སྔོན་གླེང་།
དབུ་མའི་ལམ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་ཞི་བའི་ལམ་ནས་སེལ་ཐུབ་པ་དང་། བོད་རྒྱ་མི་རིགས་གཉིས་འདྲ་མཉམ་དང་གཅིག་ཕན་གཅིག་གྲོགས་ཀྱིས་བརྟན་ལྷིང་མཉམ་གནས་ཡོང་ཆེད་འདོན་གནང་མཛད་པའི་ཐབས་ལམ་དང་། བཙན་བྱོལ་བོད་གཞུང་མང་ནས་མང་གཙོའི་ལམ་སྲོལ་གྱི་ཐོག་ནས་གོ་བསྡུར་རིམ་པར་བྱས་ཏེ་གཏན་ལ་ཕབ་པའི་སྲིད་བྱུས་ཤིག་ཡིན། གཞིས་བྱེས་བོད་མིས་གཙོས་དོན་གཉེར་ཅན་རྣམས་ཀྱིས་དབུ་མའི་ལམ་གྱི་དགོངས་དོན་སྔར་ལྷག་གསལ་རྟོགས་ཡོང་ཆེད་དེའི་གནད་དོན་དང་བྱུང་རབས་མདོར་བསྡུས་ངོ་སྤྲོད་ཞུ་རྒྱུ་ཡིན།།
དབུ་མའི་ལམ་གྱི་གོ་དོན།
བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་དབང་སྒྱུར་བའི་བོད་ཀྱི་ད་ལྟའི་གནས་བབ་ལ་ཁས་ལེན་མི་བྱེད་པ་དང་། ཡང་བོད་ཀྱི་ལོ་རྒྱུས་དངོས་དོན་རང་བཙན་ཡིན་པ་དེ་ཡང་རྩོད་གླེང་མི་བྱེད་པར་དེ་གཉིས་ཀྱི་དབུས་ཏེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་ཆོལ་གསུམ་བོད་རིགས་ཡོངས་རྫོགས་ལ་མིང་དོན་མཚུངས་པའི་རང་སྲིད་རང་སྐྱོང་ཞིག་འཐོབ་ཐབས་བྱ་རྒྱུའི་སྲིད་བྱུས་དང་ཐབས་ལམ་ལ་དབུ་མའི་ལམ་ཞེས་བརྗོད།
དབུ་མའི་ལམ་ནི་མཐའ་གཉིས་སུ་མ་ལྷུང་བའི་ལངས་ཕྱོགས་ཤིག་དང་། དེས་འབྲེལ་ཡོད་ཕྱོགས་ཚང་མའི་དགོས་ངེས་ཀྱི་ཁེ་ཕན་རྣམས་འགན་ལེན་བྱེད་ཐུབ། དེ་ཡང་བོད་མིའི་ཕྱོགས་ནས་བརྗོད་ན། བོད་ཀྱི་ཆོས་དང་རིག་གཞུང་། མི་རིགས་ཀྱི་ངོས་འཛིན་བཅས་མི་ཉམས་རྒྱུན་འཛིན་དང་། སྲུང་སྐྱོབ་བྱེད་ཐུབ་པ་དང་། རྒྱ་ཕྱོགས་ནས་བརྗོད་ན། མེས་རྒྱལ་གྱི་བདེ་འཇགས་དང་། ས་ཁྱོན་གོང་བུ་གཅིག་བསྒྲིལ་སྲུང་སྐྱོབ་བྱེད་ཐུབ་པ། དེ་བཞིན་ཁྱིམ་མཚེས་རྒྱལ་ཁབ་ཁག་དང་ཕྱོགས་གསུམ་པས་བརྗོད་ན། ས་མཚམས་ཁག་ཏུ་ཞི་བདེ་ལྷིང་འཇགས་དང་། རྒྱལ་སྤྱིའི་འབྲེལ་ལམ་ཁག་ཞི་བའི་སྒོ་ནས་བྱེད་ཐུབ་པ་ཡོང་རྒྱུ།།
