༢༠༡༠ ཕྱི་ཟླ་ ༦ ཚེས་ ༤ རེས་གཟའ་ཕུར་བུ།
༄༅། །འདི་གར་ཨ་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་གསལ། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཟླ་ ༥ ཚེས་ ༡༡ ནས་ཚེས་ ༢༤ བར་ཨ་རིའི་ས་གནས་ཨིན་ཌི་ཡ་ན་ (Indiana) དང་ཝི་སི་ཀོན་སིན་ (Wisconsin) ཨ་ཡོ་བ་ (IOWA) དེ་བཞིན་ནིའུ་ཡོཀ་བཅས་སུ་ཆོས་སྲིད་ཀྱི་མཛད་འཕྲིན་རླབས་ཆེ་སྐྱོང་ཆེད་ཆིབས་སྒྱུར་གྱི་གདན་ཞུ་ཕུལ་མཁན་མཐོ་སློབ་དང།ཚོགས་སྡེ་ཁག་ལ་ལམ་སྟོན་ལྟར་མཇུག་སྐྱོང་ལས་དོན་འཐུས་ཚང་གནང་བ་རྣམས་ལ་སྐུ་ཚབ་དོོན་གཅོད་ཁང་ནས་ཐུགས་རྗེ་ཆེ་ཞུས་ཡོད།
དེ་ཡང་༸གོང་ས་མཆོག་གིས་གྲོང་ཁྱེར་ནིའུ་ཡོཀ་ནང་གི་ཧན་ཊར་མཐོ་སློབ་ཁོངས་ Roosevelt House Public Policy Institute ནང་ནིའུ་ཡོཀ་ཉེ་ཁུལ་གྱི་གཙུག་ལག་སློབ་གྲྭ་ཁག་གི་རྒྱ་རིགས་ཀྱི་དགེ་ཆེ་དང་མཁས་དབང་ ༧༠ ཙམ་ལ་བཀའ་སློབ་སྩལ་བ་དང་ཆབས་ཅིག་དྲི་བ་དྲིས་ལན་ཡང་མཛད་ཡོད། དེ་རྗེས་དོན་ཁང་ནས་རྒྱ་རིགས་མཁས་དབང་དང་༸གོང་ས་མཆོག་དབར་བགྲོ་གླེང་གི་ལས་རིམ་གོ་སྒྲིག་ཞུས་པར་ཚང་མས་དགའ་སྤྲོ་ཐོབ་ཡོད། དེ་བཞིན་མགོན་པོ་གང་ཉིད་མཆོག་གིས་ཧན་ཊར་མཐོ་སློབ་ནང་རྒྱ་རིགས་དང་བོད་རིགས་སློབ་ཕྲུག ༢༥༠ ཙམ་ལ་བོད་དོན་སྐོར་ལ་བཀའ་སློབ་ཀྱང་སྩལ་ཡོད། ཧན་ཊར་མཐོ་སློབ་ཀྱི་སློབ་སྤྱི་ལྕམ་སྐུ་ Jennifer J.Raab མཆོག་ནས་༸གོང་ས་མཆོག་གིས་ལོ་མང་རིང་འགྲོ་བ་མིའི་བཟང་པོའི་ཡོན་ཏན་གོང་མཐོར་གཏོང་གནང་མཛད་པ་དང་སྦྲགས་ཆོས་ལུགས་མཐུན་སྒྲིལ་ཐོག་ཤུགས་སྣོན་བསྐྱོན་དང་སྐྱོན་མུས།
དེ་བཞིན་བོད་ཀྱི་གནད་དོན་ཐག་གཅོད་ཡོང་ཐབས་སུ་འཚེ་མེད་ཞི་བའི་བཞེངས་ཕྱོགས་རྒྱུན་འཁྱོངས་གནང་བ་བཅས་ཀྱི་མཛད་རྗེས་ལ་ཚད་མཐོའི་གདེང་འཇོག་གནང་བ་དང་ཆབས་ཅིག་སློབ་གྲྭའི་མཚན་བསྟོད་ཀྱི་གཟེངས་རྟགས་ཤིག་འབུལ་ལམ་ཞུས་པར་བརྒྱུད་ལམ་ཁག་ནས་དོ་སྣང་ཆེན་པོས་གནས་ཚུལ་སྤེལ་ཡོད། ཕྱོགས་མཚུངས་དོན་ཁང་ནས་ཆིབས་སྒྱུར་གྱི་གོ་སྐབས་བཟང་པོ་དང་བསྟུན་ཏེ་ནིའུ་ཡོཀ་དང། ཝི་སི་ཀོན་སིན། ཨིན་ཌ་ཡ་ན་བཅས་བོད་མི་འདུས་སྡོད་མང་བའི་ས་ཁུལ་ལ་བཀའ་སློབ་སྩལ་རྒྱུའི་གོ་སྒྲིག་ཞུས་པར་སེར་སྐྱ་མི་མང་སྟོང་ཕྲག་མང་པོར་༸གོང་ས་མཆོག་གི་བླང་དོར་གྱི་བཀའ་སློབ་ཞུ་རྒྱུའི་སྐལ་བཟང་ཐོབ་ཡོད། ལྷག་པར་ནིའུ་ཡོཀ་དང་ནིའུ་ཇར་སི་ཁུལ་དུ་གནས་སྡོད་བར་ལམ་སྐྱེ་རྒུ་མདོར་ས་ཡོམ་གྱི་འཇིག་པའི་ཁྲོད་རྐྱེན་འདས་སུ་གྱུར་བའི་ནང་མི་སྤུན་མཆེད་ ༨༠ ཙམ་ལ་དམིགས་བསལ་གྱི་མཇལ་ཁ་གོ་སྒྲིག་སྐབས་༸གོང་ས་མཆོག་གིས་སེམས་སྡུག་སྟོབས་ཤུགས་སུ་སྒྱུར་དགོས་པའི་བཀའ་སློབ་སྩལ་ཡོད།
དེ་བཞིན་གདན་ཞུས་ལྟར་དཔལ་ལྡན་བཀའ་ཁྲི་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག་གིས་ཕྱི་ཟླ་ ༥ ཚེས་ ༢༢ ཉིན་ནིའུ་ཡོཀ་དང་ནིའུ་ཇར་སི་གཙོ་བོར་གྱུར་བའི་བོད་མི་རྣམས་དང་། དེ་མིན་ས་གནས་ཁག་གི་འཐུས་མི་བཅས་ཁྱོན་བོད་མི་སྟོང་ཕྲག་ཁ་ཤས་ལ་བཙན་བྱོལ་བོད་གཞུང་གི་མཛད་ཕྱོགས་སྲིད་བྱུས་དང་། བོད་མི་མང་སྤྱི་འཐུས་ལྷན་ཚོགས་ཀྱི་འགན་དབང་སྐོར་གསུང་བཤད་གནང་སྟེ་དོགས་དྲིར་ལན་འདེབས་གནང་ཡོད། ཕྱི་ཚེས་ ༢༣ ཉིན་བཙན་བྱོལ་བོད་གཞུང་གི་སྲིད་བྱུས་དང་སྒྲིག་འཛུགས། འཛིན་སྐྱོང་གི་སྐོར། བོད་རིགས་སྤྱི་དང་ལྷག་པར་གཞོན་སྐྱེས་ཚོས་བོད་མིའི་ངོ་བོ་རྒྱུན་འཛིན་ཐུབ་ཐབས་སུ་ཆོས་དང་རིག་གཞུང་། ཤེས་ཡོན་སློབ་སྦྱོང་བྱེད་ཐབས་ཇི་དགེའི་སྐོར། ས་གནས་མང་ཚོགས་ཀྱིས་བོད་ཀྱི་རྩ་དོོན་སྒྲུབ་ཕྱོགས་ཐད་མཉམ་རུབ་ཆ་ཤས་ལེན་ཕྱོགས་སྐོར་བཅས་ཀྱི་བརྗོད་གཞིའི་ཐོག་ས་གནས་མང་ཚོགས་ཀྱི་བསམ་འཆར་གསན་བཞེས་དང་། དྲི་བ་ཁག་ལ་ལན་འདེབས་དང་གསལ་བཤད་གནང་ཡོད། ད་རེས་དོན་གཅོད་ཁང་ནས་གོ་སྒྲིག་གནང་བའི་ཚོགས་འདུ་དེ་ལྟ་བུ་མ་འོངས་པར་ཡང་སྐོང་ཚོགས་གནང་ཐུབ་ན་གཞུང་མང་གཉིས་དབར་གྱི་ཤེས་རྟོགས་ཟབ་ཏུ་གཏོང་རྒྱུར་དགེ་མཚན་ཡོད་པའི་བསམ་འཆར་འདོན་མཁན་ཡང་དེར་གར་གནས་སྡོད་བོད་མི་མང་པོ་བསམ་ཚུལ་དང་རེ་འབོད་ཞུས་ཡོད། དེ་བཞིན་བྱང་ཀ་ལོ་པོ་ནི་ཡའི་བོད་རིགས་སྤྱི་མཐུན་ཚོགས་པས་བཀའ་ཁྲི་མཆོག་དང་། ཚོགས་གཙོ་རྣམ་གཉིས་ས་གནས་སུ་གདན་ཞུ་གནང་བ་ལྟར། ས་གནས་མང་ཚོགས་ལ་གསུང་བཤད་དང་རྒྱ་རིགས་མཁས་དབང་མཇལ་འཕྲད། དེ་བཞིན་སྙན་གྲགས་ཅན་གྱི་གཙུག་ལག་སློབ་གྲྭ་ཆེན་མོར་ Stanford University ཕེབས་ནས་སློབ་ཕྲུག་དང་ཉེ་འཁོར་འཐུས་མི་ ༤༠༠ ལྷག་ཙམ་ལ་བོད་རྒྱའི་འབྲེལ་ལམ་སྐོར་གསུང་བཤད་གནང་བ་མ་ཟད། ཁུལ་དེར་ཡོད་པའི་རླུང་འཕྲིན་དང་། བརྙན་འཕྲིན་ཀྱི་བཅའ་འདྲིར་ཡང་དང་ལེན་གནང་ཡོད་པ་བཅས།།
