༢༠༡༠ ཕྱི་ཟླ་ ༦ ཚེས་ ༢༢ རེས་གཟའ་མིག་དམར།
༄༅། །འདི་གར་བོད་གཞུང་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་གསལ། ཨ་རིའི་མངའ་སྡེ་ཨོ་རི་གྷན་གྱི་པོ་ཀྲེ་ལན་ཀྲི་གྲོང་ཁྱེར་ནང་ཡོད་པའི་སྙན་བརྒྱུད་བསམ་གཏན་ཆོས་གླིང་ཆོས་ཚོགས་ནས་གོ་སྒྲིག་གནང་བའི་མཧཱ་གུ་རུའི་འབུམ་ཚོགས་ལ་གདན་ཞུས་ལྟར། སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་མཆོག་ཕྱི་ལོ་ ༢༠༡༠ ཟླ་ ༦ ཚེས་ ༢༡ ཉིན་ནིའུ་ཡོཀ་ནས་ཨོ་རི་གྷན་དུ་ཕེབས་ཡོད་པ་མ་ཟད། དུས་ཚོད་ཁོམ་པ་བྱུང་ཚེ། པོ་ཀྲེ་ལན་ཀྲི་ས་གནས་ཀྱི་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་ངོ་མཇལ་གྱིས་ཚོགས་པའི་ལས་དོན་བྱེད་ཕྱོགས་ཐད་ཕན་ཚུན་གོ་བསྡུར་དང་། གསུང་བཤད་གནང་རྒྱུ་ཡིན་པ་རེད། དེ་ཡང་སྙན་བརྒྱུད་བསམ་གཏན་ཆོས་གླིང་ཆོས་ཚོགས་ནས་སྐུ་ངལ་ལ་མ་འཛེམས་པར། ལོ་ལྟར་མཧཱ་གུ་རུའི་འབུམ་ཚོགས་ཐེངས་རེ་གོ་སྒྲིག་གནང་གི་ཡོད་པ་དང་། དེའི་དམིགས་ཡུལ་གཙོ་བོ་ནི་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་པ་དང་འཛམ་གླིང་ཞི་བདེ་ཡོང་ཆེད་ཡིན་འདུག འདི་ལོ་མཧཱ་གུ་རུའི་འབུམ་ཚོགས་གོ་སྒྲིག་ཐེངས་ལྔ་པ་དེ་ཆགས་ཀྱི་ཡོད།།
