༢༠༡༠ ཟླ་ ༥ ཚེས་ ༡༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༡༡ ཉིན་རྡ་ས་གནས་འགོ་འཛིན་ལས་ཁུངས་ནས་གོ་སྒྲིག་ཐོག་ཐེག་ཆེན་ཆོས་གླིང་གཙུག་ལག་ཁང་དུ་རྡ་སའི་འགོ་མང་ཡོངས་ཀྱི་ཞལ་འདེབས་ཇི་བྱུང་སྐྱེ་རྒུ་མདོ་ས་ཡོམ་གདུང་སེལ་ཚོགས་ཆུང་ལ་གནང་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ ༦།༣༠ ཐོག་རྡ་ས་ཐེག་ཆེན་ཆོས་གླིང་གཙུག་ཁང་དུ་དཔལ་ལྡན་རྒྱུད་སྟོད་གྲྭ་ཚང་གི་མཁན་བླ་དབུ་བཞུགས་ཐོག་སྨོན་ལམ་གསོལ་འདེབས་གནང་བ་དང་། དེ་ནས་མེ་གྷན་ཁྲོམ་གཞུང་ནས་སེར་སྐྱ་མི་མང་བརྒྱ་ཕྲག་མང་པོས་མར་མེའི་ཁྲོམ་སྐོར་གནང་སྟེ་གཙུག་ལག་ཁང་དུ་མཉམ་ཞུགས་རྗེས་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་ས་ཡོམ་གྱི་གོད་ཆག་འོག་འདས་གསོན་རྣམས་ལ་གདུང་སེམས་མཉམ་སྐྱེ་ཆེད་སྐར་མ་གཅིག་རིང་ངག་བཅད་མྱ་ངན་གུས་འདུད་གནང་། དེ་རྗེས་བོད་གཞུང་ཟློས་གར་ཚོགས་པས་མྱ་ངན་གྱི་མཉམ་གཞས་མང་ཚོགས་ལ་གྱང་རས་ཐོག་སྟོན་རྗེས་རྡ་ས་ས་གནས་འགོ་འཛིན་གྱིས་རྡ་ས་འགོ་མང་ཡོངས་ནས་ཞལ་འདེབས་བྱུང་བ་ཧིན་སྒོར་ ༢,༥,༠༠༠༠༠ དངུལ་འཛིན་དེ་སྐུ་མགྲོན་གཙོ་བོ་བཀའ་ཁྲི་མཆོག་གིས་སྐྱེ་རྒུ་མདོ་ས་ཡོམ་གདུང་སེལ་ཚོགས་ཆུང་གི་ཚོགས་མི་རྣམས་ལ་གནང་འཕྲལ་སྐྱེ་རྒུ་མདོའི་ས་ཡོམ་གདུང་སེལ་ཚོགས་ཚུང་ཚོགས་མི་སྐུ་ཞབས་བློ་ཚེ་ལགས་ཀྱིས་སྐྱེ་རྒུ་མདོའི་འདས་གསོན་མིང་མང་རྣམས་ཀྱི་ཚབ་ཞུས་ཏེ་ང་ཚོར་རྒྱབ་སྐྱོར་དང་ཐུགས་ཁུར་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་། ཆབས་ཅིག་ང་ཚོར་ལོ་རྒྱུས་སྟེང་བྱུང་མྱོང་མེད་པའི་གོད་ཆག་བྱུང་བར་མི་མང་གི་གདུང་སེམས་མཉམ་སྐྱེའི་ཞལ་འདེབས་གནང་བའི་དངུལ་སྐར་མ་གཅིག་ཀྱང་ཆུད་ཟོས་མེད་པར་རྗེས་སུ་ཕྱི་གསལ་ནང་གསལ་བྱེད་ཀྱི་ཡིན་སྐོར་སོགས་ཀྱི་གསུང་བཤད་གནང་། དེ་ནས་བཀའ་ཁྲི་མཆོག་གིས་གསུང་བཤད་གནང་དོན། དེ་རིང་འདིར་མྱ་ངན་གུས་འདུད་ཀྱིས་མཆོད་འབུལ་དང་སྨོན་ལམ་དུ་ཕེབས་པའི་ས་གནས་ཀྱི་བོད་རིགས་སེར་སྐྱ་ཡོངས་ལ་རྡ་ས་ས་གནས་མང་ཚོགས་ནས་གོ་སྒྲིག་གནང་བ་གཞིར་བཟུང་ཉེ་ལམ་ཕྱི་ཟླ་ ༤ ཚེས་ ༡༤ ཉིན་མདོ་ཁམས་སྐྱེ་རྒུ་མདོར་ས་ཡོམ་གྱི་འཇིག་པ་ཆེན་པོ་བྱུང་བར་འདས་གསོན་ཚང་མའི་ཆེད་དུ་གདུང་སེམས་མཉམ་སྐྱེ་དང་། སྐྱིད་སྡུག་མཉམ་མྱོང་གི་བསྔོ་སྨོན་གསོལ་འདེབས་བྱ་རྒྱུའི་ཆེད་ང་ཚོ་འདིར་ཚོགས་པ་རེད།
གོད་ཆག་འདི་དེ་སྔ་ང་ཚོའི་དྲན་ཡུལ་ལ་མེད་པའི་ཚབས་ཆེན་བྱུང་བ་རེད། ས་གནས་གཅིག་དང་མི་ཐོག་གཅིག་གི་གོད་ཆག་ཙམ་མ་ཡིན་པར་བོད་མི་རིགས་ཡོངས་ཀྱི་གོད་ཆག་ཅིག་ལ་ངོས་འཛིན་བྱེད་དགོས་རྒྱུ་ཞིག་རེད། ཕྱི་ཟླ་ ༤ ཚེས་ ༢༢ ཉིན་ཕྱི་དྲོ་ཆུ་ཚོད་ ༡༧ བར་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་གཞུང་འབྲེལ་གྱི་གསལ་བསྒྲགས་བྱས་པར་གཞིགས་ན་མི་གྲངས་ ༢༡༨༧ འདས་གྲོངས་སུ་སོང་བ་དང་། མི་གྲངས་ ༨༠ གར་སོང་ཆ་མེད་དུ་གྱུར་བ། རྨས་སྐྱོན་ཕོག་པ་མི་གྲངས་ ༡༢༡༢༥ དེའི་ནང་ནས་རྨས་སྐྱོན་ཚབས་ཆེ་ཕོག་སྟེ་སྲོག་ལ་ཉེན་ཁ་ཡོད་པ་མི་གྲངས་ ༡༤༣༤ བྱུང་འདུག གཞུང་འབྲེལ་གྱི་གསལ་བསྒྲགས་ནང་མ་ཚུད་པའི་ལུང་པ་ཚང་མར་ཡོང་གི་ཡོད། བརྒྱ་ཆ་བརྒྱ་ཐམ་པ་གཞུང་གི་ཐོ་གཞུང་ནང་སླེབས་ཐུབ་རྒྱུ་མེད་པ་རེད། གཞུང་གི་ཐོ་གཞུང་ནང་ཡོད་པ་དེ་དག་ངེས་པ་རྙེད་པའི་འདས་གྲོངས་ཕྱིན་པ་དེ་རེད། དངོས་སུ་འདས་གྲོངས་དང་རྨས་སྐྱོན་ཕོག་པ་ཏན་ཏན་དེ་ལས་མང་བ་ཡོད་སྲིད་པ་རེད་བསམ་གྱི་འདུག གོད་ཆག་ཚབས་ཆེན་བྱུང་སྐབས་གཞིས་བྱེས་བོད་མི་ཚང་མས་གདུང་སེམས་མཉམ་སྐྱེ་དང་འཁྲིས་སུ་ཡོད་མཁན་ཚོས་རོགས་སྐྱོར། དེ་བཞིན་ཐག་རིང་ན་ཡོད་མཁན་ཚོས་གསོལ་བ་སྨོན་ལམ་བཅས་བྱས་པ་ནི་བོད་མི་རིགས་ཀྱི་ཆིག་སྒྲིལ་གྱི་ནུས་པ་ཞིག་ཐོན་པ་རེད། ས་ཡོམ་བྱུང་བའི་ཉིན་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་སྨོན་བདེན་ཚིག་རླབས་ཆེན་སྩལ་བ་མ་ཟད། ཕྱི་ཚེས་ ༡༥ ཉིན་གཞུང་འབྲེལ་གྱི་མཆོད་འབུལ་གནང་བ་རེད། ཕྱི་ཟླ་ ༥ པའི་ཚེས་ ༤ ཉིན་བདུན་ཚིགས་གསུམ་པའི་སྐབས་བཙན་བྱོལ་བོད་མི་གནས་ཡུལ་ཡོངས་སུ་རྫོགས་པར་ཉིན་བརྒྱ་དུས་གཅིག་ལ་མཆོད་འབུལ་སྨོན་ལམ་ཞུས་ཡོད། ཕྱོགས་མཚུངས་དགོན་པ་དང་གཞུང་འབྲེལ་མིན་པའི་ཚོགས་ཁག་སོགས་ནས་མཆོད་འབུལ་སྨོན་ལམ་གནང་བ་དེ་དག་ས་གནས་ཀྱི་འདས་གསོན་ཚོར་དགེ་བའི་འབྲས་བུ་སྨིན་པའི་རེ་བ་བྱེད་ཀྱི་ཡོད། ད་རེས་གོད་ཆག་བྱུང་སྐབས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་འཛིན་ཧུའུ་ཅིན་ཐའོ་དང། ཚོགས་གཙོ་ཇར་ཆེ་ལིང། དེ་བཞིན་སྲིད་བློན་ཝུན་ཅ་པའོ། སྲིད་བློན་གཞོན་པ་ཧུཡེ་ལེན་ཡུད། འཐབ་ཕྱོགས་གཅིག་གྱུར་པུའུ་ཡི་བློན་ཆེན་ཀྲུའུ་ཝེ་ཆུན། ཚང་མས་ཁ་ཤས་ཐེངས་རེར་དང་ཐེངས་གཉིས་ས་གནས་སུ་དུས་ཐོག་ལ་ཕེབས་པ་དང་། མི་མང་མཉམ་དུ་གདུང་སེམས་མཉམ་སྐྱེ་དེ་དག་ཆབ་སྲིད་འགོ་ཁྲིད་པས་བསྒྲུབ་རྒྱུའི་ལས་འགན་ཞིག་བསྒྲུབས་པ་རེད།
དེར་༸གོང་ས་༸སྐྱབས་མགོན་ཆེན་པོ་མཆོག་གིས་ལེགས་གསོའི་བསྔགས་བརྗོད་གནང་ཡོད་ལ་ང་རང་ཚོས་བཀའ་དྲིན་རྗེས་དྲན་དང་ཐུགས་རྗེ་ཆེ་ཞུ་གི་ཡོད། ཧུཡེ་ལེན་ཡུད་ལ་ཆ་མཚོན་ན་གོད་སྐྱོབ་བསྐྱར་གསོའི་ལས་རིམ་གྱི་འགོ་ཁྲིད་ནས་དུས་ཡུན་རིང་པོ་ཞིག་ས་གནས་ལ་གཟིགས་རྟོགས་གནང་རྒྱུའི་འཆར་གཞི་ཡོད་འདུག ལྷག་པར་སྲིད་བློན་ཝུན་ཅ་པའོ་ཐེངས་གཉིས་པ་ཕེབས་པའི་སྐབས་ས་གནས་དགེ་འདུན་པའི་མཚོན་བོད་རིགས་ཚོས་ཉེན་སྐྱོབ་ལས་དོན་ཐོག་ལའང་ངོས་ལེན་དང་བསྔགས་བརྗོད་གནང་འདུག དེའང་དྲང་བདེན་གྱི་གནས་སྟངས་ཤིག་ཆགས་པ་རེད་བསམ་གྱི་ཡོད། ཕྱོགས་མཚུངས་བོད་རིགས་དགེ་འདུན་པ་གཙོ་བོར་གྱུར་པའི་གཡས་གཡོན་མང་པོས་རོགས་སྐྱོར་ཐོག་ནས་ཕྱག་ལས་གནང་འདུག་གཞུང་འབྲེལ་བྱས་པ་ཡིན་ན་ཧ་ལམ་མི་གྲངས་ ༢༠༠༠ བརྒལ་བ་སླེབས་ཡོད་པའི་གསལ་བསྒྲགས་བྱས་འདུག