༄༅། །དེ་རིང་འདིར་གཞིས་བྱེས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད། འཇིག་རྟེན་ཞི་བདེའི་དེད་དཔོན། སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་པར་གྲགས་པའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་བསྐྱངས་པའི་དུས་དྲན་དགའ་སྟོན་དང་། རྒྱལ་སྤྱིའི་ཧི་མ་ལ་ཡའི་དུས་སྟོན་སྲུང་བརྩི་ཆབས་ཅིག་གནང་བའི་མཛད་མགོན་དུ་ཆིབས་བསྒྱུར་བསྐྱངས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མི་ཕྱེད་དད་པས་སྒོ་གསུམ་ལྷ་ཕྱག་གྲངས་མེད་སྔོན་དུ་སོང་ནས། ཁལ་མུག་ཡུལ་གྱི་དཔལ་ལྡན་སྲིད་འཛིན་སྐུ་ཞབས་ Kirsan Iiumjhinov མཆོག་ལ་འཚམས་འདྲི་གུས་བསུ་ཞུ་རྒྱུ་དང་། དེ་བཞིན་མཛད་སྒོའི་སྐུ་མགྲོན་གཙོ་བོ་ཀང་ར་རྫོང་དཔོན་སྐུ་ཞབས་བྷ་རཊ་ཁེ་ར་མཆོག སྐྱབས་གནས་དགེ་འདུན་གྱི་སྡེ། དཔལ་ལྡན་རང་གཞུང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེན་མོས་དབུས་ཁྲིམས་ཞིབ་པ་ལས་ཟུར་རྣམ་པ། དཔལ་ལྡན་བཀའ་བློན་ཁྲི་པས་དབུས་བཀའ་བློན་ལས་ཟུར་རྣམ་པ། ཕྱག་སྦྲེལ་དཔལ་ལྡན་ཚོགས་གཞོན་གྱིས་དབུས་སྤྱི་འཐུས་ལས་ཟུར་རྣམ་པ། རང་དབང་ཅན་སྡེ་ཚན་ཁག་གི་འགན་འཛིན་ལས་ཟུར་རྣམ་པ། དྲུང་ཆེ་ཆུང་གིས་དབུས་གཞུང་ཞབས་ལས་ཟུར་ཆེ་ཕྲ། རྡ་ས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་མཆོག་དང་ཚོགས་མི་རྣམ་པ། རྡ་ས་ས་གནས་འཐུས་མི་ཚོགས་འདུའི་ཚོགས་གཙོ་དང་ཚོགས་མི་རྣམ་པ། རྡ་ས་ས་གནས་འགོ་འཛིན། རྡ་ས་བོད་ཁྱིམ་གྱི་སྤྱི་ཁྱབ་འགན་འཛིན། ས་གནས་རང་བདེན་ཚོགས་ཆུང་གི་ཚོགས་མི་རྣམ་པ། སྡེ་ཚན་ཁག་གི་འགན་འཛིན་རྣམ་པ། སློབ་གྲ་ཁག་གི་སློབ་སྤྱི་དགེ་ལས་རྣམ་པ། གཞུང་འབྲེལ་མ་ཡིན་པའི