༢༠༡༠ ཕྱི་ཟླ་ ༥ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༢༥ ཉིན་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མངའ་སྡེ་ཁག་ལྔའི་ནང་གི་མཛད་འཕྲིན་རྣམས་ལེགས་པར་གྲུབ་རྗེས་ཡུ་རོབ་བརྒྱུད་རྒྱ་གར་དུ་༸ཞབས་སོར་འཁོད་ཡོད། དེ་ཡང་ཕྱི་ལོ་ ༢༠༡༠ ཟླ་ ༥ ཚེས་ ༢༧ དང་བོད་ཟླ་ ༤ ཚེས་ ༡༥ ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་བྱང་ཕྱོགས་མངའ་སྡེ་བྷི་ཧཱར་གྱི་རྒྱལ་ས་པ་ཊི་ནའི་ནང་ས་ཞིང་ཨེ་ཀར་ ༢༢ ཐོག་བསྐྲུན་པའི་སྟོན་པ་རྗེས་དྲན་གྱི་སྐྱེད་མོས་ཚལ་གསར་བཞེངས་ལེགས་གྲུབ་བྱུང་བ་དེ་དབུ་འབྱེད་རབ་གནས་མཛད་ཡོད་པ་མ་ཟད། སྐྱེད་མོས་ཚལ་དེའི་ནང་མཆོད་རྟེན་གསར་བཞེངས་གཅིག་ལའང་མཚན་བྱང་སྩལ་ཡོད། ཉིན་རྒྱབ་ཆུ་ཚོད་ ༣ ཙམ་ལ་༸གོང་ས་མཆོག་གྷ་གྷལ་གནམ་ཐང་དུ་༸ཞབས་སོར་འཁོད་སྐབས་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག དེ་བཞིན་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་བཅས་གནད་ཡོད་མི་སྣ་ཁག་གཅིག་གིས་མགོན་པོ་གང་ཉིད་མཆོག་ལ་ཕེབས་བསུ་གཟབ་རྒྱས་ཞུས། གནམ་ཐང་ནས་ས་ཐོག་བརྒྱུད་བཞུགས་སྒར་དུ་ཆིབས་སྒྱུར་སྐྱོང་སྐབས་བོད་མི་གཙོས་པའི་དད་ལྡན་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད་པ་བཅས།།
