ། མི་མང་བཅས་ནས་སྔར་ལྷག་གི་ནུས་པ་ལྡན་པའི་རྒྱབ་སྐྱོར་གནང་རོགས་ཞེས་ཞུ་རྒྱུ་ཡིན།
སྤྱི་ནོར་༧གོང་ ས་༸སྐྱབས་མགོན་ཆེན་པོས་རང་རེའི་བཙན་བྱོལ་གཞུང་འདི་མང་གཙོའི་ལམ་གྱི་ཐོག་ཏུ་སྣེ་ཁྲིད་གནང་ནས་ད་བར་མི་ལོ་བཞི་བཅུ་ལྷག་ཙམ་སོང་བ་དེའི་ རིང་གི་ཡར་རྒྱས་ཀྱི་བསྒྱུར་བཅོས་རིམ་པ་གནང་ཡོད་པ་དང་། འདི་ལོ་ནས་མང་གཙོ་དེ་བས་ཤུགས་ཆེ་རུ་གཏོང་བ་གནང་རྒྱུ་ཡིན་པ་སྟེ། འཛིན་སྐྱོང་བཀའ་ཤག་གི་བཀའ་བློན་འོས་འདེམས་བྱེད་ཕྱོགས་ལ་འགྱུར་བ་གནང་ནས་བཀའ་བློན་ཁྲི་པའི་འོས་གཞི་གཉིས་ལས་མི་ཉུང་བ་ཞིག་༸གོང་ས་མཆོག་ནས་འདོན་པ་གནང་རྒྱུ་དེ་ནས་སྤྱི་འཐུས་ལྷན་ཚོགས་ཀྱིས་བཀའ་བློན་ཁྲི་པ་གཅིག་འོས་འདེམས་གནང་རྒྱུ་དང་། འོས་འདེམས་བྱུང་བའི་བཀའ་བློན་ཁྲི་པས་བཀའ་བློན་གཞན་གྱི་འོས་མི་བཏོན་ཏེ་སྤྱི་འཐུས་ལྷན་ཚོགས་ནས་རྒྱབ་སྐྱོར་ཐོབ་པ་གནང་རྒྱུའི་འཆར་གཞི་ཡོད་པ་ཡིན། དེར་བརྟེན་རིང་མིན་བོད་མི་མང་སྤྱི་འཐུས་འོས་འདེམས་བྱ་རྒྱུ་འདི་ཧ་ཅང་གལ་ཆེའི་གནད་འགག་ཐུག་ཡོད་པས། རྒྱ་ཆེའི་མི་མང་ནས་སྤྱི་འཐུས་ལྷག་བསམ་ཤེས་ཡོན་གཉིས་ལྡན་གྱི་སྤྱི་མི་ཚད་ལྡན་འོས་འདེམས་ཐུབ་པ་གནང་རྒྱུ་གལ་ཆེན་པོ་ཡིན།
རྒྱ་གར་གཞུང་དང་མི་མང་གིས་གཙོས་པའི་བོད་མིར་ཤ་ཚ་ཅན་གྱི་སྲིད་གཞུང་དང་། གྲོས་ཚོགས། ཚོགས་སྡེ་ཁག ཤེས་ཡོན་ཅན། གསར་འགྱུར་ལས་རིགས་མི་སྣ། མི་མང་། སློབ་ཕྲུག རྒྱ་རིགས་བཅས་ལ་གོ་སྐབས་འདི་ཐོག་ནས་ཐུགས་རྗེ་ཆེ་ཞུ་རྒྱུ་ཡིན་ཅིང་།
མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་། ཐུགས་ཀྱི་བཞེད་དགོངས་མཐའ་དག་ལྷུན་གྱི་གྲུབ་པའི་སྨོན་འདུན་ཞུ་རྒྱུ་བཅས།
བོད་གཞུང་བཀའ་ཤག་ནས་ཕྱི་ལོ་ ༢༠༠༡ ཕྱི་ཟླ་ ༣ ཚེས་ ༡༠ ལ།། །།
