༢༠༡༠ ཕྱི་ཟླ་ ༥ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་ཨིན་ཌི་ཡཱ་ནའི་མངའ་སྡེའི་རྒྱལ་ས་ཨིན་ཌི་ཡཱ་ནའི་པོ་ལི་སིའི་ཚོགས་ཁང་དུ་༸ཞབས་སོར་འཁོད་མཚམས་ཨ་རིའི་རོལ་ཆ་གཏོང་རྒྱུར་ཤིན་ཏུ་མཁས་པ་སྐུ་ཞབས་མེ་ཁལ་ (Michael Fitzpatrick) ལགས་ཀྱིས་གུས་བསུའི་རོལ་དབྱངས་གཟིགས་འབུལ་ཞུས་རྗེས་མངའ་སྡེ་དེའི་མི་སྣ་གྲགས་ཅན་བོད་སོག་ནང་བསྟན་རིག་གཞུང་གཅེས་སྐྱོང་ཁང་གི་ལྕམ་སྐུ་ཨེ་ལེན་མེལ་ལི་ཁམ་ (Elaine Mellencamp) ལགས་ཀྱིས་མགོན་པོ་གང་ཉིད་མཆོག་མང་ཚོགས་རྣམས་ལ་ངོ་སྤྲོད་ཞུས་སྐབས། མི་མང་ཚང་མས་ཡར་ལངས་སྟེ་༸གོང་ས་མཆོག་ལ་དགའ་བསུའི་ཐལ་མོ་ཡུན་རིང་རྡེབ་བཞིན་གུས་བསུ་ཆེན་པོ་ཞུས།
དེ་ནས་༸གོང་ས་མཆོག་གིས་བྱམས་བརྩེ་དང་ཤེས་རབ་བརྒྱུད་དཀའ་ངལ་ལ་གདོང་ལེན་བྱེད་ཕྱོགས། ཞེས་པའི་བརྗོད་གཞིའི་ཐོག་མང་ཚོགས་རྣམས་ལ་བཀའ་སློབ་སྩལ་དོན། འགྲོ་བ་མིའི་ཁམས་དང་མོས་པ་སྣ་ཚོགས་ཡོད་པར་བརྟེན། འཛམ་གླིང་ནང་ཆོས་ལུགས་སྣ་ཚོགས་གསར་གཏོད་བྱུང་ཡོད་པ་དང་། དེ་དག་གི་བསླབ་བྱའི་སྙིང་པོ་ནི་གཞན་ལ་བྱམས་པ་དང་། སྙིང་རྗེ། བཟོད་བསྲན་བཅས་བྱེད་དགོས་པ་གཅིག་གྱུར་ཡིན། གལ་སྲིད་འཛམ་གླིང་ནང་དར་བའི་ཆོས་ལུགས་རྣམས་མཛའ་མཐུན་གོང་སྤེལ་གཏོང་ཐུབ་ན། ད་ཡོད་འཛམ་གླིང་ནང་གི་དཀའ་ངལ་མང་པོ་ཞིག་སེལ་ཐུབ་པ་ཀྱི་རེད། ངོས་རང་ད་ལམ་ཨིན་ཌི་ཡཱ་ནའི་མི་མང་ཚོར་ཆོས་འབྲེལ་བྱེད་རྒྱུ་བྱུང་བ་མ་ཟད། དོན་གནད་གཙོ་བོ་དེ་འགྲོ་བ་མིའི་རིན་ཐང་གོང་འཕེལ་གཏོང་ཐབས་དང་། འཛམ་གླིང་གི་ཆོས་ལུགས་ནང་ཁུལ་མཛའ་མཐུན་གོང་འཕེལ་གཏོང་ཐབས་བྱས་པ་དེས་འཛམ་གླིང་སྤྱི་ལ་ཕན་པའི་ཞབས་འདེགས་སྒྲུབ་ཐུབ་ཀྱི་ཡོད་པར་ངོས་འཛིན་བྱེད་བཞིན་ཡོད་ཅེས་བཀའ་སྩལ། ཡང་༸གོང་ས་མཆོག་གིས་བཀའ་སློབ་ཕེབས་དོན། འཛམ་གླིང་འདིར་འཇིག་རྟེན་བཀོད་པ་པོ་འདོད་མཁན་དང་མི་འདོད་མཁན་བཅས་གཉིས་ཡོད། དེ་བཞིན་ཆོས་ལ་ཡིད་ཆེས་མེད་མཁན་ཡང་ཡོད།
