༢༠༡༠ ཕྱི་ཟླ་ ༥ ཚེས་ ༡༨ རེས་གཟའ་མིག་དམར།
༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༤ ཚེས་ ༣༠ ཉིན་བོད་གཞུང་མང་བཙན་བྱོལ་དུ་འབྱོར་ནས་ལོ་ ༥༠ འཁོར་བའི་དུས་ཚིགས་དང་སྟབས་བསྟུན་ས་བྱི་ཞི་རྒོལ་ཆེན་མོའི་དྲན་རྟེན་སླད་གློ་སྒྲིག་བྱམས་པ་གླིང་གཞིས་ཆགས་སུ་བདུད་འདུལ་བྱང་ཆུབ་མཆོད་རྟེན་ཞིག་གསར་བཞེངས་ཟིན་པའི་དབུ་འབྱེད་རབ་གནས་ཀྱི་མཛད་སྒོ་ཚོགས་པར་སྐུ་མགྲོན་གཙོ་བོ་སྒྲུབ་བརྒྱུད་བསྟན་པའི་གསལ་བྱེད་སྟག་ལུང་མ་སྤྲུལ་རིན་པོ་ཆེ་མཆོག་གིས་དབུ་འབྱེད་གནང་ཡོད། དེ་བཞིན་དམིགས་བསལ་སྐུ་མགྲོན་བལ་པོའི་གཞུང་འབྲེལ་མིན་པའི་ཚོགས་པ་སམ་བྷད་ནེ་པལ་གྱི་ཚོགས་གཙོ་ནིལ་ཏ་ཤཱར་མ་ལགས་ཀྱིས་མིང་བྱང་ཞལ་ཕྱེ་གནང་རྗེས་སྐུ་མགྲོན་གཙོ་བོ་མཆོག་གིས་སྣང་གསལ་ཞལ་འབྱེད་གནང་། རིན་པོ་ཆེ་དབུ་བཞུགས་ཐོག་ཤྲི་དགའ་ལྡན་དར་རྒྱས་གླིང་གི་སྤྲུལ་སྐུ་རིན་པོ་ཆེ་མཆོག་དང་། ཆོག་གྲ་བཅས་ནས་ཁྲུལ་གསོལ་དང་རབ་གནས་གནང་། གཞན་ཡང་ས་གནས་ཡུལ་མིའི་ཚོགས་པ་ཁག་གི་ཚོགས་གཙོ་དང་སྐུ་ཚབ་འཐུས་མི། ས་གནས་ཡུལ་སྐོར་སྐུ་སྲུང་པའི་འགོ་ཁྲིད། སྤོག་ར་བོད་མིའི་གཞིས་ཁག་གི་ས་གནས་འཐུས་ཚོགས་ཁག་གི་ཚོགས་གཙོ་དང་། ས་གནས་འགོ་འཛིན་རྣམ་པ། གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་། དགོན་པ་ཁག་གི་སྐུ་ཚབ། གསར་འགོད་པ་བཅས་ཁྱོན་སྐུ་མགྲོན་མི་གྲངས་ ༨༠ བརྒལ་བ་དང་གཞིས་ཆགས་ས་གནས་མི་མང་སོགས་ནས་མཆོད་འབུལ་གྲུབ་རྗེས་རྟེན་འབྲེལ་མཚོན་ཆེད་དུ་གསོལ་ཇ་དང་འབྲས་སིལ་ཕུལ། དེ་ནས་མཆོད་རྟེན་གསར་བཞེངས་འགན་འཁུར་བ་ས་གནས་འགོ་འཛིན་གྱིས་མཆོད་རྟེན་གསར་བཞེངས་གནང་དགོས་པའི་དམིགས་ཡུལ་སྙིང་བསྡུས་ནི། སྔ་ལོ་ ༢༠༠༨ ལོར་བོད་རྒྱལ་ཡོངས་སུ་བོད་རིགས་རྩམ་ཟན་རྣམས་ཀྱི་སྐྱིད་སྡུག་མཉམ་མྱོང་གི་འབོད་སྒྲ་ས་བྱི་ཞི་རྒོལ་ཆེན་མོ་སྐབས་རྒྱ་གཞུང་གི་དྲག་གནོན་འོག་ཁུངས་བདེན་ར་འཕྲོད་པ་བོད་མི་ཉི་བརྒྱ་ལྷག་དམར་བསད་བཏང་བ་དང་། བརྒྱ་ཕྲག་ཁ་ཤས་གར་སོང་ཆ་མེད་དུ་གྱུར་པ། སྟོང་ཕྲག་མང་པོ་རྒྱུ་མཚན་གང་ཡང་མེད་པར་ཆབ་སྲིད་ཀྱི་ཉེས་མིང་བཀལ་ཏེ་བཙོན་ཁང་ནང་མནར་གཅོད་དང་དྲང་བདེན་གྱི་ཁྲིམས་བཤེར་མེད་པར་སྲོག་ཁྲིམས་དང་ཚེ་བཙོན་ཉེས་ཆད་བསམ་ཡུལ་ལས་འདས་པའི་དཀའ་ཉེན་མྱང་དང་མྱོང་བཞིན་པ་དང་། བོད་རྒྱལ་ཁབ་བསྟན་སྲིད་མི་རིགས་ཀྱི་དོན་དུ་གཞིས་བཞུགས་སྤུན་ཟླ་ཡོངས་ནས་རང་གི་ལུས་སྲོག་ལ་ཇི་མི་སྙམ་པར་ཞུམ་མེད་སྙིང་སྟོབས་དང་། ལྷག་བསམ་འགྱུར་མེད་བྲག་རི་ལྟར་བརྟན་པའི་བཀའ་དྲིན་དྲན་སྐུལ་དང་། བསྐལ་པ་ཇི་སྲིད་བར་བརྗེད་མེད་སྙིང་གི་རི་མོར་བཀོད་དེ་གཞིས་བྱེས་གདུང་ཤུགས་གཅིག་སྒྲིལ་གྱི་གཡར་དམ་མངོན་དུ་མཚོན་པའི་དམ་ཚིག་གི་རྟེན་འགྱུར་མེད་རྡོ་རྗེའི་རི་བོ་ལྟ་བུ་ཡོང་བའི་ཆེད་ལས་གཞི་འདི་འདྲ་ཞིག་རྩོམ་རྒྱུའི་འདུན་པ་བཅངས་ཡོད། ཅེས་སོགས་ལས་བསྡོམས་སྒྲོག་སྦྱངས་རྗེས་རྩིས་པའི་འགན་འཁུར་བ་སློབ་གྲྭའི་དགེ་ཆེ་ནས་རྩིས་ཁྲ་སྒྲོགས་སྦྱང་ཞུས། དེ་ནས་དམིགས་བསལ་སྐུ་མགྲོན་དང་སྐུ་མགྲོན་གཙོ་བོ་རྣམས་གཉིས་ནས་གསུང་བཤད་རིམ་པ་གྲུབ་བསྟུན་སློབ་ཕྲུག་རྣམས་ཀྱིས་གཞས་སྣ་ཁག་གཅིག་འཁྲབ་སྟོན་ཞུས་རྗེས་སྐུ་མགྲོན་གཙོ་བོ་མཆོག་གིས་མཆོད་རྟེན་བཞེངས་སྐྲུན་ཚོགས་ཆུང་གི་ཚོགས་མི་རྣམས་ལ་ལེགས་གསོལ་མཇལ་དར་དང་ཕྱག་སྲུང་གནང་། དེ་རྗེས་ཚོགས་མི་ས་གཞོན་དྲུང་ཆེས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་བ་བཅས།