དབུ་མའི་ལམ་གྱི་བྱུང་རབས།
ཕྱི་ལོ་ ༡༩༥༡ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་བོད་གཞུང་དབར་བཞག་པའི་གྲོས་མཐུན་དོན་ཚན་ ༡༧ དེ་ནི་འདྲ་མཉམ་གཉིས་མོས་ཐོག་བཞག་པ་ཞིག་མིན་ཡང་། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱ་མི་རིགས་གཉིས་ཀའི་ཁེ་ཕན་ཆེད་ཕྱི་ལོ་ ༡༩༥༩ བར་ལོ་བརྒྱད་རིང་རྒྱ་ནག་གཞུང་དང་མཉམ་དུ་འགྲིག་མཐུན་ཡོང་བའི་ཐབས་ཤེས་ཡོད་རྒུ་རྩལ་སྤྲུག་གནང་སྟེ། ཐ་ན་ ༡༩༥༩ ལོར་༸གོང་ས་༸སྐྱབས་མགོན་ཆེན་པོ་དང་བཀའ་ཤག་བཅས་ལྷ་ལྡན་ནས་ལྷོ་ཁར་༸ཞབས་སོར་འཁོད་རྗེས་སུའང་རྒྱ་དམར་དམག་དཔོན་ཁག་དང་མུ་མཐུད་གྲོས་མོལ་འགྲིག་ཆགས་ཡོང་ཐབས་གནང་ཡོད། གྲོས་མཐུན་དོན་ཚན་ ༡༧ གྱི་འབྲུ་དོན་ལྟར་གནས་ཐབས་གནང་བའང་དབུ་མའི་ལམ་དང་མཚུངས་པ་ཞིག་ཡིན། འོན་ཀྱང་བློ་ཕམ་པ་ཞིག་ལ་རྒྱལ་ས་ལྷ་སར་རྒྱ་དམག་གིས་དྲག་གནོན་ཚད་མེད་བྱས་སྟབས་རྒྱ་ནག་གཞུང་དང་མཉམ་གནས་གནང་རེ་བྲལ་བའི་དངོས་ར་འཕྲོད་དེ་བོད་མི་མང་གི་རང་དབང་དང་བདེ་སྐྱིད་སླར་གསོའི་སླད་རྒྱ་གར་དུ་བཙན་བྱོལ་ལ་མ་ཕེབས་ཐབས་མེད་བྱུང་།
ཕྱི་ལོ་ ༡༩༥༩ ཕྱི་ཟླ་ ༤ ཚེས་ ༡༨ ཉིན་རྒྱ་གར་ས་ཁུལ་ཏེ་ཛ་པུར་དུ་༸ཞབས་སོར་འཁོད་མ་ཐག་༸གོང་ས་མཆོག་གིས། གྲོས་མཐུན་དོན་ཚན་ ༡༧ ནི་བཙན་འོག་ཏུ་བཞག་པ་དང་། རྒྱ་ནག་གཞུང་གིས་གྲོས་མཐུན་གྱི་འབྲུ་དོན་ཁག་བསམ་བཞིན་བརྡལ་བཤིག་བཏང་བའི་རྒྱུ་མཚན་གཉིས་ལ་བརྟེན་ནས་དེ་རིང་ནས་རྩིས་མེད་བཏང་སྟེ། བོད་རང་བཙན་བསྐྱར་གསོའི་ལས་འགུལ་དབུ་འཛུགས་གནང་རྒྱུ་ཡིན་ཞེས་གསལ་བསྒྲགས་བསྐྱངས་པ་ནས་ ༡༩༧༩ བར་བཙན་བྱོལ་བོད་གཞུང་མང་ཡོངས་ཀྱིས་བོད་རང་བཙན་བསྐྱར་གསོ་གནང་རྒྱུའི་སྲིད་བྱུས་བཟུང་ཡོད། འོན་ཀྱང་སྤྱིར་འཛམ་གླིང་འདི་དཔལ་འབྱོར་དང་། ཆབ་སྲིད། དམག་དོན་གང་གི་ཆ་ནས་གཅིག་ལ་གཅིག་བརྟེན་གྱི་དགོས་མཁོ་ཇེ་ཆེར་སོང་སྟེ། མི་རིགས་དང་ཡུལ་ལུང་ཟུར་གནས་རང་བཙན་གྱི་གནས་སྟངས་ལ་འགྱུར་བ་ཆེན་པོ་འགྲོ་བཞིན་པ་དང་། རྒྱ་ནག་ནང་ལའང་འགྱུར་བ་འགྲོ་ངེས་ཀྱིས་བོད་རྒྱ་ཞི་མོལ་གྱི་དུས་སྐབས་ཤིག་ཡོང་རྒྱུར་གཟིགས་ཏེ། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་དོན་ཞི་མོལ་གྱི་སྒོ་ནས་ཐག་གཅོད་ཡོང་ཐབས་སུ་བོད་རང་བཙན་བསྐྱར་གསོ་བྱ་རྒྱུའི་སྲིད་བྱུས་ལ་འགྱུར་བ་གནང་སྟེ་བོད་རྒྱ་གཉིས་སྨན་གྱི་ཐབས་ལམ་ཞིག་འཚོལ་སྒྲུབ་གནང་ན་དགེ་ཕན་ཆེ་བ་དུས་ཡུན་རིང་པོ་ནས་དགོངས་བཞེས་གནང་ཡོད།།
དབུ་མའི་ལམ་ནི་གློ་བུར་དུ་བྱུང་བ་ཞིག་མིན།
༸གོང་ས་༸སྐྱབས་མགོན་ཆེན་པོ་མཆོག་གིས་ཐབས་ལམ་འདི་སྔ་མོ་ནས་དགོངས་པར་འཁོར་ཡོད་ཀྱང་། དེ་འཕྲལ་བརྒྱ་ཁ་གཅིག་གཅོད་ཀྱིས་ཐག་གཅོད་དང་། གཞན་ལ་བཙན་འགེལ་མ་གནང་བར་ལོ་རབས་བདུན་ཅུ་པའི་འགོ་སྟོད་ཙམ་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་དང་། བཀའ་ཤག འབྲེལ་ཆགས་མཁྱེན་རྒྱ་ཡངས་པའི་ཤེས་མྱོང་ཅན་མང་པོར་བཀའ་བསྡུར་དང་། དགོངས་འཆར་བསྡུ་བཞེས་རིམ་པར་གནང་ཡོད་པ་ལྟར། ཕྱི་ལོ་ ༡༩༧༩ ལོར་སྐབས་དེའི་རྒྱ་དམར་གྱི་དབུ་ཁྲིད་སྐུ་གཤེགས་ཏེང་ཞའོ་ཕིང་གིས་༸གོང་ས་༸སྐྱབས་མགོན་ཆེན་པོ་མཆོག་ནས་བོད་རང་བཙན་རྩོད་གླེང་མ་གནང་ན། དེ་མིན་གྱི་གནད་དོན་ཐམས་ཅད་གྲོས་མོལ་གྱི་ལམ་ནས་ཐག་གཅོད་གནང་ཆོག་ཅེས་དོན་སྙིང་ལྡན་པའི་གྲོས་འགོ་བཏོན་སྐབས་༸གོང་ས་༸སྐྱབས་མགོན་ཆེན་པོས་དེ་སྔོན་ནས་དུས་ཡུན་གང་འཚམས་རིང་ཕན་ཚུན་གཉིས་སྨན་གྱི་དགོངས་བཞེས་གནང་བཞིན་པ་དང་གཅིག་མཐུན་ལྟ་བུ་བྱུང་སྟབས། ༸གོང་ས་མཆོག་གིས་དེ་འཕྲལ་མཐུན་ཕྱོགས་ཀྱི་བརྡ་ལན་གནང་སྟེ་བོད་རྒྱ་ཞི་མོལ་གནང་རྒྱུར་མོས་མཐུན་དང་། བོད་རང་བཙན་བསྐྱར་གསོའི་སྲིད་བྱུས་ནས་དབུ་མའི་ལམ་གྱི་སྲིད་བྱུས་སུ་འགྱུར་བ་གཏོང་རྒྱུའི་ཐག་གཅོད་མཛད་ཡོད། དེ་ཡང་སྐབས་དེའི་བོད་མི་མང་སྤྱི་འཐུས་ལྷན་ཚོགས་དང་། བཀའ་ཤག