༢༠༡༠ ཟླ་ ༥ ཚེས་ ༡༠ རེས་གཟའ་ཟླ་བ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་གྱི་ཞོགས་པ་ཡུལ་ཤུལ་བོད་རིགས་རང་སྐྱོང་ཁུལ་དུ་ཆོས་ཚན་གང་ནས་ཀྱང་ཟློག་ཏུ་མེད་པ་ས་ཡོམ་ཤུགས་ཆེ་བྱུང་རྐྱེན་མི་ནོར་ཁོར་ཡུག་དང་བཅས་པར་ཤི་གསོན་གྱི་རྒྱུན་མ་ཆད་པ་མྱ་ངན་གྱི་མུན་པ་འཐིབས་པའི་སྐབས་༸གོང་ས་ཆེན་པོའི་སེམས་གསོ་དང་རང་རིགས་བླ་སྤྲུལ་སེར་སྐྱ་ཚང་མས་ཐུགས་སྨོན་དང་མྱ་ངན། གདུང་སེམས་མཉམ་སྐྱེད་གནང་བར་ལྷག་བསམ་ཟོལ་མེད་ཡིན་པ་བཀྲིིན་ཆེ་ཞུ།
ཉིན་དེར་དཔལ་ལྡན་རྭ་ཉག་དགོན་གྱི་དགེ་འདུན་པ་ ༡༧༠ ཙམ་གྱི་ས་ཡོམ་ཤུགས་ཆེ་རྒྱག་ས་རོང་པོ་དང་དཀར་མདའ་སོགས་ལ་ཁག་བགོས་ཀྱི་ཉིན་མཚན་དབྱེར་མེད་ཀྱིས་མི་གྲངས་ ༢༠༠ ཙམ་སྲོག་སྐྱོབ་ཐུབ་པ་དང་། རྨས་མ་བརྒྱ་ཕྲག་ཁ་ཤས་ལ་རོགས་སྐྱོར་དབོར་འདྲེན་དང་སྐུ་ཕུང་ ༩༦ ཙམ་ཞིག་མཁན་པོ་རྣམ་གཉིས་དབུ་བཞུགས་ཀྱི་སླ་ཆོས་སུ་མ་གནང་བར་ཆོས་ཕྱོགས་ཀྱི་བྱེད་སྒོ་ཆ་ཚང་སྒྲུབ་ནས་འབྲི་ཆུའི་ནང་དུར་གཏང་བྱས་འདུག གནས་ཚུལ་དེ་འདྲ་གསན་མ་ཐག་འཛམ་གླིང་ཡུལ་གྲུ་ཀུན་ལ་གནས་པའི་རང་རིགས་བླ་སྤྲུལ་སེར་སྐྱ་ཀུན་གྱི་ལམ་སྟོན་ཆེན་པོ་མཁྱེན་བརྩེ་ནུས་གསུམ་གྱི་བདག་ཉིད་ཁམས་མགྱོགས་ཡིད་བཞིན་ནོར་བུ་ཁོང་ཐེ་ན་ནས་འཕྲལ་མར་དམིགས་བསལ་སྨན་པ་ཁག་གཅིག་ཁྲིད་ནས་ཡུལ་ཤུལ་དུ་ཕེབས་པ་རེད།
དེ་ནས་ཁོང་གི་བསྔོ་སྨོན་དང་སེམས་གསོ་འཚམས་འདྲི་གསུང་བཤད་བཅས་གནང་ཞོར་ཉམ་ཐག་མི་ཚང་རེར་རྒྱ་སྒོར་ ༣༠༠ དང་གུར་། གྲོ་འབྲས་རྒྱ་མ་ ༡༢༠༠༠ དང་རྩམ་པ་རྒྱ་མ་ ༡༥༠༠༠ མར་རྒྱ་མ་ ༡༠༠༠ ཐུག་པ་དོ་པོ་ ༡༠༠༠ ཉལ་ཆས་ ༣༠༠༠ གྱོན་ཆས་གྲངས་ ༢༥༠༠ བཅས་བསྡོམས་རྒྱ་སྒོར་ཁྲི་ ༢༡༥ ཙམ་གྱི་རོགས་སྐྱོར་གནང་འདུག ཡང་སྨོན་ལམ་ཚོགས་ཆུང་བཙུགས་ནས་ཉིན་ལྟར་བསྔོ་སྨོན་ཚོགས་བཞིན་པ་རེད་ལ་ཕྱི་ལོ་ ༢༠༠༦ ལོར་ཁོང་གིས་དབུ་ཁྲིད་དེ་རོང་པོ་འཇོ་སྣ་རང་བྱུང་སྲུང་སྐྱོབ་ས་ཁུལ་ལ་ས་ཆ་ཨེ་ཀ་ ༡༠༠༠ ཙམ་གྱི་ཐོག་ལོ་ངོ་ ༨༥༢ ཕྱིན་པའི་རྭ་ཉག་དགོན་རྒྱལ་ཡོངས་གཙུག་ལག་སློབ་གཉེར་ཁང་གསར་བཞེངས་གནང་བར་ལོ་ལྔ་ཚན་གསུམ་གྱི་འཆར་གཞི་ནང་ད་བར་གཙུག་ལག་ཁང་གཞི་རྒྱ་ཆེ་བའི་ཐོག་རྩེག་བདུན་དང་། སློབ་གྲྭ དཔེ་མཛོད། ལས་ཤག་སོགས་ལ་ཨ་སྒོར་ས་ཡ་བཅུ་ལྷག་བཏང་ནས་མ་འོངས་པ་གྲུབ་མཐའ་རིས་མེད་ཀྱི་སློབ་གཉེར་བ་གྲངས་ ༥༠༠༠ ནས་ཆིག་ཁྲི་བར་འཚོ་གནས་ཐུབ་པའི་ཆོས་ཀྱི་གྲོང་ཁྱེར་རམ་བོད་ཀྱི་རིག་གནས་གྲོང་ཁྱེར་ཞིག་བསྐྲུན་རྒྱུ་ལྷག་བསམ་དང་བློ་སྟོབས་གདེང་ཚོད་བཅས་ཡོད་ཀྱང་། ད་ཆ་ས་ཡོམ་ཤུགས་ཆེ་ཤོས་རྒྱག་སར་འཁེལ་སྟབས་ཕན་མེད་གྱུར་བས་མ་འོངས་པའི་བོད་མི་རིགས་ཀྱི་རིག་གནས་བླ་སྲོག་ལ་གྱོང་གུད་ཚབས་ཆེན་ཐེབས་པ་ཕྱི་རྒྱལ་ནང་ཀུན་ནས་བློ་ཕམ་བྱེད་བཞིན་པ་རེད། དེ་འདྲའི་གནས་སྟངས་ཛ་དྲག་སྐབས་ཏང་སྲིད་དམག་གསུམ་གྱི་དབུ་ཁྲིད་རྣམ་གཉིས་ཆེད་ཕེབས་ཐོག་ཁྱེད་ཚོའི་སྡུག་བསྔལ་ནི་ང་ཚོའི་སྡུག་བསྔལ།
ཞེས་བསྒྲགས་ཐོག་གནམ་ས་གཉིས་ནས་ནད་པ་དབོར་འདྲེན་དང་བཟའ་བཅས་སྐྱེལ་འདྲེན་སོགས་ཕན་ཐོགས་ཆེན་པོ་བྱུང་ཡོད་པ་གསར་ལམ་ཁག་ནས་གསལ་བ་བཞིན། འོན་ཀྱང་སྐྱེ་རྒུ་མདོ་ནས་སྤྱི་ལེ་ ༤༠ བརྒལ་བའི་ཞིང་འབྲོག་ས་ཁུལ་རྣམས་ད་དུང་ཡང་ལྟ་རྟོག་བྱེད་མ་ཐུབ་པར་དཀའ་ངལ་ཤུགས་ཆེ་འཕྲད་བཞིན་པ་རེད། ཁུག་ཀྱོག་ལ་ཚགས་པར་དང་མིང་བསྒྲགས་ཀྱི་རེ་བ་རྒྱག་ས་མེད་དུས་མགོན་མེད་སྐྱབས་མེད་ལྷག་པ་རེད།
སྲིད་བློན་ཝན་ཅ་པའོ་རོང་པོར་འཚམས་འདྲིར་ཕེབས་སྐབས་ཡུལ་ཤུལ་ཁུལ་དུ་གྱོང་གུད་ཚབས་ཆེ་ཕོག་གྲལ་རྭ་ཉག་དགོན་གཙུག་ལག་སློབ་གཉེར་ཁང་ལམ་བར་དུ་འཁེལ་སྟབས་འཚམས་གཟིགས་མ་བྱུང་བ་འདི་སྡེ་དགོན་གཉིས་ནས་བློ་ཕམ་ཚད་མེད་བྱེད་བཞིན་པ་རེད།
ས་གནས་ལས་བྱེད་པའི་འགན་འཁུར་ངོ་སྤྲོད་མ་ཐུབ་པར་ངོས་འཛིན་བྱེད་བཞིན་འདུག སླད་ཕྱིན་ཡུལ་ཤུལ་འཛུགས་སྐྲུན་སྐབས་ས་ཁུག་ལུང་ཁུག་ལ་གནས་པའི་དགོན་པ་དང་ཞིང་འབྲོག་ཚང་མར་དངོས་ཐོག་བདེན་འཚོལ་དང་རྒྱལ་གཅེས་ཆོས་གཅེས་དམངས་གཅེས་ཀྱི་སྲིད་བྱུས་ལག་བསྟར་གནང་རྒྱུའི་རེ་བ་བྱེད་བཞིན་ཡོད། ཅེས་འཁོད་འདུག