དེ་དག་ཚང་མས་མི་ཚེ་བདེ་སྐྱིད་དང་ལྡན་པ་ཞིག་ཡོང་རྒྱུར་འདོད་པ་བྱེད་ཀྱི་ཡོད་པ་གཅིག་མཚུངས་ཡིན། འཛམ་གླིང་འདིར་མི་གྲངས་དུང་ཕྱུར་དྲུག་ཅུ་ཙམ་ཡོད་པ་ཚང་མར་མི་ཚེ་བདེ་སྐྱིད་ལྡན་པའི་ཐོག་སྐྱེལ་རྒྱུའི་ཐོབ་ཐང་འདྲ་མཉམ་ཡོད། དེ་ལྟ་བུའི་མི་ཚེ་བདེ་སྐྱིད་ལྡན་པ་ཞིག་ཡོང་བའི་ཐབས་ལམ་མི་འདྲ་བ་སྣ་ཚོགས་ཡོད། འགའ་ཤས་ཀྱི་ཆོས་ཉམས་ལེན་ལ་བརྟེན་ནས་མི་ཚེ་བདེ་སྐྱིད་ལྡན་པ་ཞིག་ཡོང་ཐབས་བྱེད་ཀྱི་ཡོད་པ་དང་། ཕྱོགས་མཚུངས་མི་ཚེ་བདེ་སྐྱིད་ལྡན་པ་ཡོང་རྒྱུར་རྒྱུ་དང་དངོས་པོ། དེ་བཞིན་དབང་ཤུགས་ཁོ་ནར་བརྟེན་ནས་ཡོང་ཐབས་མེད་ཅིང་། གཙོ་ཆེ་ཤོས་ནང་སེམས་ལ་བཟོ་བཅོས་རྒྱག་ཐུབ་པ་བྱེད་རྒྱུ་དང་། དེ་ཡང་བྱམས་བརྩེའི་བསམ་བློ་གོང་མཐོར་གཏོང་ཐབས་བྱེད་དགོས་པ་ཡིན། བྱམས་བརྩེ་ལྡན་པའི་ཁོར་ཡུག་དེ་ནི་མི་ཚེ་བདེ་སྐྱིད་ལྡན་པ་ཡོང་བའི་གཞི་རྩ་ཡིན་པས། དེ་ལྟར་ཡོང་བར་དོན་དམ་པའི་མཛའ་མཐུན་ཞིག་དགོས་པ་ཤིན་ཏུ་གལ་འགངས་ཆེན་པོ་ཡིན། མཛའ་མཐུན་ལྡན་པ་ཞེས་པ་དེ་ཕན་ཚུན་ཡིད་ཆེས་དང་། བྱམས་བརྩེ། བརྩེ་གདུང་གི་འདུ་ཤེས་ལ་བརྟེན་ནས་ཡོང་གི་ཡོད། བྱམས་བརྩེའི་ནུས་པ་མེད་པའི་དབང་གིས་ཕན་ཚུན་གཅིག་གིས་གཅིག་ལ་དོགས་པ་དང་རྣམ་རྟོག་སོགས་ཡོང་གི་ཡོད། མི་སྒེར་པ་ཞིག་ལ་ཆ་མཚོན་ན་དབང་ཤུགས་ཇི་ཙམ་ཡོད་ཀྱང་མི་དེ་མི་ཚེ་བདེ་སྐྱིད་ལྡན་པ་ཞིག་ཡོང་བར་སྤྱི་ཚོགས་འདིའི་ནང་གནས་མཁན་མི་ཚང་མར་འབྲེལ་བ་ཆགས་ཡོད།