མཁྱེན་རྒྱ་ཡངས་པའི་མི་སྣ་བཅས་པར་བཀའ་བསྡུར་གནང་འོས་གནང་སྟེ། བབ་ལྷིང་བརྟན་གསུམ་གྱི་དགོངས་པ་གཏིང་ཟབ་བཞེས་ནས་ཐག་གཅོད་གནང་བ་ཞིག་ལས་གློ་བུར་དུ་བྱུང་བ་ ཞིག་དང་། ཡང་ན་༸གོང་ས་ཆེན་པོ་སྐུ་རྐྱང་གིས་ཐུགས་ཐག་བཅད་དེ་གཞུང་དང་། མི་མང་ལ་བཙན་འགེལ་གནང་བ་མིན་པར་ཞིབ་ཕྲའི་བྱུང་རབས་ངེས་ཅན་ཡོད་པ་ཞིག་ཡིན།།
དབུ་མའི་ལམ་ནི་མང་གཙོའི་ལམ་སྲོལ་ཐོག་ནས་གཏན་ལ་ཕབ་པའི་སྲིད་བྱུས་ཤིག་ཡིན།
༸གོང་ས་མཆོག་གིས་བོད་རང་བཙན་བསྐྱར་གསོ་ནས་དབུ་མའི་ལམ་གྱི་སྲིད་བྱུས་ཐོག་ཕེབས་རྒྱུའི་ཐག་གཅོད་མཛད་རྗེས་བོད་རྒྱ་ཞི་མོལ་གྱི་གཞི་རྩ་རང་སྲིད་རང་སྐྱོང་གི་གནས་བབ་གང་འདྲ་ཞིག་དགོས་པའི་གྲོས་འཆར་ཕྱི་ལོ་ ༡༩༨༨ ཕྱི་ཟླ་ ༦ ཚེས་ ༡༥ ཉིན་སི་ཏྲས་སི་སྦག་ཏུ་ཡུ་རོབ་གྲོས་ཚོགས་སུ་གསལ་བསྒྲགས་མ་གནང་གོང་། བཞུགས་སྒར་རྡ་རམ་ས་ལར་ཕྱི་ཟླ་ ༦ ཚེས་ ༦ ནས་ཉིན་བཞིའི་རིང་བོད་མི་མང་སྤྱི་འཐུས་རྣམ་པ་དང་། བཀའ་བློན་རྣམ་པ། གཞུང་ཞབས། བོད་མིའི་སྡོད་སྒར་ཡོངས་རྫོགས་ཀྱི་ས་གནས་འགོ་འཛིན་དང་མི་མང་འཐུས་མི། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། བོད་ནས་གསར་དུ་འབྱོར་བའི་འཐུས་མི། དམིགས་བསལ་མགྲོན་འབོད་གནང་བའི་མི་སྣ་བཅས་ཡོད་པའི་དམིགས་བསལ་ཚོགས་ཆེན་བསྡུ་བསྐོང་ཐོག་གོ་བསྡུར་སྱང་བཤད་གནང་མཐར་ཚང་མས་གོང་གསལ་གྲོས་འཆར་ལ་མོས་མཐུན་རྒྱབ་སྐྱོར་ཞུས་ཡོད།
གྲོས་འཆར་བཏོན་ནས་དུས་ཡུན་ལོ་ཤས་ཕྱིན་ཡང་རྒྱ་གཞུང་ནས་བཟང་ཕྱོགས་ཀྱི་བརྡ་ལན་མ་བྱུང་བར་བརྟེན་སླར་ཡང་ཕྱི་ལོ་ ༡༩༩༦ དང་ ༡༩༩༧ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་རྩ་དོན་སྒྲུབ་ཕྱོགས་ཀྱི་ཐབས་ལམ་གང་ལེགས་བོད་རྒྱ་ཆེའི་མི་མང་གིས་མང་མོས་ཐག་གཅོད་འོས་བསྡུའི་ལམ་ནས་ཐག་གཅོད་དགོས་པའི་ལམ་སྟོན་ཕེབས་པ་བཞིན་སྔོན་འགྲོའི་བསམ་ཤོག་བསྡུ་ལེན་སྐབས་བསམ་ཤོག་བརྒྱ་ཆ་ ༦༤ བརྒལ་བས་མང་མོས་ཐག་གཅོད་འོས་བསྡུ་མ་དགོས་པར་དབུ་མའི་ལམ་དང་། ཡང་ན་རྒྱལ་སྤྱི་དང་རྒྱ་ནག་གི་ཆབ་སྲིད་ཀྱི་འགྱུར་འགྲོས་དང་བསྟུན། དུས་ནས་དུས་སུ་༸གོང་ས་མཆོག་གིས་ཐག་གཅོད་གང་གནང་ལ་རྒྱབ་སྐྱོར་ཞུ་རྒྱུ་ཡིན་ཞེས་གསལ་བ་ལྟར། དེ་དོན་བོད་མི་མང་སྤྱི་འཐུས་ལྷན་ཚོགས་ཀྱིས་ ༡༩༩༧ ཕྱི་ཟླ་ ༩ ཚེེས་ ༡༨ ཉིན་སྤྱི་མོས་གྲོས་ཆོད་ཀྱི་ལམ་ནས་སྙན་གསན་ཞུས་པར། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༨ ཀྱི་གསུམ་བཅུའི་གསུང་འཕྲིན་ནང་ ང་ཚོའི་འཐབ་རྩོད་ཀྱི་ལམ་ཕྱོགས་འགྱོད་པ་མེད་པ་ཞིག་ཡོང་ཐབས་སུ་ངོས་ནས་མང་མོས་འོས་བསྡུ་བྱ་རྒྱུའི་བསམ་འཆར་བཏོན་པ་དེ་སྐོར་ན་ནིང་བཙན་བྱོལ་དུ་ཡོད་པའི་བོད་མི་དང་། དེ་བཞིན་བོད་ནང་གི་མི་མང་གི་བསམ་འཆར་གང་ཐུབ་བསྡུ་ལེན་བྱས་པ་དང་། ཁོང་ཚོའི་བསམ་འཆར་ཇི་ལྟར་བྱུང་བའི་ནང་ནས་མང་མོས་གཞི་རྩར་བཞག་སྟེ་བོད་མི་མང་སྤྱི་འཐུས་གྲོས་ཚོགས་ཀྱི་ཐོག་ནས་གྲོས་ཆོད་བཞག་པ་དེའི་ནང་མང་མོས་འོས་བསྡུའི་ཐོག་ནས་ཐག་གཅོད་བྱ་རྒྱུ་ཕྱིར་འཐེན་ཡོང་བ་དང་། ངོས་ནས་གང་དགེའི་ཐག་གཅོད་བྱེད་དགོས་ཞེས་འཁོད་འདུག མི་མང་ནས་ངོས་ལ་རེ་བ་དང་། ཡིད་ཆེས་བློས་འགེལ་དེ་ལྟ་བུ་བྱས་པ་ལ་ཐུགས་རྗེ་ཆེ་བརྗོད་རྒྱུ་ཡིན། བོད་དོན་དཀའ་རྙོག་སེལ་ཐབས་སུ་དབུ་མའི་ལམ་འདི་དངོས་ཡོད་གནས་ཚུལ་དང་མཐུན་ཞིང་། ལག་ལེན་འཁེལ་ཐུབ་པ་ཞིག་ཡིན་པར་ངོས་ནས་ངོས་འཛིན་བྱེད་ཀྱི་ཡོད། ལམ་ཕྱོགས་འདིའི་ཐོག་ནས་བོད་མི་རིགས་ལ་མེད་དུ་མི་རུང་བའི་ཐོབ་ཐང་ཁག་ཡོང་བ་དང་། རྒྱ་ནག་གིས་གལ་ཆེར་ལྟ་བའི་གཅིག་གྱུར་དང་བརྟན་ལྷིང་ལའང་ཕན་ཐོགས་ཡོང་ངེས་ཡིན་པར་བརྟེན། ངོས་ནས་ལམ་ཕྱོགས་འདིའི་ཐོག་ནས་མུ་མཐུད་རྒྱ་ནག་གི་འགོ་ཁྲིད་ཚོར་འབྲེལ་མཐུད་ཐུབ་པའི་འབད་བརྩོན་བྱ་རྒྱུ་ཡིན། ཞེས་གསུངས་པ་ལྟར། མི་མང་གི་བསམ་འཆར་དང་། གྲོས་ཚོགས་ཀྱི་སྤྱི་མོས་གྲོས་ཆོད་ཀྱི་ལམ་ནས་གཏན་ལ་ཕབ་ཡོད།།
དབུ་མའི་ལམ་གྱི་གལ་ཆེའི་གནད་དོན་ཁག
༡་ བཙན་བྱོལ་བོད་གཞུང་ནས་བོད་རང་བཙན་གྱི་རྩོད་གླེང་མི་བྱེད་པར། ཆོལ་གསུམ་བོད་རིགས་ཡོངས་རྫོགས་ཆབ་སྲིད་ཀྱི་གོང་བུ་ཞིག་ཏུ་བསྐྲུན་དགོས་པ་དང་།
༢་ དེ་འདྲའི་གོང་བུ་དེར་མིང་དོན་མཚུངས་པའི་མི་རིགས་ས་གནས་རང་སྲིད་རང་སྐྱོང་གི་གནས་བབ་ཚད་ལྡན་དགོས་པ།
༣་ རང་སྲིད་རང་སྐྱོང་དེ་ཡང་མང་གཙོའི་ལམ་སྲོལ་ལ་བརྟེན་ནས་མི་མང་གིས་འོས་འདེམས་བྱས་པའི་གྲོས་ཚོགས་དང་འོས་འདེམས་བྱས་པའི་གཞུང་གིས་འཛིན་སྐྱོང་བྱེད་དགོས་པ།
༤་ གོང་གསལ་གནས་བབ་རྣམས་རྒྱ་གཞུང་ནས་ཁས་ལེན་བྱུང་འཕྲལ་བོད་རྒྱ་ནག་ནས་ཁ་བྲལ་མི་དགོས་པར་རྒྱ་ནག་མི་དམངས་སྤྱི་མཐུན་རྒྱལ་ཁབ་དང།མཉམ་དུ་གནས་རྒྱུ།
༥་ བོད་འདི་འཚེ་མེད་ཞི་བདེའི་བསྟི་གནས་སུ་བསྒྱུར་མ་ཟིན་བར་རྒྱ་ནག་གཞུང་གིས་བོད་ཀྱི་སྲུང་སྐྱོབ་ཁོ་ནའི་ཆེད་གྲངས་ཚད་ངེས་ཅན་གྱི་དམག་དཔུང་བོད་ནང་བཞག་ཆོག་པ།
༦་ རྒྱ་ནག་མི་དམངས་སྤྱི་མཐུན་རྒྱལ་ཁབ་དབུས་གཞུང་ནས་བོད་ཀྱི་སྲིད་དོན་གྱི་ཕྱི་འབྲེལ་དང་། རྒྱལ་སྲུང་གི་འགན་ཁུར་ལས། བོད་ཀྱི་ཆོས་དང་། རིག་གཞུང་། ཤེས་ཡོན། དཔལ་འབྱོར། འཕྲོད་བསྟེན། སྐྱེ་ཁམས་ཁོར་ཡུག་སྲུང་སྐྱོབ་སོགས་དང་འབྲེལ་བའི་ལས་དོན་ཡོངས་རྫོགས་བོད་མི་རང་གིས་འཛིན་སྐྱོང་བྱེད་དགོས་པ།
༧་ རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བ་དང་། བོད་ཀྱི་ས་ཁུལ་ཁག་ཏུ་རྒྱ་རིགས་གནས་སྤོ་བྱེད་པའི་སྲིད་བྱུས་མཚམས་འཇོག་དགོས་པ།
༨་ བོད་རྒྱའི་དཀའ་རྙོག་སེལ་ཆེད་༸གོང་ས་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་མཉམ་དུ་ལྷག་བསམ་རྣམ་དག་གིས་གྲོས་མོལ་དང་། འདུམ་སྒྲིག་གི་ཐུགས་འགན་རྐང་བཞེས་གནང་རྒྱུ་བཅས་ནི་དབུ་མའི་ལམ་གྱི་ནང་དོན་གཙོ་ཆེ་བ་ཁག་ཡིན།།
