༢༠༡༠ ཕྱི་ཟླ་ ༦ ཚེས་ ༢༢ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༢༡ ཉིན་རྡ་སྟེང་བོད་ཁྱིམ་ཞི་བདེ་གླེང་མོལ་ཚོགས་ཁང་དུ་བོད་ཀྱི་བུད་མེད་ལྷན་ཚོགས་དབུས་རྒྱུན་ལས་ཁང་ནས་གོ་སྒྲིག་ཐོག་རྒྱ་བལ་འབྲུག་གསུམ་གྱི་ས་གནས་ཁག་སུམ་ཅུའི་ཚོགས་བཅར་བས་འདི་ལོའི་༸གོང་ས་མཆོག་གི་འཁྲུངས་སྐར་ཉིན་སྤེལ་འཆར་ཡོད་པའི་བཀའ་ཁྲིའི་ཚོད་ལྟའི་འོས་བསྡུའི་ཟབ་སྦྱོང་ཞིག་ཉིན་གཉིས་རིང་འཚོགས་རྒྱུ་ཡིན་པ་དེ་གོང་ཚེས་ཉིན་དབུ་འཛུགས་གནང་ཡོད།
དེ་ཡང་སྔ་དྲོའི་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་དབུས་སྤྱི་ཁྱབ་འོས་བསྡུ་ལས་ཁང་གི་འགན་འཛིན་འཇམ་དཔལ་ཆོས་བཟང་མཆོག་དང་། རྡ་ས་ས་གནས་འགོ་འཛིན་གྱི་གཙོས་གཞུང་འབྲེལ་མིིན་པའི་ཚོགས་པ་ཁག་གི་སྐུ་ཚབ། བོད་ཀྱི་བུད་མེད་ལྷན་ཚོགས་དབུས་དང་ས་གནས་ཁག་གི་ཚོགས་གཙོ་ཚོགས་གཞོན། གསར་འགོད་པ་བཅས་མི་གྲངས་ ༨༠ བརྒལ་བ་ལྷན་འཛོམས་ཀྱིས་ཐོག་མར་བོད་རྒྱལ་ཁབ་ཆེན་མོའི་རྒྱལ་གླུ་བཏང་རྗེས་དབུས་བུད་མེད་ལྷན་ཚོགས་ཀྱི་དྲུང་ཆེ་ཚེ་གཡང་ལགས་དང་། ཉམས་ཞིབ་པ་ཟླ་སྒྲོན་ལགས་རྣམ་གཉིས་ནས་བོད་དབྱིན་ཐོག་གསར་འགོད་གསལ་བསྒྲགས་སྒྲོགས་སྦྱང་གནང་རྗེས་དབུས་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་ཚོགས་འདུ་ངོ་སྤྲོད་ཀྱི་གསུང་བཤད་གནང་གྲུབ་བསྟུན་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། བོད་ཀྱི་བུད་མེད་ཚོགས་པའི་ཚོགས་གཙོ་མཆོག་དང་། ས་གནས་ཁག་ནས་ཕེབས་པའི་རྒྱུན་ལས་འགན་བཞེས་རྣམ་པ། བཞུགས་སྒར་ས་གནས་འགོ་འཛིན་དང་། ཚོགས་པ་ཁག་གི་དབུ་ཁྲིད་རྣམ་པ། གསར་འགྱུར་བརྒྱུད་ལམ་ཁག་གི་གསར་འགོད་པ་བཅས་ཚང་མར་ངས་རང་གཞུང་དབུས་སྤྱི་ཁྱབ་འོས་བསྡུ་ལས་ཁང་གི་ཚབ་ཞུས་ཏེ་བཀྲིས་བདེ་ལེགས་ཞུ་གི་ཡིན། ང་ཚོའི་བཙན་བྱོལ་སྒྲིག་འཛུགས་ནང་འོས་བསྡུ་ཆེན་མོའི་ལས་འགན་གཙོ་བོ་དེ།། ང་དང་ལས་འཕར་བསྐོ་གཞག་བྱུང་བ་གཉིས་ལ་བབས་ཡོད། ང་ཚོའི་བཙན་བྱོལ་ནང་གཞུང་འབྲེལ་མིན་པའི་སྒྲིག་འཛུགས་མང་པོ་ཡོད་པ་དེ་དག་ནས་སྤྱི་པའི་དོན་དུ་ལས་འགུལ་མང་པོ་སྤེལ་གྱི་ཡོད་པ་ནི་ཧ་ཅང་ཡག་པོ་རེད། ལྷག་པར་བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་འདིར་ཕྱི་བལྟས་ཤིག་བྱེད་ཀྱི་ཡིན་ན། ང་ཚོ་བཙན་བྱོལ་དུ་མ་བསླེབས་སྔོན་ནས་བུད་མེད་ཀྱིས་སྒེར་ལངས་བྱས་པའི་གནས་ཚུལ་ཞིག་ལྷ་སར་བྱུང་ཡོད། དེར་བརྟེན་སྒྲིག་འཛུགས་འདི་ཧ་ཅང་གལ་ཆེན་པོ་རེད། ཚོགས་པ་དེ་ཡང་ཐོག་མར་རྒྱ་གར་དུ་སླར་གསོ་བྱུང་ནས་ད་ལྟ་བར་དུ་ས་གནས་ཁག་ལ་རྒྱུན་ལས་ཡོད་པ་ཧ་ཅང་ཡག་པོ་རེད། རྣམ་པ་ཚོས་ས་གནས་ས་ཐོག་ལ་སྤྱི་ཁྱབ་ནས་བཀོད་ཁྱབ་གནང་བ་དེ་དག་སྲུང་བརྩི་ཞུས་ཏེ་ཐག་རིང་ནས་ཕེབས་ཏེ་སེམས་ནང་སྤྱི་པའི་སྒྲིག་འཛུགས་ལ་ཕན་ཆེད་རང་གི་ཤེས་ཚད་དང་ཉམས་མྱོང་ལ་གཞིགས་པའི་གང་ཐུབ་གནང་རོགས། ཞེས་སོགས་ཀྱི་གསུང་བཤད་གནང་རྗེས་ཚོགས་གཞོན་བསམ་གཏན་ཆོས་སྒྲོན་ལགས་ནས་ཐུགས་རྗེ་ཆེ་ཞུས་ཏེ་རིམ་པས་ཟབ་སྦྱོང་ཚུགས་གནང་རྒྱུ་ཡིན་འདུག
བོད་ཀྱི་བུད་མེད་ལྷན་ཚོགས་ཀྱིས་ཕྱི་ཟླ་ ༧ ཚེེས་ ༦ ཉིན་ཚོད་ལྟའི་འོས་བསྡུའི་སྐབས་བཀའ་ཁྲིའི་འོས་མིའི་མིང་གཞུང་ཁ་གསལ་འདོན་རྒྱུ་དང་། དེ་བཞིན་མི་མང་ནས་མཉམ་ཞུགས་ཇི་ཙམ་བྱས་ཡོད་མེད་ཞིབ་བཤེར་བྱས་ཏེ་སྙན་ཐོ་ཞིག་སྟོན་ནས་བཀའ་ཁྲིའི་འོས་འདེམས་ནང་སྔོན་འགྲོ་དང་དངོས་གཞིའི་འོས་བསྡུའི་སྐབས་འགན་ནུས་ཇི་ལྟར་འདོན་དགོས་མིན་ཐབས་ལམ་ཞིག་རྙེད་པའི་ཆེད་དང་མི་མང་གི་ཆ་ཤས་གང་མང་ལེན་ཐུབ་ཕྱིར་འོས་ཐོན་བྱུང་བའི་འོས་མི་རྣམས་ལ་བགྲོ་གླེང་ཞིག་གོ་སྒྲིག་བྱས་ནས་གླེང་སྟེགས་དེའི་སྟེང་རང་ཉིད་བརྟན་པོ་བཟོ་ཐབས་དང་། རྣམ་དཔྱོད་རང་བཞིན་གྱི་གཏམ་གླེང་ལྷུག་པོ་ཞིག་ཡོང་ཐབས་ཡིན་པ་མ་ཟད། བཀའ་ཁྲིའི་འོས་འཕེན་གལ་གནད་འགྲེལ་བརྗོད་ཆེད་རྒྱ་བལ་འབྲུག་གསུམ་གཙོས་ཕྱི་རྒྱལ་ས་གནས་གང་སར་དབུས་ཕྱོགས་རྒྱུན་ལས་རྣམས་ཕྱོགས་བསྐྱོད་བྱེད་རྒྱུ་ཡིན་འདུག་བཅས་སུ།།
