༢༠༡༠ ཟླ་ ༥ ཚེས་ ༡༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༧ ཉིན་ཨེ་པི་ གསར་ཁང་གི་གསར་འགོད་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་དོན་སྐོར་གྱི་བཀའ་འདྲི་ཞུས་པར་བཀའ་ལན་ཕེབས་དོན། བཙན་བྱོལ་བོད་མིའི་ལས་འགུལ་བ་ཚོས་ད་བར་བོད་རྒྱ་གྲོས་མོལ་ཐོག་གྲུབ་འབྲས་ཇི་བྱུང་ལ་མ་ལྟོས་པར་མུ་མཐུད་གྲོས་མོལ་བྱ་རྒྱུར་ཤུགས་གནོན་རྒྱག་དགོས། འདས་པའི་ལོ་བཅུ་ཕྲག་རིང་རྒྱ་བོད་གྲོས་མོལ་དེར་བཟང་ཕྱོགས་ཀྱི་གྲུབ་འབྲས་གང་ཡང་ཐོན་མེད་ཀྱང་། མ་འོངས་པར་བོད་རྒྱའི་འབྲེལ་ལམ་ཐོག་ཡར་རྒྱས་ཀྱི་རྣམ་པ་བྱུང་མི་སྲིད་པ་མིན། རྒྱ་ནག་ནང་བོད་དོན་ཐོག་གདུང་སེམས་མཉམ་སྐྱེ་བྱེད་མཁན་རྒྱ་རིགས་མཁས་དབང་ཇེ་མང་དུ་འགྲོ་བཞིན་པར་གཞིགས་ན་རྒྱ་ནག་གཞུང་གི་སྲིད་བྱུས་ཐོག་འགྱུར་བ་འགྲོ་སྲིད་པའི་རྣམ་པ་གསལ་པོ་མཚོན་བཞིན་ཡོད། དེང་སྐབས་རྒྱ་ནག་གཞུང་གི་མཐོ་རིམ་མི་སྣའི་ནང་དུའང་བོད་ཐོག་འཛིན་པའི་སྲིད་བྱུས་ལྷོད་དུ་གཏོང་དགོས་པའི་ལྟ་ཚུལ་འདོན་མཁན་ཡོད་པ་དང་། རྒྱ་ནག་དཔོན་རིགས་འགས་བོད་ཐོག་འཛིན་པའི་རྒྱ་ནག་གཞུང་གི་སྲིད་བྱུས་དེ་ཕྱི་གསལ་ནང་གསལ་དང་། ཞི་འཇམ་ལྡན་པ་ཞིག་གཏོང་དགོས་པའི་དུས་ལ་སླེབས་ཡོད་པར་ངོས་འཛིན་བྱེད་མཁན་ཡོད་སྐོར་གོ་ཐོས་བྱུང་། དེ་བདེན་པ་ཡིན་མིན་མི་ཤེས། འོན་ཀྱང་ང་ཚོས་སྒུག་ནས་སྡོད་རྒྱུ་རེད། ང་ཚོས་ད་བར་ལོ་ ༥༡ སྒུག་ཡོད། ད་དུང་ཡང་ལོ་ ༡༠ ནས་ ༢༠ སྒུག་དགོས་བྱུང་ཡང་སྒུག་རྒྱུ་རེད། ཅེས་ཞལ་ཤོབ་དང་སྦྲགས་བཀའ་སྩལ། དེ་བཞིན་༸གོང་ས་མཆོག་གིས། བོད་ཀྱི་དཀའ་རྙོག་སེལ་རྒྱུའི་ཐབས་ལམ་གཅིག་མ་གཏོགས་མེད་པ་ནི་རྒྱ་ནག་དང་མཉམ་གྲོས་མོལ་བྱ་རྒྱུ་དེ་ཡིན། ང་ཚོས་རང་བཙན་རྩོད་ཀྱི་མེད་པ་དེ་འཛམ་གླིང་ཡོངས་ཀྱིས་ཤེས་རྟོག་ཡོད་རུང་། རྒྱ་ནག་གཞུང་གིས་ད་དུང་ཡང་ངོས་ལ་ཁ་བྲལ་བ་ཞེས་པའི་ཉེས་འཛུགས་བྱེད་ཀྱི་ཡོད། ཅེས་བཀའ་སྩལ།།
