༢༠༡༠ ཕྱི་ཟླ་ ༦ ཚེས་ ༢༢ རེས་གཟའ་ཟླ་བ།

༄༅། །ཕྱི་ལོ་ ༢༠༡༠ ཟླ་ ༦ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སེ་ཛོ་ཀ་ཡོ་ཧུ་ཀོ་ཨིན་ཊོ་ (Saizo Kyo Houkyo Into) ས་གནས་སུ་བཞེངས་པའི་ཉི་ཧོང་དང་བོད་ལུགས་ཟུང་འབྲེལ་ཐོག་བཞེངས་པའི་མཆོད་རྟེན་གྱི་འཛིན་སྐྱོང་གནང་མི་གཙོ་བོ་རྣམས་ནས་ཇི་ལྟར་གསོལ་འདེབས་ཞུས་དོན་བཞིན་ས་གནས་དེར་ཆིབས་སྒྱུར་བཀའ་དྲིན་བསྐྱངས་ཡོད། དེ་ཡང་ཉིན་དེའི་སྔ་དྲོ་ཆུ་ཚོད་ ༩།༣༠ ཐོག་སེ་ཛོ་ཀ་ཡོ་ཧུ་ཀོ་ཨིན་ཊོ་ཞེས་པའི་ས་གནས་ཀྱི་ཉེ་འདབས་སུ་ཉི་ཧོང་དང་བོད་ལུགས་ཟུང་འབྲེལ་ཐོག་ཕྱི་ལོ་ ༡༩༦༤ ལོར་ཚ་རོང་ཚེ་རིང་སྒྲོལ་མ་ལགས་དང་། སྐུ་ཞབས་བསོད་ནམས་རྒྱ་མཚོ་ལགས། མཁས་བཙུན་བཟང་པོ་རིན་པོ་ཆེ་མཆོག ཉི་ཧོང་གི་སྐུ་ཞབས་དེ་སྔ་སྐུ་ཕྲེང་བཅུ་གསུམ་པའི་སྐབས་སེ་ར་དགོན་དུ་སློབ་སྦྱོང་གནང་མྱོང་བ་ཊོ་ཀན་ཊ་ཌ་ Tokan Tada ལགས་དང་།

དེ་མིན་ཉི་ཧོང་བ་ཤུ་ཛོ་ཨོ་ཀུ་ཌ་ ?Shozo Okuda བཅས་ཁོང་ལྔ་ནས་འཛམ་གླིང་ཞི་བདེའི་ཆེད་དུ་བཞེངས་པའི་མཆོད་རྟེན་ཡོད་ས་དེར་མགོན་པོ་གང་ཉིད་མཆོག་༸ཞབས་སོར་འཁོད་ནས་གནས་གཟིགས་དང་གསོལ་འདེབས་སྨོན་ལམ་མཛད་ཡོད་པ་མ་ཟད། འཛིན་སྐྱོང་གནང་མི་རྣམས་ལ་དམིགས་གསལ་མཇལ་ཁ་དང་བཀའ་སློབ་ཕེབས་དོན། ད་ཆ་མཆོད་རྟེན་འདི་བཞེངས་མཁན་རྣམས་འདས་ཟིན་ཏེ་མེད་པ་རེད། ཡིན་ནའང་ཁོང་ཚོའི་སེམས་བསྐྱེད་བཟང་པོ་དང་སྨོན་ལམ་བརྒྱབ་ཡོད་པ་དེ་དག་ད་ལྟའི་ཆར་ཡང་གསོན་པོར་གནས་ཡོད། དེར་བརྟེན་ཁྱེད་ཚོས་འདིར་མུ་མཐུད་དེ་གནང་བཞིན་ཡོད་པར་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་ཕེབས་རྗེས་མཆོད་རྟེན་འཛིན་སྐྱོང་གནང་མི་གཙོ་བོ་རྣམས་ལ་དཀར་གཙང་གི་མཇལ་དར་གསོལ་སྩལ་མཛད་པ་དང་སྦྲགས་ཐུགས་བརྩེ་ཆེན་པོས་ལྷན་དུ་སྐུ་པར་ཡང་བསྒྲོན་ཡོད། སྐབས་དེར་མཆོད་རྟེན་འཛིན་སྐྱོང་ཞུ་མི་གཙོ་བོའི་གྲས་ཀྱི་མི་ཞིག་ནས་༸གོང་ས་མཆོག་ལ་སྙན་སྒྲོན་ཞུས་དོན། ༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་ས་གནས་འདིར་ཆིབས་སྒྱུར་བསྐྱངས་པར་བཀའ་དྲིན་ཆེ་ཞུ་རྒྱུ་དང་། ད་རེས་མཆོད་རྟེན་འདི་བཞེངས་མཁན་རྣམས་འདིར་ཡོད་ན་སྤོབས་སེམས་ཆེན་པོ་སྐྱེ་རྒྱུ་རེད་སོགས་ཁོང་ཚོའི་གནས་སྟངས་སོགས་སྙན་སྒྲོན་ཞུས་ཡོད། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སེ་ཧོ་ཇི་དགོན་ཡོད་སར་ཆིབས་༸ཞལ་བསྒྱུར། དེ་བཞིན་འཛམ་གླིང་ཞི་བདེ་ཆེད་དུ་བཞེངས་པའི་མཆོད་རྟེན་དེའི་མདུན་དུ་ལོ་ལྟར་མི་གྲངས་ ༨༠ བརྒལ་བ་རྣམས་ཐེངས་གཉིས་རེ་འཛོམས་ཏེ་འཛམ་གླིང་ཞི་བདེའི་ཆེད་སྨོན་ལམ་ཚོགས་ཀྱི་ཡོད་པ་རེད།།