༢༠༡༠ ཟླ་ ༥ ཚེས་ ༧ རེས་གཟའ་པ་སངས།

༄༅། །ཕྱི་ལོ་ ༢༠༡༠ ཟླ་ ༥ ཚེས་ ༤ ཉིན་ཨ་རིའི་གྲོས་ཚོགས་འོག་མའི་སྐུ་ཚབ་འཐུས་མི་སྐུ་ཞབས་མག་མོ་ཧོན་ (Mr. MCMahon) ལགས་དང་གཞན་གྲོས་ཚོགས་ཀྱི་འཐུས་མི་བརྒྱད་ཀྱིས་སྐྱེ་རྒུ་མདོར་ས་ཡོམ་གྱི་གོད་ཆག་ཕོག་པ་རྣམས་ལ་གནད་དོན་བཞིའི་ཐོག་རྒྱབ་སྐྱོར་ཞུ་རྒྱུའི་གྲོས་ཆོད་ཅིག་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་ལ་ཕུལ་ཡོད། གནད་དོན་བཞི་པོ་ནི།

༡༽ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་བྱུང་བའི་ས་ཡོམ་གྱི་གོད་ཆག་འོག་ཚེ་སྲོག་ཤོར་བ་རྣམས་དང་། ལུས་སེམས་གཉིས་ལ་དཀའ་སྡུག་ཚད་མེད་མྱོང་བཞིན་པའི་རྗེས་ཤུལ་ཡུལ་མི་ཚོར་སྙིང་ཐག་པ་ནས་སེམས་གསོ་ཞུ་རྒྱུ།

༢༽མཚོ་སྔོན་ཞིང་ཆེན་གྱི་མི་མང་ཚོ་དང་། ཨ་རིའི་མི་སེར་ཡིན་པའི་བོད་རིགས་དང་རྒྱ་རིགས་མི་མང་གི་གཙོས་ངལ་སེལ་རོགས་སྐྱོར་བ་སོགས་ས་ཡོམ་གྱི་གོད་ཆག་འོག་དངོས་ཤུགས་གང་རུང་གི་ཕམ་ཉེས་བྱུང་བ་རྣམས་ལ་གདུང་སེམས་མཉམ་སྐྱེ་ཞུ་རྒྱུ།

༣༽ཨ་རིའི་ཕྱི་འབྲེལ་དྲུང་ཆེ་ལྕམ་སྐུ་ཧི་ལེ་རི་ཁི་ལིན་ཊོན་མཆོག་གིས་དཀའ་ངལ་འོག་ཡོད་པའི་རྒྱ་ནག་མི་མང་ཚོར་ཨ་རིའི་གཞུང་གི་རོགས་རམ་ཞུ་རྒྱུའི་གྲ་སྒྲིག་ཡོད་པའི་གསལ་བསྒྲགས་གནང་བ་དེར་རྒྱབ་སྐྱོར་ཞུ་རྒྱུ།

༤༽ས་ཡོམ་གྱི་གོད་ཆག་འོག་ཉམས་ཆག་ཕྱིན་པའི་ས་གནས་ཡུལ་མིའིི་སྡོད་ཁང་དང་། བོད་པའི་ཆོས་དང་རིག་གཞུང་གི་ངོ་བོ་མཚོན་པའི་དགོན་སྡེ་དང་ལྷ་ཁང་། དེ་བཞིན་ནང་པའི་བསྟི་གནས་གཞན་བཅས་ལ་ཕུགས་རྒྱང་རིང་བའི་ཉམས་གསོའི་ལས་གཞིར་རྒྱབ་སྐྱོར་ཞུ་རྒྱུ། ཅེས་རྒྱབ་སྐྱོར་གྱི་གྲོས་ཆོད་བཞག་འདུག

མ་དཔེ་དབྱིན་ཡིག་ཐོག་ཡོད་པ་ནས་ཕབས་སྒྱུར་ཞུས་པས་དེར་རྩ་འཛིན་ཡོད་པ་ཞུ།