༢༠༡༠ ཕྱི་ཟླ་ ༦ ཚེས་ ༢༢ རེས་གཟའ་མིག་དམར།
༸གོང་ས་༸སྐྱབས་མགོན་ཆེན་པོ་མཆོག་སེ་ཧོ་ཇི་དགོན་པར་ཆིབས་སྒྱུར་སྐྱོང་སྐབས་ཕེབས་ལམ་དུ་ནང་པ་ཚོས་ཕེབས་བསུ་ཞུ་བཞིན་པ།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ན་ག་ནོའི་ཛེན་ཀོ་ཇིའི་མ་དགོན་གྱི་ཉེ་འགྲམ་དུ་རྟེན་གཞི་བྱས་པའི་སེ་ཧོ་ཇི་ (Saihoji Temple) དགོན་ཞེས་པའི་ཁུལ་དེར་ཉི་ཧོང་གི་དགོན་པ་རྙིང་པ་ཞིག་ཡོད་པ་དེའི་མཁན་པོ་བོད་ཀྱི་རིག་གནས་ཐོག་ལ་མཁས་པ་ཡིན་ལ་བོད་སྐད་བདེ་པོ་སྐྱོན་མཁན་ཞིག་ཡོད་པ་
༸གོང་ས་༸སྐྱབས་མགོན་ཆེན་པོ་མཆོག་ནས་དད་ལྡན་མི་གྲངས་ ༣༠༠ བརྒལ་བར་བཀའ་སློབས་སྩོལ་བཞིན་པ།
ཁོང་ནས་༸གོང་ས་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་ས་གནས་དེར་ཆིབས་སྒྱུར་བཀའ་དྲིན་སྐྱོང་སྐབས་དགོན་དེའི་མཁན་པོ་མཆོག་གིས་ཕེབས་བསུ་གཟབ་རྒྱས་དང་སྦྲགས་ཁོང་རང་གིས་དགོན་པ་དེའི་ནང་བོད་ལུགས་དང་མཐུན་པའི་ལྷ་ཁང་དང་རྒྱལ་བ་འོད་དཔག་མེད་ཀྱི་སྐུ་བརྙན་ཕི་ཊི་བརྒྱད་ཙམ་ཡོད་པ་ཞིག་བཞེངས་ཡོད་ས་དེར་གདན་ཞུས་ཀྱིས་༸ཞབས་སོར་འཁོད་ནས་མགོན་པོ་གང་ཉིད་མཆོག་གིས་སྐུ་བརྙན་དེར་གཟུངས་གཞུག་དང་རབ་གནས་བཀའ་དྲིན་ཆེ་བ་སྩལ་གྲུབ་བསྟུན་བཀའ་སློབ་ཕེབས་དོན། ནང་པ་སངས་རྒྱས་པའི་སྟོན་པ་བཅོམ་ལྡན་འདས་ཉིད་ཐོག་མར་སེམས་ཅན་ཐ་དམན་པ་ཞིག་གནང་ཡོད་པ་དང་དེ་ནས་བསླབ་པ་ལམ་གྱི་གནས་སྐབས་རིམ་པ་རྒྱུད་དེ་མཐར་མངོན་པར་རྫོགས་པའི་སངས་རྒྱས་ཡོད། དེར་བརྟེན་སྟོན་པ་བཅོམ་ལྡན་འདས་སྐུ་རང་ཉིད་སེམས་ཅན་མཐའ་དམན་པའི་སྐབས་སུ་ཡིན་ནའང་གང་ལྟར་ཐུགས་བརྒྱུད་ལ་ཁམས་བདེ་གཤེགས་སྙིང་པོ་ཞེས་པ་དེ་ཡོད་པ་ཡིན་དུས་དེའི་སྟེང་གི་དྲི་མ་སྦྱང་སྟེ་མཐར་མངོན་པར་རྫོགས་པའི་སངས་རྒྱས་པ་རེད། དེ་འདྲ་ཡིན་དུས་ཁོང་གི་གདུལ་བྱ་སེམས་ཅན་ཚང་མའི་རྒྱུད་ལ་ཁམས་བདེ་གཤེགས་སྙིང་པོ་ཡོད་སྟབས་དྲི་མ་ཟད་ཐུབ་རྒྱུ་ཞིག་ཡོད། དེར་བརྟེན་དྲི་མ་སྦྱོང་ཐབས་ལ་འབད་བརྩོན་བྱེད་དགོས་སྐོར་གསུངས་ཡོད། དེ་ཡང་བཅོམ་ལྡན་འདས་ཀྱིས། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མིན་ཏེ། ཆོས་ཉིད་བདེན་པ་བསྟན་པས་གྲོལ་བར་འགྱུར། ཞེས་ང་ཚོ་སངས་རྒྱས་པའི་ཆོས་པ་ཞིག་ཡིན་ན་དཀའ་ངལ་ག་ཚད་འཕྲད་ཀྱང་སོ་སོ་རང་ཉིད་ཀྱི་སེམས་པའི་གཞི་ཕུག་དེར་ཁམས་བདེ་གཤེགས་སྙིང་པོ་ཡོད། མཐར་ཐུག་ང་སངས་རྒྱས་ཐུབ་ཀྱི་རེད། དེ་འདྲ་ཡིན་དུས་འཕྲལ་སེལ་གྱི་དཀའ་ངལ་རྣམས་རང་ཉིད་ཀྱིས་ཏན་ཏན་སེལ་ཐུབ་ཀྱི་རེད་སྙམ་པའི་སྤོབས་སེམས་དགོས་རྒྱུ་ཧ་ཅང་གལ་ཆེན་པོ་ཡིན། ལྷ་ཁང་ནང་མཆོད་མཇལ་ཞུ་བར་ཡོང་སྐབས་སྟོན་པའི་བསླབ་བྱ་དེ་དག་དྲན་པ་བྱས་ཏེ་སྐུ་བརྙན་ག་དུས་མཇལ་ཡང་རང་ཉིད་ཀྱི་སེམས་རྒྱུད་དེ་རང་གིས་འདུལ་དགོས་ཀྱི་ཡོད་སྙམ་པ་དྲན་དགོས་པ་དང་། རང་གི་རྒྱུད་ལ་ཁམས་བདེ་གཤེགས་སྙིང་པོ་ཡོད་པར་སོང་རིམ་པས་མཐར་ཐུག་འབྲས་བུ་སངས་རྒྱས་ཀྱི་སར་ཆོས་སྐུར་འགྱུར་ཐུབ་པ་བྱེད་དགོས་ཡོད་བསམ་པའི་དགོངས་པ་བཞེས་དགོས། ལྷ་ཁང་ནང་ཕྱིན་ནས་འཕྲལ་སེལ་གྱི་སོ་སོའི་དཀའ་ངལ་རྣམས་དཀོན་མཆོག་ཁྱེད་རང་གིས་སེལ་རོགས་གནང་ཞེས་སྨོན་ལམ་ག་ཚོད་བརྒྱབ་ནའང་ཕལ་ཆེར་དཀའ་ངལ་སེལ་ཐུབ་ཀྱི་མ་རེད། དཀའ་ངལ་སེལ་མ་ཐུབ་པའི་སྐབས་དེར་དཀོན་མཆོག་ལ་གསོལ་བ་བཏབ་ཀྱང་ཕན་ཐོགས་གང་ཡང་མི་འདུག་ཅེས་སྡུག་སྐད་རྒྱག་རྒྱུ་ལྟ་བུ་ཆགས་ཀྱི་རེད། བཅོམ་ལྡན་འདས་ཀྱིས་བདག་ཉིད་བདག་གི་མགོན་ཡིན། ཞེས་གསུངས་ཡོད། སོ་སོའི་མགོན་དེ་སོ་སོ་ཆགས་ཡོད་པར་སོང་རང་ཉིད་སྡུག་བསྔལ་ལས་གྲོལ་རྒྱུ་དེ་སོ་སོ་རང་ཉིད་ཀྱིས་བྱེད་དགོས་པ་དང་རང་གི་འདོད་པའི་དོན་དེ་རང་གིས་དཀའ་ངལ་བརྒྱབ་སྟེ་བསྒྲུབ་དགོས་པ་ཆགས་ཡོད། བཅོམ་ལྡན་འདས་ཀྱིས་སེམས་དུལ་བ་ནི་བདེ་བ་སྟེ། ཞེས་སེམས་དུལ་ན་བདེ་བ་ཡོང་གི་རེད་ཅེས་གསུངས་ཡོད། དེ་ནས་རྣམ་པ་ཚོར་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་ཟབ་མོ་སྩལ། དེ་རྗེས་ཉི་ཧོང་གི་དགོན་པ་དེའི་ནང་ཇོ་ཌོ་ཆོས་བརྒྱུད་ཀྱི་དད་ལྡན་མི་མང་གྲངས་ ༣༠༠ བརྒལ་བ་བཅར་ཡོད་པ་རྣམས་ལ་༸གོང་ས་མཆོག་གིས་བདེན་བཞིའི་ཆོས་འཁོར་གྱི་བཀའ་ཆོས་དང་དེར་བཅར་བའི་མི་མང་རྣམས་ལ་དྲི་བ་ཞུ་རྒྱུའི་གོ་སྐབས་ཀྱང་སྩལ་ཏེ་དྲི་བར་བཀའ་ལན་སྩལ། ཉིན་གུང་ལྗགས་སྨིན་དགོན་དེར་མཛད་ཡོད། དེ་ནས་ཉིན་རྒྱབ་ཆུ་ཚོད་ ༡༢།༣༠ ཐོག་ན་ག་ནོ་ཁུལ་གྱི་ཐེངས་དང་པོར་ཆིབས་སྒྱུར་བསྐྱངས་ནས་མཛད་འཕྲིན་རྣམས་ཡོངས་སུ་ལེགས་གྲུབ་ཟིན་ཏེ་དད་ལྡན་མི་མང་བརྒྱ་ཕྲག་མང་པོས་ཕེབས་སྐྱེལ་དང་སྦྲགས་ཀ་ན་ཛ་ཝར་ཆིབས་༸ཞལ་བསྒྱུར།།