དབུ་མའི་ལམ་གྱི་ཁྱད་ཆོས།
༸གོང་ས་༸སྐྱབས་མགོན་ཆེན་པོས་བོད་རྒྱ་མི་རིགས་མཐུན་སྒྲིལ་དང་མཉམ་གནས་ཀྱི་དགོས་མཁོ་བོད་མིའི་སྲིད་དོན་གྱི་དགོས་མཁོ་ལས་ཀྱང་གལ་གནད་ཆེ་བར་གཟིགས་ཏེ་གཉིས་སྨན་དབུ་མའི་ལམ་གྱི་སྲིད་བྱུས་ཕྱག་བསྟར་གནང་བ་ནི་ཆབ་སྲིད་ཀྱི་མདུན་མཆོངས་ཆེན་པོ་ཞིག་ཡིན། མི་རིགས་འདྲ་མཉམ་ཟེར་བ་མི་འབོར་དང་། དཔལ་འབྱོར། དམག་ཤུགས་སོགས་ལ་མ་ལྟོས་པར། མི་རིགས་ལ་མཐོ་དམའ་དང་བཟང་ཞན་མི་དབྱེ་བར་འདྲ་མཚུངས་མཉམ་གནས་ཐུབ་པ་ཞིག་ལ་ཟེར་བ་དང་། མི་རིགས་འདྲ་མཉམ་ནི་མི་རིགས་མཐུན་སྒྲིལ་གྱི་རྒྱུ་རྐྱེན་མེད་དུ་མི་རུང་དེ་ཡིན། བོད་རྒྱ་མི་རིགས་གཉིས་འདྲ་མཉམ་ཐོག་ནས་མཉམ་གནས་ཐུབ་པ་ཞིག་བྱུང་ན་དེ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་གལ་ཆེའི་རྩ་དོན་དུ་འཛིན་པའི་མི་རིགས་མཐུན་སྒྲིལ་དང་། སྤྱི་ཚོགས་བརྟན་ལྷིང་། རྒྱ་ནག་གོང་བུ་གཅིག་གྱུར་བཅས་ཀྱི་རྨང་གཞིར་འགྱུར་རྒྱུ་ཡིན། དེར་བརྟེན་འཚེ་མེད་ཞི་བ་དང་། བོད་རྒྱ་གཉིས་སྨན། མི་རིགས་མཐུན་སྒྲིལ། སྤྱི་ཚོགས་བརྟན་ལྷིང་བཅས་ཡོང་ཐུབ་པ་དབུ་མའི་ལམ་གྱི་ཁྱད་ཆོས་ཡིན།།
མཐའ་དོན།
བཙན་བྱོལ་བོད་གཞུང་མང་ནས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་དང་དེའི་བྱུང་རབས་དང་འབྲེལ་བའི་གནས་ཚུལ་མདོར་བསྡུས་ངོ་སྤྲོད་ཞུས་པ་ལ་ཚང་མས་ཐུགས་སྣང་གནང་སྟེ་སྔར་ལྷག་གསལ་པོ་མཁྱེན་རྟོགས་ཡོང་བའི་རེ་བ་ཡོད། གོ་སྐབས་འདི་བརྒྱུད་ཕྱི་ནང་གི་མི་རིགས་ཡོངས་དང་། ལྷག་པར་དུ་བོད་ནང་ཡོད་པའི་བོད་རིགས་འགོ་ཁྲིད་དང་། ལས་བྱེད་པ། མཁས་དབང་རྣམ་པ་གཙོ་གྱུར་དབུ་མའི་ལམ་ལ་རྒྱབ་སྐྱོར་དང་། མོས་མཐུན་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་བཅས།།
བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱིས། ཕྱི་ལོ་ ༢༠༠༥ ཟླ་ ༧ ལ་སྤེལ།། །།