་ཚོགས་པ་ཁག་གི་འགན་འཛིན་ཚོགས་མི་རྣམ་པ། རྒྱ་ཆེའི་མང་ཚོགས་དང་། བོད་མིར་དགའ་ཞེན་ཅན་གྱི་ཕྱི་རྒྱལ་བ་རྣམ་པ། བརྩེ་བའི་སློབ་ཕྲུག་རྣམ་པ་བཅས་ལ་གཟི་བརྗིད་དང་ལྡན་པའི་ཉིན་མོ་འདིར་ཕྲན་གྱིས་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་དགའ་སེམས་འཁོལ་བའི་ངང་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན།
དེ་རིང་ནི་རང་ཅག་ཁ་བ་རི་པའི་སྐྱེ་འགྲོ་རྣམས་སྨོས་ཅི། འཛམ་གླིང་ནང་མང་གཙོ་དང་རང་དབང་ཞི་བདེར་དགའ་བའི་སྐྱེས་བུ་ཡོངས་ནས་དགའ་སྐྱིད་འོས་པའི་ཉིན་མོགལ་ཆེ་ཞིག་ཡིན་ཞིང་། དེ་ཡང་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལོ་ ༡༩༨༩ ལོར་འཇིག་རྟེན་ཞི་བདེའི་དེད་དཔོན་ཆེན་པོར་མངའ་གསོལ་གྱིས་འཛམ་གླིང་ནང་སྙན་གྲགས་ཆེ་ཤོས་ནོར་ཝེ་ཡུལ་གྱི་ནོ་སྦེལ་ཞི་བའི་གཟེངས་རྟགས་ཞེས་ཡོངས་སུ་གྲགས་པ་དེ་བཞིན་འབུལ་བཞེས་བསྐྱངས་ཏེ་ལོ་ ༡༧ འཁོར་བའི་དུས་དྲན་ཁྱད་འཕགས་ཅན་ལ་སོང་མགོན་པོ་གང་གི་གསང་གསུམ་མཛད་འཕྲིན་བསམ་གྱིས་མི་ཁྱབ་པ་བསྐྱངས་དང་སྐྱོང་བཞིན་པར་དགའ་དད་སྤྲོ་གསུམ་གྱི་ཐོག་ནས་གུས་བཀུར་ཆེ་བསྟོད་དང་། བཀའ་དྲིན་རྗེས་དྲན་ཞུ་རྒྱུ་ཡིན།
༸གོང་ས་༸སྐྱབས་མགོན་ཆེན་པོར་ནོ་སྦེལ་ཞི་བའི་གཟེངས་རྟགས་ཕུལ་བའི་དགོས་དམིགས་ནི། རྒྱ་ནག་དམག་དཔུང་གིས་བོད་རྒྱལ་ཁམས་ཡོངས་རྫོགས་དྲག་པོས་བཙན་བཟུང་བྱས་རྐྱེན་༸གོང་ས་མཆོག་གིས་དབུས་བོད་མི་ཁྲི་ཚོ་མང་པོརྒྱ་གར་འཕགས་པའི་ཡུལ་གཙོ་བོར་གྱུར་བའི་རྒྱལ་ཁབ་མང་དག་ནང་དུ་སྲིད་དོན་སྐྱབས་བཅོལ་ལ་མ་ཕེབས་མཐུ་མེད་བྱུང་བ་ནས་བཟུང་ལོ་ངོ་བཅུ་ཕྲག་གསུམ་རིང་བོད་མིའི་རང་དབང་སླར་གསོའི་ལས་ཐབས་གང་ཅིར་བདག་ཅག་གི་སྟོན་པ་ཐུབ་པའི་དབང་པོས་ལེགས་པར་གསུངས་པའི་དམ་པའི་ཆོས་ཀྱི་དགོངས་དོན་དང་། བདག་ཉིད་ཆེན་པོ་གྷན་རྡིའི་ཆབ་སྲིད་ཀྱི་བཞེད་པ་འཚེ་མེད་ཞི་བའི་ལྟ་གྲུབ་དང་མཐུན་པའིཐོག་རྒྱ་ནག་སྲིད་གཞུང་ལ་མེས་འཚིགས་མེར་གཏུགས་དང་ལན་དགུ་ཆད་མཐུད་ཀྱི་འབྲེལ་ལམ་རྒྱུན་བསྲིངས་གནང་སྟེ་བོད་རྒྱའི་དཀའ་རྙོག་ཞི་མཐུན་འགྲིག་འཇགས་ཡོང་བའི་ཐུགས་ཁུར་ཆེ་བཞེས་མཛད་ཅིང་། དེ་འབྲེལ་བཙན་བྱོལ་གྱི་གནས་སྟངས་ཆ་ནས་གང་ཅིའི་མཐུན་རྐྱེན་མ་འཛོམས་པའི་དཀའ་ཚེགས་དུ་མ་ཇི་འཕྲད་ལ་ཡིད་ཞུམ་བག་ཚ་མེད་པར་བོད་མིའི་ངོ་བོ་མཚོན་པའི་ཆོས་རིག་དང་། སྐད་ཡིག ཡུལ་གོམས་གཤིས་ལུགས་སོགས་མི་ཉམས་རྒྱུན་འཛིན་དང་། བོད་མི་སྐྱབས་བཅོལ་བ་རྣམས་རང་བཞིན་ཁ་འཐོར་དུ་མི་འགྲོ་བའི་འཚོ་རྟེན་གཞིས་བཟོ་དང་། ཤེས་ཡོན་སློབ་གཉེར་ཁང་། དགོན་སྡེ་ཆོས་སྒར། ཁྱད་པར་མང་གཙོའི་གཞུང་གསར་འཛུགས་སོགས་རང་དབང་སླར་གསོའི་རྨང་གཞི་སྲ་བརྟན་བཀོད་བསྒྲིགས་ཀྱིས་སྐྱབས་བཅོལ་བའི་སྒྲིག་འཛུགས་འདྲ་འདྲའི་ནང་ནས་མི་འདྲ་བར་ཡར་རྒྱས་འབུར་ཐོན་ཀུན་གྱིས་བསྔགས་ཡུལ་ཞིག་འཚོ་གནས་ཐུབ་ཅིང་། ཡངས་པའི་རྒྱལ་ཁམས་ཀུན་ཏུ་འཁྲུག་རྩོད་ཞི་ཞིང་། རང་དབང་བདེ་སྐྱིད་རྫོགས་ལྡན་གྱི་དཔལ་ལ་རོལ་ཆེད་སྐུ་ངལ་བརྒྱ་ཕྲག་ལྷུར་བཞེས་ཀྱིས་ཤར་ནུབ་ཡུལ་གྲུ་མང་པོར་ཡང་ནས་ཡང་དུ་ཆིབས་སྒྱུར་བཀྲིན་བསྐྱངས་ཏེ་བྱམས་སྙིང་རྗེ་དང་། བཟོད་བསྲན། རང་ལས་གཞན་གཅེས་ཀྱིས་མཚོན་ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པའི་སྤྱོད་ཚུལ་བཟང་པོ་རྣམས་དོན་ཟབ་ལ་གོ་སླ་བའི་གདུལ་བྱ་རྣམས་ཀྱི་རྒྱུད་ཐོག་ཏུ་སྨིན་པ་བསླབ་འདོམས་ཆེ་བསྐྱེད་ཐོག གཞན་ཡང་འཛམ་གླིང་ནངཆོས་ལུགས་མི་འདྲ་བ་ནང་ཁུལ་མཐུན་ལམ་དམ་གཙང་ཆིག་སྒྲིལ་ངང་ཞི་བདེ་ཡུན་གནས་ཡོང་ཐབས་སུ་ཐུགས་ཁུར་ཆེན་པོ་མཛད་པ་སོགས་མདོར་ན་བོད་དོན་བདེན་མཐའ་གསལ་ཐབས་དང་། འཛམ་གླིང་ནང་ཞི་བདེ་འབྱུང་ཐབས་བཅས་པར་འཚེ་མེད་ཞི་བའི་ལྟ་གྲུབ་ལས་མ་འགལ་བའི་མཛད་བཟང་ཁྱད་འཕགས་ཅན་ལ་ངོ་མཚར་སྐྱེས་ཏེ་ནོ་སྦེལ་ཞི་བའི་གཟེངས་རྟགས་ཀྱིས་གཙོས་གཟེངས་རྟགས་མང་པོ་ཞིག་སྔ་རྗེས་རིམ་ཅན་དུ་འབུལ་བཞེས་གནང་བ་མ་ཟད། ཉེ་བའི་ཆར་ཡང་ཁེ་ན་ཌའི་རྒྱལ་ཡོངས་གྲོས་ཚོགས་ནས་རྒྱལ་ཁབ་ཀྱི་མཚན་མཐོང་ཆེ་ཤོས་ཡུལ་མིའི་མཚན་གནས་དང་། དེ་བཞིན་ཨ་རིའི་རྒྱལ་ཡོངས་གྲོས་ཚོགས་ནས་གསེར་གྱི་རྟགས་མའི་གཟེངས་བསྟོད་བྱ་དགའ་འབུལ་རྒྱུར་ཁྲིམས་ཡིག་གཏན་འབེབས་ཟིན་པ། ལྷག་པར་དེ་རིང་འདིར་རུ་སུའི་ཁོངས་ཀལ་མུག་གི་དཔལ་ལྡན་སྲིད་འཛིན་མཆོག་དང་། གྲོས་ཚོགས་ཀྱི་ཚོགས་གཙོས་དབུས་གཞུང་འབྲེལ་སྐུ་ཚབ་ཚོགས་ཆུང་ཆེད་ཕེབས་ཀྱིས་ཡུལ་གྱི་གཟེངས་རྟགས་མཐོ་ཤོས་ པལྨ་དཀར་པོའི་གོ་གནས་ ཞེས་པ་དེ་འབུལ་གཏན་འཁེལ་བར་དགའ་བསུ་ཆེན་པོས་ཐུགས་རྗེ་ཆེ་ཞེས་ཞུ་རྒྱུ་དང་། གོང་གསལ་ཆེ་བསྟོད་གཟེངས་རྟགས་འདི་རྣམས་ཀྱིས་ནི་འཛམ་གླིང་ཡུལ་ཁག་དང་མང་ཚོགས་ནས་༸གོང་ས་མཆོག་ལ་གུས་བཀུར་ཆེ་བསྟོད་དང་གདེང་འཇོག་ཇི་ལྟར་ཞུ་གི་ཡོད་མེད་ཀྱི་རང་རྟགས་གསལ་མངོན་དང་། ༸གོང་ས་མཆོག་གི་མཛད་པ་འཕྲིན་ལས་ཇི་ཙམ་རྒྱས་པ་དེ་ཙམ་གྱིས་འཛམ་གླིང་མང་ཚོགས་ནས་བོད་དོན་བདེན་པའི་གནས་ལུགས་ཤེས་རྟོགས་གོང་མཐོར་འགྲོ་བ་དང་ཆབས་ཅིག་བདེན་རྒྱབ་དཔུང་གནོན་རྒྱ་ཆེར་འགྲོ་མུས་བཅས་ལ་བརྟེན་རང་རེ་ཚང་མ་དགའ་སྤོབ་བྱ་འོས་ཤིག་ཡིན་པ་མ་ཟད། སླད་ཀྱང་༸གོང་ས་མཆོག་གི་མཛད་འཕྲིན་དབྱར་གྱི་ཆུ་གཏེར་བཞིན་དུ་གོང་ནས་གོང་འཕེལ་དང་། འདི་ལོ་དགུང་སྐེག་སྔ་བསུ་དང་རྗེས་ལོ་དངོས་གཞིའི་སྐབས་སོ་སོར་ཚུལ་བསྟན་སྐུ་བགེགས་འགལ་རྐྱེན་གྱི་མཚན་མ་ཐམས་ཅད་རང་སར་ཞི་ཞིང་། ཐུགས་བཞེད་ལྷུན་གྱིས་འགྲུབ་པའི་མཆོག་གསུམ་རྒྱལ་བ་རྒྱ་མཚོར་གསོལ་འདེབས་སྨོན་ལམ་ཤུགས་དྲག་ཞུ་རྒྱུ་དང་། གཞུང་མང་གཉིས་ཐོག་ནས་སྐུ་ཕྱའི་ཞབས་རིམ་སྨིན་སྒྲུབ་ཞུ་བཞིན་ཁར། གཙོ་ཆེ་བོད་མི་རྣམས་ནང་ཁུལ་མཐུན་ལམ་རྡོག་རྩ་ཆིག་སྒྲིལ་ངང་གོང་བུའི་ནུས་ཤུགས་གོང་སྤེལ་བྱ་རྒྱུ་བཅས་ནི་དུས་ཀྱི་དགོས་མཁོར་མཐོང་བས་ཚང་མས་ཉམས་ལེན་འབད་བསྒྲུབ་གནང་དགོས་པ་ཡིན།
དེ་རིང་ནི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་གི་རྒྱལ་སྤྱིའི་ཁྲིམས་གཞི་གཏན་འབེབས་གནང་བའི་ཉིན་མོའང་ཡིན། ཕྱི་ལོ་ ༡༩༤༥ ལོར་འཛམ་གླིང་མཉམ་འབྲེལ་རྒྱལ་ཚོགས་དབུ་བརྙེས་པ་ནས་བཟུང་ད་ལྟའི་བར་རྒྱལ་ཁབ་མང་པོར་རང་དབང་རང་བཙན་གསར་དུ་ཐོབ་སྟེ་བདེ་སྐྱིད་ཀྱི་དཔལ་ལ་རོལ་བཞིན་པ་དེ་ལྟར་ཡང་། བོད་དོན་ནི་འཛམ་གླིང་ནང་རྩོད་རྙོག་ཡོད་བཞིན་པའི་གནད་དོན་ཞིག་ཡིན་པར་བརྟེན་༸གོང་ས་ཆེན་པོས་བོད་རྒྱའི་དཀའ་རྙོག་གཉིས་སྨན་དབུ་མའི་ལམ་གྱི་ཐབས་ཚུལ་ཐོག་ནས་ཞི་མཐུན་འགྲིག་འཇགས་ཡོང་ཆེད་དེ་སྔ་ལོ་རབསབརྒྱད་ཅུའི་ནང་རྒྱ་ནག་དང་བོད་སོ་སོར་ཆེས་མཐོའི་སྐུ་ཚབ་ཚོགས་པ་སྔ་རྗེས་སུ་ཆེད་བརྫོངས་ཐོག ཉེ་བའི་ཆར་ཡང་བོད་རྒྱའི་འབྲེལ་ལམ་བསྐྱར་གསོ་བྱུང་རྗེས་འབྲེལ་མཐུད་སྐུ་ཚབ་ཚོགས་ཆུང་དང་། རྒྱ་ནག་གི་འབྲེལ་ཡོད་འགོ་ཁྲིད་དབར་འབྲེལ་མཐུད་གོ་བསྡུར་ཐེངས་ལྔ་གནང་ཟིན་པར་གོ་དོན་ལེགས་རྟོགས་སུ་ཕན་འབྲས་བྱུང་ཡང་། གྲོས་མོལ་དངོས་གཞི་འགོ་འཛུགས་མ་ཐུབ་ཅིང་། དེའི་དབར་རྒྱ་ཕྱོགས་ནས་རྒྱལ་གཅེས་ཆོས་གཅེས་ཟེར་བའི་མིང་ཐོག་ནས་བོད་ཀྱི་དགོན་སྡེ་ཁག་ནང་བཙན་ཐབས་ཀྱིས་སློབ་གསོའི་ལས་འགུལ་བསྐྱར་ནན་ཆེན་པོས་སྤེལ་བ་དང་། ༸གོང་ས་སྐྱབས་མགོན་ཆེན་པོའི་མཛད་འཕྲིན་ལ་སྒྲོ་འདོགས་སྣ་ཚོགས་ཀྱིས་མཚན་སྨས་བཀུར་འདེབས་བྱེད་ཤུགས་ཆེ་རུ་བཏང་དང་གཏོང་མུས། ཉེ་སྔོན་ཕྱི་ཟླ་དགུ་པའི་ཟླ་མཇུག་ཏུ་བོད་ནས་བཙན་བྱོལ་དུ་ཡོང་མཁན་བོད་མི་ཚོ་ཁག་ཅིག་བལ་བོད་གཉིས་ཀྱི་ས་མཚམས་ནང་པ་ལ་གངས་ལམ་དུ་འབྱོར་སྐབས་རྒྱ་དམག་ས་སྲུང་བས་གོ་མཚོན་བྲལ་བའི་ཉམ་ཐག་བོད་མིར་མེ་འཕེན་གྱིས་བསད་རྨས་ཇི་བྱུང་འཛམ་གླིང་ནང་དངོས་ཡོད་གནས་སྟངས་བརྙན་འཕྲིན་གྱི་ལམ་ནས་གསལ་རྗེན་དྲིལ་བསྒྲགས་ཤུགས་ཆེ་བྱུང་བ་སོགས་འགྲོ་བ་མིའི་ཀུན་སྤྱོད་ཐོབ་ཐང་ཁག་ལ་བདལ་བཤིག་རྩིས་མེད་མུ་མཐུད་བཏང་ཁར། ནུབ་བརྒྱུད་ཐོན་སྤེལ་ཆེན་མོ་ཞེས་པའི་ལས་འཆར་དང་། མེ་འཁོར་ལྕགས་ལམ་གསར་འཛུགས་ལམ་ནས་རྒྱ་རིགས་ཁྱོན་ཆེ་བོད་ནང་གཏན་གཞིས་སྤོ་ཤུགས་ཀྱིས་ཡུལ་གྱི་བདག་པོ་བོད་མི་རྣམས་གྲངས་ཉུང་མི་རིགས་སུ་འགྱུར་བའི་ཐབས་བྱུས་སྤེལ་བཞིན་པར་གཞིགས་ན། རྒྱ་བསྐྱེེད་རིང་ལུགས་ཀྱི་སྲིད་བྱུས་ལ་འགྱུར་བ་མེད་ཅིང་། བོད་རྒྱའི་དཀའ་རྙོག་སེལ་རྒྱུར་ལྷག་བསམ་རྣམ་དག་གི་འདུན་པ་ཇི་ལྟར་ཡོད་མེད་ཐད་བློ་འཚབ་དང་སོམ་ཉིའི་གནས་སུ་གྱུར་པ་དང་། འོན་ཀྱང་འཛམ་གླིང་ནང་རྩོད་རྙོག་གང་ཅིར་ཕན་ཚུན་གྲོས་བསྡུར་ཞི་མོལ་གྱི་ལམ་ནས་སེལ་རྒྱུར་ཐབས་ལམ་བཟང་ཤོས་སུ་ངོས་འཛིན་བྱེད་ཀྱི་ཡོད་པར་བརྟེན་ད་ལྟའི་རྒྱ་ནག་གི་དབང་འཛིན་པ་ཚོས་ཀྱང་ཆབ་སྲིད་ཆོད་སེམས་ཀྱི་བློ་སྟོབས་ཆེ་ཙམ་བླང་སྟེ་མདུན་བསྐྱོད་བྱ་རན་དུས་གཏུགས་ཐོག ༸གོང་ས་མཆོག་རྒྱ་ནག་ཏུ་གནས་གཟིགས་དང་བོད་ལ་གཟིགས་སྐོར་ཕེབས་བཞེད་ཀྱི་གསལ་བསྒྲགས་གནང་ཟིན་པ་ལྟར་རྒྱ་ཕྱོགས་ནས་སྔོན་འགྲོའི་ཆ་རྐྱེན་མེད་པའི་ཐོག་དེ་འདྲའི་གོ་སྐབས་བསྐྲུན་ཚེ་སྤྱིར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དབང་འཛིན་པ་རྣམས་དང་། ༸གོང་ས་༸སྐྱབས་མགོན་ཆེན་པོ་མཆོག་ལྷན་འཛོམས་བཀའ་བསྡུར་གྱིས་གཉིས་མོས་ཐག་གཅོད་ཐོག་མགྱོགས་བགྲོད་ཐུབ་པའི་ཤུགས་གནོན་ཆེ་བ་ཡོང་རྒྱུ་མ་ཟད། བོད་རྒྱ་གཉིས་ཀྱི་མི་མང་ས་ཡ་མང་པོས་གང་གི་མཚན་དཔེའི་དཀྱིལ་འཁོར་མཇལ་ཞིང་གསུང་ཐོས་ཀྱིས་ཡུལ་གྱི་ཆིག་སྒྲིལ་དང་བརྟན་ལྷིང་ལའང་ཕན་ཐོགས་ཆེན་པོ་འབྱུང་ངེས་ཡིན།
དེ་བཞིན་དེ་རིང་གི་ཉིན་མོར་རྒྱལ་སྤྱིའི་ཧི་མ་ཡ་ལ་ཡའི་དུས་སྟོན་སྲུང་བརྩི་དང་འབྲེལ་ས་གནས་ཡུལ་མི་མང་ཚོགས་ནས་ནོ་སྦེལ་ཞི་བདེའི་གཟེངས་རྟགས་མཛད་སྒོར་མཉམ་ཞུགས་ཀྱིས་༸གོང་ས་ཆེན་པོའི་མཛད་འཕྲིན་ལ་ཆེ་བསྟོད་ཞུ་བ་ནི་ཧིན་བོད་མི་མང་དབར་མཛའ་བརྩེའི་ལར་ཞེན་གཡོ་བ་མེད་པའི་རྣམ་པ་མཚོན་གྱི་ཡོད་སྟབས། ཧི་མ་ལ་ཡའི་དུས་སྟོན་གོ་སྒྲིག་འགན་བཞེས་གནང་མཁན་ཚང་མར་ལེགས་སོའི་བསྔགས་བརྗོད་དང་ཐུགས་རྗེ་ཆེ་ཞེས་ཞུ་རྒྱུ་ཡིན། རྒྱ་གར་ནི་བཙན་བྱོལ་བོད་མིའི་ཕ་ཡུལ་གཉིས་པ་ཆགས་ཤིང་། ད་ཕན་མི་ལོ་བཅུ་ཕྲག་བཞི་ལྷག་རིང་རྒྱ་གར་དབུས་གཞུང་དང་། མངའ་སྡེ་ཁག་གི་གཞུང་། ས་གནས་འཛིན་སྐྱོང་སྡེ་ཚན་ཁག་བཅས་ནས་བོད་མིའི་ཐོག་བསམ་ཡུལ་ལས་འདས་པའི་རོགས་མགོན་ཕན་གྲོགས་གནང་བའི་བཀྲིན་གྱི་ཕུང་པོ་ནི་བརྗེད་ཐབས་གཏན་ནས་མེད་པར་བརྟེན་ད་རེས་ཀྱི་གོ་སྐབས་འདི་བཟུང་སྟེ་བཀྲིན་བླ་མེད་དུ་ཆེ་ཞེས་ཞུ་རྒྱུ་དང་། དུས་སྟོན་གྱི་དམིགས་ཡུལ་ནི་ཧིན་བོད་གཉིས་ཀྱི་མི་མང་དབར་མཛའ་མཐུན་གོང་འཕེལ་མཉམ་གནས་ཆེད་ཡིན་གཤིས་ད་དུང་མུ་མཐུད་འབྲེལ་ཡོད་རྣམས་ནས་འབད་བརྩོན་རྒྱུན་བསྲིངས་གནང་རྒྱུའི་འབོད་སྐུལ་ཞུ་རྒྱུ་ཡིན། བོད་མི་མང་སྤྱི་འཐུས་ལྷན་ཚོགས་ཀྱིས། ༢༠༠༦ ཟླ་ ༡༢ ཚེས་ ༡༠ ལ།།