དེར་བརྟེན་གནས་ཚུལ་དེ་ཀུན་གྱི་གསལ་རྟོགས་ཐུབ་པའི་གནས་ཚུལ་ཞིག་ཡིན་པར་ངེས་ཤེས་རྙེད་པ་བྱས་ཏེ། མི་ཚེ་བདེ་སྐྱིད་ལྡན་པ་དེ་བྱམས་བརྩེའི་ཉམས་ལེན་ལ་འབྲེལ་བ་ཆེན་པོ་ཡོད། ངོས་ཀྱིས་རྒྱུན་དུ་བྱམས་བརྩེའི་ཉམས་ལེན་གོང་དུ་གཏོང་ཐབས་ཞེས་པ་དེ་ཆོས་ལུགས་ཀྱི་གནད་དོན་ཞིག་མིན་པར་ཆོགས་ལུགས་དང་མ་འདྲེས་བའི་ཡ་རབས་བཟང་སྤྱོད་ཀྱི་ལྟ་གྲུབ་ཅེས་བརྗོད་ཀྱི་ཡོད། ཆོས་ལུགས་དང་མ་འདྲེས་བའི་ལྟ་གྲུབ་ཅེས་པ་དེ་ཆོས་ལ་ཡིད་ཆེས་མི་བྱེད་པ་དང་། ཡང་ན་ཆོས་གཏན་ནས་ཁས་མི་ལེན་མཁན་ཞིག་ལ་ངོས་འཛིན་བྱེད་རྒྱུ་མེད། ཤེས་ཡོན་སློབ་གསོའི་ལས་རིགས་ནང་དེ་འདྲའི་སློབ་སྦྱོང་སྤྲོད་ཀྱི་མེད་པ་ད་ཆ་སྐྱོན་ལ་མཐོང་ནས་སློབ་གསོའི་ནང་འགྲོ་བ་མིའི་རིན་ཐང་གོང་མཐོར་གཏོང་ཐབས་སུ་སློབ་སྦྱོང་སྤྲོད་དགོས་པ་དེ་དགོས་གལ་ཆེན་པོ་ཆགས་ཡོད། ད་ཆ་ཤེས་ཡོན་སློབ་གསོ་ཞེས་པ་དེ་ཀླད་པ་ཡར་རྒྱས་གཏོང་རྒྱུ་ཁོ་ན་མ་ཡིན་པར་བྱམས་བརྩེའི་བསམ་བློ་གོང་མཐོར་གཏོང་རྒྱུའང་ཡིན། དེ་ཡང་ཆོས་དང་མཉམ་བསྲེས་བྱེད་མི་དགོས་པར་ཆོས་དང་མ་འདྲེས་བའི་ཡ་རབས་བཟང་སྤྱོད་ཀྱི་སློབ་སྦྱོང་སྤྲོད་དགོས་པ་དེ་གལ་ཆེན་པོ་ཆགས་ཡོད། གལ་ཏེ་དེ་ལྟར་བྱེད་ཐུབ་ན་འཛམ་གླིང་གི་སྤྱི་ཚོགས་འདི་སྤྱི་ཚོགས་གསར་པ་ཞིག་བཟོ་ཐུབ་ཀྱི་རེད། ལས་དོན་དེའི་ཆེད་ཚན་རིག་པ་དང་ཤེས་ཡོན་སློབ་གསོའི་ནང་ལས་དོན་གནང་མཁན་མཁས་པ་ཚོས་ཐུགས་སྣང་གསར་པ་ཞིག་གནང་སྟེ། ལོ་གཅིག་ཙམ་གོང་དེའི་སྐོར་ཉམས་ཞིབ་ཀྱི་ལས་གྲྭ་གསར་པ་ཞིག་འགོ་འཛུགས་ཟིན་ཡོད། ཅེས་དངོས་གཞིའི་བཀའ་སློབ་སྩལ་གྲུབ་མཚམས་མང་ཚོགས་ཀྱིས་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། དེང་སྐབས་འཕྲུལ་རིགས་ལག་རྩལ་ཡར་རྒྱས་ཆེན་པོ་ཕྱིན་པ་དེས་འཛམ་གླིང་ནང་ན་གཞོན་ཕོ་མོ་ཚོས་དེ་དག་ལོངས་སྤྱོད་ཧ་ཅང་ཆེན་པོ་བྱེད་ཀྱི་ཡོད་པ་དེས་བྱམས་བརྩེའི་ཉམས་ལེན་ཐོག་ཕན་ནུས་གང་འདྲ་ཡོང་གི་ཡོད་མིན་ནི། འཕྲུལ་རིགས་ཡར་རྒྱས་ཕྱིན་པ་ཕྱོགས་གཅིག་ནས་བལྟས་ན་ལེགས་པོ་ཡིན་ནའང་དེར་བརྟེན་དྲག་ན་སྐྱོན་ཡོང་གི་ཡོད་བཅས།།
