༢༠༡༠ ཟླ་ ༥ ཚེས་ ༡༤ རེས་གཟའ་པ་སངས།
༄༅། །འདི་གར་སིམ་ལ་ས་གནས་འགོ་འཛིན་ལས་ཁུངས་ནས་བཏང་གནས་ནང་གསལ། ཕྱི་ལོ་ ༢༠༠༩ ཟླ་ ༤ ཚེས་ ༡ ནས་ཕྱི་ལོ་ ༢༠༡༠ ཟླ་ ༣ ཚེས་ ༣༡ བར་དུས་ཡུན་ལོ་གཅིག་ཧྲིལ་པོར་སིམ་ལ་ས་གནས་འགོ་འཛིན་གྱིས་ཆབ་སྲིད་དང་འབྲེལ་བའི་ལས་དོན་མང་དག་ཅིག་སྤེལ་ཡོད། དེ་ཡང་ཕྱི་ལོ་ ༢༠༠༩ ཟླ་ ༧ ཚེས་ ༦ ཉིན་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༤ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་པའི་མཛད་སྒོའི་ཐོག་ས་གནས་མི་མང་དང་སྒྲིག་འཛུགས་སོ་སོའི་རྒྱུན་ལས། སློབ་གྲྭའི་དགེ་ལས་སློབ་ཕྲུག་བཅས་ལྷན་འཛོམས་ཐོག་ས་གནས་འགོ་འཛིན་ནས་དུས་ཆེན་ངོ་སྤྲོད་དང་། རང་གཞུང་བཀའ་ཤག་གི་སྐུའི་འཁྲུངས་སྐར་གསུང་འཕྲིན་སྒྲོགས་སྦྱང་ཞུས་སྟེ་དུས་ཆེན་ཟབ་རྒྱས་ངང་སྲུང་བརྩི་ཞུས་ཡོད། དེ་བཞིན་བོད་མིའི་སྡོད་སྒར་ཁག་ཏུ་བོད་མི་རྣམས་ཀྱི་ཆབ་སྲིད་གོ་རྟོགས་གོང་འཕེལ་དང་། བོད་དོན་གནས་ཚུལ་གསར་པ་འབྱོར་མཚམས་ས་གནས་གཞོན་ནུའི་བརྙན་འཕྲིན་བརྒྱུད་ལམ་ (Cable) བརྒྱུད་ཁྱབ་ཁོངས་མང་ཚོགས་ལ་སྟོན་རྒྱུ། བརྙན་འཕྲིན་འོད་སྡེར་མང་ཚོགས་ལ་གཡར་རྒྱུའི་མཚོན་པའི་ལས་གཞི་རྒྱ་ཆེ་ཞིག་སྤེལ་ཡོད། གཞན་ཡང་ས་གནས་གཞོན་ནུ་དང་བུད་མེད་གཉིས་ཀྱི་གོ་སྒྲིག་འོག་པཌྷ་ཆེན་རིན་པོ་ཆེའི་འཁྲུངས་སྐར་སྲུང་བརྩིའི་མཛད་སྒོར་མཉམ་བཞུགས་བྱེད་བཞིན་ཡོད།ཕྱི་ལོ་ ༢༠༠༩ ཟླ་ ༩ ཚེས་ ༢ ཉིན་ལོ་ལྟར་རང་གཞུང་མང་གཙོའི་ལམ་བུ་སྲོལ་གཏོད་པའི་གཞུང་འབྲེལ་དུས་ཆེན་སྲུང་བརྩི་ཞུས་པའི་ཐོག་ས་གནས་འགོ་འཛིན་ནས་བཙན་བྱོལ་དུ་མང་གཙོའི་འཕེལ་རིམ་སྐོར་དང་། མང་ཚོགས་ཀྱི་ཆ་ཤས་ལེན་སྟངས་སྐོར་ལམ་སྟོན་དང་། དཔལ་ལྡན་བོད་གཞུང་བཀའ་ཤག་གི་གཏམ་བཤད་མང་ཚོགས་སུ་སྒྲོགས་སྦྱང་ཞུས་ཡོད། ཕྱི་ལོ་ ༢༠༠༩ ཟླ་ ༢ ཚེ་ ༥ ཉིན་ (Dr. Mahesh Yadav) ལགས་སིམ་ལར་ཕེབས་ཏེ་རྒྱ་གར་མི་མང་དང་། གསར་འགོད་པ་རྣམས་ལ་བོད་དོན་དྲིལ་བསྒྲགས་གནང་སྐབས། འདི་ལས་ནས་སྣེ་ལེན་གང་འོས་ཞུས་ཡོད་པ་བཅས་སིམ་ལ་ས་གནས་འགོ་འཛིན་ལས་ཁུངས་ཀྱིས་ཆབ་སྲིད་དང་འབྲེལ་བའི་ལས་དོན་ཇི་སྤེལ་གྱི་ལོ་འཁོར་གཅིག་གི་ལས་བསྡོམས་སྙིང་བསྡུས་བཅས།།