དེའི་ནང་མང་ཆེ་བ་དགེ་འདུན་པ་དང་སློབ་ཕྲུག་འདུག་དེའི་ནང་བོད་པ་ཙམ་མ་ཡིན་པའི་རྒྱ་རིགས་དང་མི་རིགས་གཞན་གྱི་སློབ་ཕྲུག་ཀྱང་མཉམ་དུ་འདུག ཁོང་ཚོའི་རླབས་ཆེན་གྱི་ཉེན་སྐྱོབ་ཕྱག་ལས་གནང་བ་དེ་འཛམ་བུ་གླིང་གི་ངོས་ལེན་བྱེད་ཀྱི་ཡོད་ལ་ང་ཚོས་ངེས་པར་དུ་བཀའ་དྲིན་རྗེས་དྲན་ཞུ་འོས་པ་རེད་བསམ་གྱི་ཡོད། རྒྱ་ནག་མང་ཚོགས་ནས་རྒྱ་ནག་མི་མང་གི་གདུང་སེམས་མཉམ་སྐྱེའི་ཞལ་འདེབས་རྒྱག་རྒྱུ་དང་སྨན་གྱི་མཐུན་རྐྱེན་སྦྱར་རྒྱུ། དེ་བཞིན་གནས་ཚུལ་མང་པོའི་ཐོག་རྒྱ་ནག་མང་ཚོགས་ཤེས་ཡོན་ཅན། གསར་འགོད་པ། རྩོམ་སྒྲིག་པ་མང་པོ་ཞིག་གི་མཉམ་རུབ་ཀྱི་མཐུན་འགྱུར་གནང་ཡོད།
ང་ཚོས་ངེས་པར་དུ་བཀའ་དྲིན་རྗེས་དྲན་དང་ལེགས་གསོ་བྱེད་དགོས་རྒྱུ་རེད་བསམ་གྱི་ཡོད། དེ་བཞིན་ཕྱི་ནང་གི་གསར་འགོད་པ་མང་པོ་ཞིག་གིས་དངོས་ཡོད་གནས་ཚུལ་འཛམ་བུ་གླིང་གི་མཐོང་ཐུབ་རྒྱུ་བཟོས་ཡོད། BBC དང་ CNN CBC དེ་བཞིན་རྒྱུད་ལམ་འདྲ་མིན་སྣ་ཚོགས་ཞིག་གི་གཟུགས་མཐོང་བརྙན་འཕྲིན་དང་། གློག་འཕྲིན། དཔར་འདེབས་བྱེད་པའི་བརྒྱུད་ལམ་ཐོག་ནས་ཉིན་མང་པོའི་བར་དུ་ཐུགས་སྣང་གནང་སྟེ་ཕྱི་གསལ་ནང་གསལ་བཟོས་ཐུབ་པ་བྱུང་ཡོད། གསར་འགྱུར་བརྒྱུད་ལམ་དེ་ཚོར་ང་ཚོས་ཐུགས་རྗེ་ཆེ་ཞུ་དགོས་རྒྱུ་དང་། ལྷག་པར་དུ་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་ཚོགས་གཙོ་ཇར་ཆད་ལིང་གིས་གསལ་ཁ་སྟོན་ནས་བཙན་བྱོལ་བོད་མིའི་སྤྱི་ཚོགས་ནང་ནས་དངུལ་དངོས་ཀྱི་ཞལ་འདེབས་འབུལ་མཁན་དང་གཉེན་འཕྲད་ཡོང་མཁན་ཡོད་ན་ས་གནས་སོ་སོའི་གཞུང་ཚབ་ནས་ངོས་ལེན་དགོས་རྒྱུ་དང་། བྱེད་ཆོག་རྒྱུའི་གནས་ཚུལ་གསལ་སྟོན་གནང་བ་དེས་ཟི་ཁྲོན་ས་ཡོམ་སྐབས་མ་བྱུང་བའི་ད་རེས་གསར་པ་ཞིག་རེད། དེས་བཙན་བྱོལ་སྤྱི་ཚོགས་ལ་བློ་སྟོབས་དང་ལམ་སྟོན་གྱི་ཡོད། དེ་བཞིན་ང་ཚོའི་རེ་འདུན་བསྒྲུབ་ཐུབ་རྒྱུའི་རེ་བ་བྱེད་བཞིན་ཡོད།
