༢༠༡༠ ཟླ་ ༥ ཚེས་ ༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༤ ཉིན་ཉེ་ཆར་བོད་མདོ་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་ཚབས་ཆེ་འོག་རྐྱེན་འདས་སུ་གྱུར་བ་རྣམས་ཀྱི་བདུན་ཚིགས་གསུམ་པར་བཙན་བྱོལ་བོད་གཞུང་བཀའ་ཤག་གི་ལམ་སྟོན་ལྟར་ཨི་ཊ་ལིར་གནས་སྡོད་བོད་མི་རྣམས་ནས་མྱ་ངན་གུས་འདུད་དང་མཆོད་འབུལ་སྨོན་ལམ་རྒྱ་ཆེ་གནང་ཡོད། དེ་ཉིན་སྔ་དྲོ་ཆུ་ཚོད་ ༧།༠༠ ཐོག་གྲོང་ཁྱེར་མི་ལན་ནང་རྟེན་གཞི་བྱས་པའི་རབ་བརྟན་དགེ་འཕེལ་གླིང་ཆོས་ཚོགས་སུ་མི་ལན། (Milan) དང་། མོན་ཛ། (Monza) སྦེར་ག་མོ། (Bergamo) བཅས་ཀྱི་ས་གནས་ཁག་ནས་བོད་མི་བསྡོམས་ ༢༨ འདུ་འཛོམས་ཐོག་བསྟན་འཛིན་མཁྱེན་རབ་རིན་པོ་ཆེ་མཆོག་དབུ་བཞུགས་ཀྱིས་སྨོན་ལམ་གསོལ་འདེབས་རྒྱ་ཆེ་གནང་ཡོད། ཆུ་ཚོད་ ༧།༤༩ ཐོག་བོད་རིགས་ཚོགས་པའི་ཚོགས་གཙོ་སྐལ་བཟང་སྒྲོལ་དཀར་ལགས་ཀྱི་གཙོས་མང་ཚོགས་རྣམས་ནས་ ས་ཡོམ་གྱི་འཇིག་པ་བྱུང་བ་རྣམས་ལ་གདུང་སེམས་མཉམ་སྐྱེ་དང་། ལྷག་པར་འདས་པོ་རྣམས་ལ་སྐར་མ་གཅིག་རིང་མྱ་ངན་མཚོན་ཆེད་ངག་བཅད་ཞུས་ཡོད། དེ་བཞིན་ཨི་ཊ་ལིར་གནས་སྡོད་བོད་མི་ཡོངས་ལ་ཆུ་ཚོད་ ༧།༤༩ ཐོག་ས་གནས་སོ་སོར་སྨོན་ལམ་དང་སྐར་མ་གཅིག་རིང་ངག་བཅད་མྱ་ངན་ཞུ་དགོས་པའི་བཀོད་ཁྱབ་གནང་ཡོད། གཞན་ཡང་པོ་མ་ཡར་ (Pomaia) སེར་བྱེས་དགེ་བཤེས་བསྟན་འཛིན་བསྟན་འཕེལ་ལགས་དབུ་བཞུགས་ཐོག་ས་གནས་དེར་གནས་སྡོད་བོད་རིགས་ ༡༡ ཙམ་མཉམ་འཛོམས་ཐོག་སྨོན་ལམ་དང་མཆོད་འབུལ་རྒྱ་ཆེ་གནང་བ་མ་ཟད། སྐར་མ་གཅིག་རིང་ངག་བཅད་ཀྱང་གནང་ཡོད། དེ་བཞིན་ཨི་ཊ་ལིར་གནས་སྡོད་བོད་རིགས་ཡོངས་ནས་གདུང་སེམས་མཉམ་སྐྱེ་མཚོན་ཆེད་ཞལ་འདེབས་ཡུ་རོབ་དངུལ་སྒོར་ ༣༨༣༢ ཙམ་ ༤་༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ལ་གཏོང་རྒྱུ་ཡིན་པ་བཅས།།
