༢༠༡༠ ཕྱི་ཟླ་ ༥ ཚེས་ ༢༤ རེས་གཟའ་ཟླ་བ།

༄༅། །ཕྱི་ལོ་ ༢༠༡༠ ཟླ་ ༥ ཚེས་ ༢༢ རེས་གཟའ་སྤེན་པའི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོང་ཁྱེར་ནིའུ་ཡོཀ་དང་ནིའུ་ཇར་སིའི་ནང་བརྟེན་གཞི་བྱས་པའི་བོད་རིགས་ཚོགས་པ་ཐུན་མོང་གིས་ཇི་ལྟར་གསོལ་འདེབས་ཞུས་དོན་བཞིན་ཨ་རིའི་གྲོང་ཁྱེར་ནིའུ་ཡོག་གི་ནང་རྒྱུགས་ཆུའི་ཉེ་འགྲམ་དུ་ཡོད་པའི་ཡེ་ཤུའི་ཚོགས་ཁང་ཆེན་མོ་ (Riverside Church) ནང་༸ཞབས་སོར་བཀྲིན་ཆེ་བ་བསྐྱངས་ཏེ་བོད་མི་གྲངས་ ༥༠༠༠ ཙམ་ལ་བླང་དོར་གྱི་བཀའ་སློབ་སྩལ་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་སྔ་དྲོ་རྒྱུག་ཆུའི་ཉེ་འགྲམ་གྱི་ཡེ་ཤུའི་ཚོགས་ཁང་ཆེན་མོའི་ནང་༸ཞབས་སོར་བཀྲིན་ཆེ་བ་སྐྱོང་སྐབས་བོད་རིགས་ཚོགས་པའི་ཚོགས་གཙོ་སྐུ་ཞབས་པདྨ་ཚེ་དབང་ལགས་ཀྱིས་མགོན་པོ་གང་ཉིད་མཆོག་ལ་ཕེབས་གསུ་སྣེ་ལེན་གཟབ་རྒྱས་ཞུས་ཡོད། སྐབས་དེར་བཙན་བྱོལ་བོད་མིའི་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་དང་། བཀའ་ཁྲི་ཟམ་གདོང་རིན་པོ་ཆེ་མཆོག དེ་བཞིན་བཀའ་ཟུར་ཁག་གཅིག་དང་སྤྱི་ཟུར་ཁག་གཅིག་ཀྱང་ལྷན་ཞུགས་གནང་ཡོད།