༢༠༡༠ ཟླ་ ༥ ཚེས་ ༡༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༡༡ རེས་གཟའ་མིག་དམར་ཉིན་རྒྱབ་༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་བརྒྱུད་ཨ་རིའི་མངའ་སྡེ་ཤི་ཁ་གོའི་གནམ་ཐང་དུ་༸ཞབས་སོར་འཁོད་སྐབས་བྱང་ཨ་རིའི་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་མཆོག་དང་། ཨིན་ཌི་ཡ་ན་དང་ཤི་ཁ་གོའི་བོད་རིགས་ཚོགས་པའི་ཚོགས་གཙོ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་རྗེས་མགོན་པོ་གང་ཉིད་མཆོག་ཨ་རིའི་མངའ་སྡེ་ཨིན་ཌི་ཡ་ནའི་བུ་ལུ་མིང་ཊོན་གྱི་གནམ་ཐང་དུ་༸ཞབས་སོར་འཁོད་མཚམས་ཨིན་ཌི་ཡ་ནར་རྟེན་གཞི་བྱས་པའི་བོད་སོག་ནང་པའི་རིག་གཞུང་གཅེས་སྐྱོང་བསྟི་གནས་ཁང་གི་འགན་འཛིན་ཨཀྱཱ་རིན་པོ་ཆེ་མཆོག་དང་། ཨུ་རུ་སུ་སྤྱི་མཐུན་རྒྱལ་ཁབ་ཀྱི་ཁལ་མུཀ་ནང་བསྟན་གྱི་གཙོ་འཛིན་ཏེ་ལོ་རིན་པོ་ཆེ་མཆོག དེ་བཞིན་ཨིན་ཌི་ཡ་ནའི་བོད་རིགས་ཚོགས་པའི་ཚོགས་གཙོ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། གནམ་ཐང་ནས་༸གོང་ས་༸སྐྱབས་མགོན་ཆེན་པོ་མཆོག་བཞུགས་གནས་མགྲོན་ཁང་དུ་ཆིབས་སྒྱུར་སྐྱོང་སྐབས་ཤི་ཁ་གོའི་བོད་རིགས་གཞོན་ནུ་ཚོས་བཀྲ་ཤིས་ཞོལ་པའི་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་ཞུས། ༸གོང་ས་མཆོག་བཞུགས་གནས་མགྲོན་ཁང་ནང་ཆིབས་སྒྱུར་མ་གནང་གོང་མ་ཎི་ལྷ་ཁང་གསར་པ་ཞིག་དབུ་འབྱེད་མཛད་ཆེད་ཆིབས་སྒྱུར་བཀྲིན་སྐྱོང་སྐབས་ལམ་ཟུར་དུ་བོད་སོག་ནང་པའི་རིག་གཞུང་གཅེས་སྐྱོང་ཁང་གི་ལས་བྱེད་པ་དང་། བོད་རིགས། སོག་རིགས། རྒྱ་རིགས། ཉི་ཧོང་མི་རིགས། ཨ་རི་བ་བཅས་དད་ལྡན་མང་ཚོགས་བརྒྱ་ཕྲག་བརྒལ་བ་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་མགོན་པོ་གང་ཉིད་མཆོག་བཞུགས་གནས་མགྲོན་ཁང་གི་མདུན་དུ་སྒོ་མང་གྲྭ་ཚང་གི་མཁན་པོ་དང་བཀྲ་ཤིས་ལྷུན་པོའི་མཁན་པོ། སོག་ཡུལ་ནང་ཡོད་པའི་དགའ་ལྡན་ཐེག་ཆེན་གླིང་དགོན་པའི་མཁན་པོ། ཁམས་པ་བླ་མ་ཆོས་ཀྱི་རྒྱ་མཚོ། སོག་ཡུལ་དུ་རྟེན་གཞི་བྱས་པའི་ཨར་ཌེན་ཛུ་དགོན་པ་དང་། དུས་འཁོར་ལྷ་ཁང་གི་མཁན་པོ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
