༢༠༡༠ ཕྱི་ཟླ་ ༦ ཚེས་ ༡༦ རེས་གཟའ་ལྷག་པ།
༄༅། །འདི་གར་འཕགས་ཡུལ་ཧི་མ་ཅལ་མངའ་སྡེ་ཀང་ར་རྫོང་ཁོངས་འབིར་འབྲི་རུ་བསམ་འགྲུབ་བདེ་ཆེན་ཆོས་འཁོར་གླིང་གི་ཡིག་ཚང་ནས་བཏང་གནས་ནང་གསལ། ཕྱི་ལོ་ ༢༠༡༠ ཟླ་ ༤ ཚེས་ ༡༤ རེས་གཟའ་ལྷག་པ་ཉིན་བོད་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་བསམ་ཡུལ་ལས་འདས་པ་བྱུང་བ་ནས་བདེ་ཆེན་ཆོས་འཁོར་གླིང་གྲྭ་ཚང་ནས་མཆོད་དང་སྨོན་ལམ་ཚོགས་ཏེ་རྐྱེན་འདས་སུ་འགྱུར་བ་རྣམས་ནས་ཚེ་རབས་ཕྲེང་བར་བསགས་པའི་སྡིག་ལྟུང་མཐའ་དག་བྱང་ཞིང་དག་སྟེ་དལ་རྟེན་རིམ་བརྒྱུད་འཕགས་མཆོག་ཕྱག་ན་པདྨོའི་རྗེས་སུ་བཟུང་སྟེ་བླ་མེད་རྫོགས་བྱང་མྱུར་དུ་འཐོབ་ཆེད་དང་། གོད་ཆག་འོག་རྨས་སྐྱོན་ཕོག་པ་རྣམས་ཀྱང་མྱུར་དུ་དྲག་སྐྱེད་ཐོག་ཚེ་ལྷག་དོན་ལྡན་ཡོང་བ་དང་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་ཁྱད་པར་འབྱུང་བཞིའི་འཇིག་པ་མི་བྱུང་ཆེད་མཆོད་འབུལ་དང་སྨོན་ལམ་རྒྱ་ཆེ་གནང་ཡོད།
ཕྱོགས་མཚུངས་བོད་ཟླ་ ༣ ཚེས་ ༡༥ ནས་ཚེས་ ༢༢ བར་གྲྭ་ཚང་དེ་ནས་དམིགས་བསལ་གོ་སྒྲིག་འོག་བླ་གྲྭ་འདུས་པ་རྒྱ་མཚོ་ནས་སྦྱོར་དངོས་རྗེས་གཙང་གི་སྒོ་ནས་ཀུན་རིག་སྒྲུབ་མཆོད་ཆེན་མོ་དངོས་སྟག་ཉིན་བརྒྱད་བྱང་སྲེག་དང་བཅས་པ་གནད་སྨིན་གཟབ་གནང་ཡོད། དེ་བཞིན་བོད་ཟླ་ ༤ ཚེས་ ༡༥ ནི་སྟོན་པའི་དུས་ཆེན་ཁྱད་པར་ཅན་ཉིན་སྨོན་ལམ་མཆོད་འབུལ་རྒྱས་པ་དང་། བོད་ཚེས་ ༡༩ ཉིན་འདས་པོ་རྣམས་ཀྱི་ཞག་ཞེ་དགུ་འཁེལ་བ་དང་སྟབས་བསྟུན། གྲྭ་ཚང་དེ་ནས་དམིགས་བསལ་གོ་སྒྲིག་ཐོག་བླ་གྲྭ་འདུས་པ་རྒྱ་མཚོ་ནས་སྦྱོར་དངོས་རྗེས་གཙང་གི་སྒོ་ནས་ཀུན་རིག་ཆོ་གའི་སྒོ་ནས་བྱང་སྲེག་རྒྱས་པ་ཞིག་ཚོགས་ཏེ་མཆོག་གསུམ་རྒྱལ་བ་རྒྱ་མཚོར་གདུང་ཤུགས་དྲག་པོའི་གསོལ་འདེབས་ཀྱང་ཞུས་དང་ཞུ་མུས་ཡིན་པ་བཅས།
